បើទោះបីជា ករណីឆ្លងជាមធ្យមប្រចាំថ្ងៃបានធ្លាក់ចុះ ៣៦% ក្នុងរយៈពេល ៣ ខែកន្លងមកនេះក៏ដោយ ប៉ុន្តែមេរោគនៅតែឆ្លងដល់មនុស្ស ៥០ លាននាក់រៀងរាល់ ៩០ ថ្ងៃម្ដង ខណៈដែលកាលពីមុន វាត្រូវចំណាយពេលជិតមួយឆ្នាំ ក្នុងការចម្លងទៅមនុស្ស ៥០ លាន។ ល្បឿននៃការឆ្លងនេះ ដោយសារតែមេរោគបំប្លែងថ្មី ឌែលតា អាចចម្លងជំងឺពីម្នាក់ទៅម្នាក់ទៀតបានលឿនជាងមេរោគដើម។
ទន្ទមនេះ អ្នកជំនាញផ្នែកសុខភាពបាននិយាយថា ដោយសារបញ្ហាវ៉ាក់សាំង ផលប៉ះពាល់ដោយសារអាកាសធាតុត្រជាក់ខ្លាំង និងការជួបជុំថ្ងៃឈប់សម្រាកនាពេលខាងមុខ វាអាចបង្កើនករណីកាន់តែច្រើនបន្ថែមទៀត។
គួរជម្រាបថា ការឆ្លងនៅតែកើនឡើងនៅក្នុងប្រទេសចំនួន ៥៥ ក្នុងចំណោម ២៤០ ប្រទេស ដែលមានដូចជា រុស្ស៊ី អ៊ុយក្រែន និងក្រិចជាដើម។
អត្ថបទគួរអាន
ជុំវិញការកើនឡើងករណីឆ្លងជាថ្មីនេះ មេដឹកនាំពិភពលោកជាច្រើនបានសង្កត់ធ្ងន់លើតម្រូវការក្នុងការធ្វើឱ្យប្រសើរឡើងនូវកម្មវិធីចាក់វ៉ាក់សាំងនៅជុំវិញពិភពលោក ខណៈជាងពាក់កណ្តាលនៃចំនួនប្រជាជនពិភពលោក គឺមិនទាន់ទទួលបានវ៉ាក់សាំងមួយដូសនៅឡើយទេ ជាពិសេសនៅក្នុងប្រទេសដែលមានប្រាក់ចំណូលទាប។
ដូចនេះហើយ អង្គការសុខភាពពិភពលោក និងក្រុមជំនួយផ្សេងទៀតកាលពីខែតុលា បានអំពាវនាវដល់មេដឹកនាំនៃប្រទេសដែលមានសេដ្ឋកិច្ចធំបំផុតទាំង ២០ ឬហៅកាត់ថា G20 ឱ្យផ្តល់មូលនិធិដល់គម្រោងដែលមានទំហំទឹកប្រាក់ចំនួនជាង ២៣ ពាន់លានដុល្លារ ដើម្បីនាំយកវ៉ាក់សាំង ឧបករណ៍ធ្វើតេស្ត និងថ្នាំព្យាបាលកូវីដ-១៩ ទៅកាន់ប្រទេសក្រីក្រក្នុងរយៈពេល ១២ ខែខាងមុខនេះ។
សូមបញ្ជាក់ថា ក្នុងចំណោមអ្នកឆ្លងកូវីដ១៩សរុបជាង ២៥០លាននាក់ មានជាង៥លាននាក់បានស្លាប់បាត់បង់ជីវិត និងអ្នកជាសះស្បើយមានជាង ២២៦លាននាក់។ ក្នុងនោះ សហរដ្ឋអាមេរិក មានករណីឆ្លងច្រើនជាងគេបំផុត ជាង៤៧លាននាក់ បន្ទាប់មកឥណ្ឌាមានជាង៣៤លាននាក់ និងប្រស៊ីលមានជាង២១លាននាក់៕
អត្ថបទ ស៊ើង និមល់
None
