គណៈកម្មការអភិវឌ្ឍន៍ និងកំណែទម្រង់ជាតិ (NDRC) បាននិយាយថា រដ្ឋាភិបាលចិននឹងផ្តល់ជំនួយពិសេសដល់សហគ្រិនវ័យក្មេង ដោយសារតែការចាប់ផ្តើមអាជីវកម្មថ្មីមានឥទ្ធិពលច្រើនក្នុងការជំរុញការបង្កើតការងារ។
ក្នុងរយៈពេលប៉ុន្មានឆ្នាំថ្មីៗនេះ និស្សិតបញ្ចប់ការសិក្សានៅមហាវិទ្យាល័យកាន់តែច្រើនបានចូលរួមក្នុងភាពជាសហគ្រិន ប៉ុន្តែពួកគេក៏ប្រឈមមុខនឹងការលំបាកក្នុងការទទួលបានហិរញ្ញប្បទាន កង្វះបទពិសោធន៍ និងសេវាកម្មក្នុងចំណោមបញ្ហាផ្សេងទៀតផងដែរ។ យ៉ាងណាមិញ សម្រាប់ឆ្នាំនេះ រដ្ឋាភិបាលចិននឹងបន្ដលើកកម្ពស់ការចូលរួមក្នុងសហគ្រិនភាព និងឱកាសការងារ សម្រាប់និស្សិតបញ្ចប់ការសិក្សា។
នៅក្នុងគោលនយោបាយអនុគ្រោះរបស់រដ្ឋាភិបាលចិនសម្រាប់និស្សិតទើបបញ្ចប់ការសិក្សារួមមាន ការផ្ដល់ទុនពីរដ្ឋសម្រាប់អាជីវកម្មបង្កើតថ្មី, ផ្ដល់កម្ចីពិសេស និងអត្រាការប្រាក់ទាប, កាត់បន្ថយការចំណាយ និងពន្ធ, ព្រមទាំងផ្ដល់លទ្ធភាពសម្រាប់និស្សិតមហាវិទ្យាល័យក្នុងការរក្សាក្រេឌីតសាលា ខណៈពេលដែលពួកគេបានឈប់សម្រាកជាច្រើនឆ្នាំ ដើម្បីចាប់ផ្តើមអាជីវកម្មជាដើម។
ប្រទេសចិននឹងត្រូវមាននិស្សិតបញ្ចប់ការសិក្សា និងស្វែងរកការងារធ្វើជាង១០លាន៧សែននាក់ នៅក្នុងឆ្នាំ២០២២ ដែលចំនួននេះ នៅមិនទាន់រាប់បញ្ចូលចំនួននិស្សិតដែលបញ្ចប់ការសិក្សាពីបរទេសនោះទេ។
អត្ថបទគួរអាន
ទីផ្សារការងាររបស់ចិន គឺជាអាទិភាពកំពូលសម្រាប់ទីក្រុងប៉េកាំង ហើយបញ្ហាប្រឈមនេះបានកើតឡើងចំពេលដែលចិនមានបញ្ហាប្រឈមផ្នែកសេដ្ឋកិច្ច រួមទាំងការផ្ទុះឡើងនៃមេរោគឆ្លងជាបន្តបន្ទាប់ដែលបន្តឱ្យមានការថ្លឹងថ្លែងលើការប្រើប្រាស់ ការធ្លាក់ចុះនៃទីផ្សារអចលនទ្រព្យ កង្វះខាតការផ្គត់ផ្គង់ដែលបានជំរុញឱ្យតម្លៃវត្ថុធាតុដើមកើនឡើង និងភាពតានតឹងក្នុងតក្តាភូមិសាស្រ្តនយោបាយជាដើម។
គួរជម្រាបថា សហគ្រាសធុនតូច និងមធ្យម (SMEs) ដែលជាប្រភពការងារសំខាន់របស់ចិន បាននិងកំពុងទទួលរងផលប៉ះពាល់យ៉ាងធ្ងន់ធ្ងរដោយជំងឺរាតត្បាត។ ជាក់ស្ដែងមាន ប្រហែលជាង ៤លាននៃអាជីវកម្មខ្នាតតូចបំផុតរបស់ចិនបានបិទទ្វារអស់រយៈពេល ១១ ខែកាលឆ្នាំមុន ពោលគឺច្រើនជាងបីដងនៃចំនួនអាជីវកម្មថ្មីដែលបានបើកក្នុងពេលជាមួយគ្នានោះ។
យ៉ាងក៏ដោយចុះ រដ្ឋាភិបាលបានប្រកាសពីការលើកទឹកចិត្តដល់អាជីវកម្មខ្នាតតូចណាដែលផ្តល់ការងារដល់និស្សិតទើបបញ្ចប់ការសិក្សា តាមរយៈសិទ្ធិទទួលបានអត្ថប្រយោជន៍ និងប្រាក់កម្ចីជាមួយនឹងការកាត់បន្ថយការប្រាក់ជាដើម៕
None
