អ្នកស្រាវជ្រាវជំរុញឱ្យថ្នាក់ដឹកនាំកម្ពុជា ដោះស្រាយបញ្ហាសាងសង់ប្រាសាទនៅថៃ តាមសន្តិវិធី

លោកបណ្ឌិត ឈត ប៊ុនថង ប្រធានវិទ្យាស្ថានទំនាក់ទំនងវប្បធម៌ អប់រំ និងទេសចរណ៍ នៃរាជបណ្ឌិតសភាកម្ពុជាយល់ឃើញថា ករណីប្រទេសថៃសាងសង់ប្រាសាទ ដែលមានរចនាបថស្រដៀងប្រាសាទបុរាណខ្មែរ គឺមិនអាចដូចរបស់ដើមនោះឡើយ ដោយហេតុថា វាខុសសម័យកាល ហើយថ្មដែលយកមកសាងសង់ទៀតសោត ក៏មានអាយុកាលខុសគ្នាដែរ ហើយចង់មិនចង់នឹងអាចធ្វើឱ្យមានអ្នកចង់មកមើលប្រសាទបុរាណខ្មែរ និងជួយផ្សព្វផ្សាយកម្ពុជាក៏អាចថាបានដែរ។

ពាក់ព័ន្ធនឹងនីតិវិធីក្នុងការដោះស្រាយបញ្ហាខាងលើ លោក ឈត ប៊ុនថង បានលើកឡើងថា បើនិយាយអំពីចំណាត់ការរបស់ប្រទេសមួយទៅលើប្រទេសមួយ គឺត្រូវឈរលើគោលការណ៍ច្បាប់ជាតិ និងអន្តរជាតិ ក៏ដូចជាការជជែកឱ្យយល់ពីគ្នា ព្រោះកម្ពុជា-ថៃជាប្រទេសជិតខាងគ្នា ដែលមានទំនាក់ទំនងល្អលើវិស័យជាច្រើន ហើយករណីប្រទេសថៃសាងសង់ប្រសាទ ដែលមានរចនាបថស្រដៀងប្រាសាតបូរាណខ្មែរនេះ ក៏មិនគួរធ្វើឱ្យទំនាក់ទំនងរវាងប្រទេសពីរឈានដល់ល្អក់កករនឹងគ្នាដែរ។

ជុំវិញករណីនៃការសាងសង់សំណង់នៅវត្តភូម៉ានហ្វា ស្ថិតក្នុងខេត្តបុរីរម្យ ប្រទេសថៃនេះដែរ ក្រសួងវប្បធម៌និងវិចិត្រសិល្បៈបានអះអាងថា ក្រសួងកំពុងយកចិត្តទុកដាក់យ៉ាងខ្លាំងលើសកម្មភាពនៃការសាងសង់នេះ ដោយបានចាត់ក្រុមការងារជំនាញតាមដានជាប្រចាំចាប់តាំងពីករណីនេះបានផ្ទុះឡើងនាអំឡុងឆ្នាំ២០២១ មកម្ល៉េះ។

បើតាមក្រសួងវប្បធម៌ ចំណាត់ការកន្លងមកគឺផ្ដោតលើសកម្មភាពទំនាក់ទំនងការទូតរវាងក្រសួងវប្បធម៌និងវិចិត្រសិល្បៈ និងភាគីថៃ (ស្ថានទូតថៃប្រចាំនៅកម្ពុជានិងក្រសួងវប្បធម៌ថៃ) ដោយបានបញ្ចូនអ្នកសិក្សាស្រាវជ្រាវ ដើម្បីចុះទៅពិនិត្យទីតាំងសាងសង់ផ្ទាល់ ប៉ុន្តែស្ថានភាពនៅពេលដែលអ្នកជំនាញចុះទៅ បានពិនិត្យឃើញថា សំណង់នៅមិនទាន់មានការសង់បន្ថែមនៅឡើយ ហើយករណីនៃការបញ្ជូនអ្នកជំនាញចុះត្រួតពិនិត្យ និងចរចា គឺកម្ពុជាមានជំហរច្បាស់លាស់ក្នុងការទប់ស្កាត់នូវរាល់ទង្វើទាំងឡាយណា ដែលបានចម្លងអត្តសញ្ញាណជាតិ ដោយផ្អែកទៅលើសកម្មភាពការទូត ការងារផ្ទៀងផ្ទាត់បែបបច្ចេកទេស ការងារចុះពិនិត្យទីតាំងផ្ទាល់ និងការងារផ្លូវច្បាប់ជាតិ និងអន្តរជាតិ ខណៈកិច្ចការនេះកំពុងស្ថិតក្នុងនីតិវិធីដោះស្រាយតាមជំនាញ និងការទូត៕

អត្ថបទ ៖ បូ ដូឡា​