បារាំងបានសម្តែងការខឹងសម្បារយ៉ាងខ្លាំង ពិសេសខកចិត្តជាមួយអាមេរិក ដែលបានទៅចរចាឲ្យអូស្ត្រាលីលុបចោលកិច្ចព្រមព្រៀងជាមួយខ្លួន ហើយទៅទិញនាវារបស់អាមេរិកវិញ។
ជុំវិញរឿងដ៏ក្តៅគគុកនេះ ភាគីអាមេរិកបានព្យាយាមបន្ថយកំហឹងរបស់បារាំងតាមរយៈការថ្លែងសារសម្របសម្រួលពីប្រមុខការទូតអាមេរិក លោកអាន់តូនី ប្ល៊ីងខេន ដោយបាននិយាយបញ្ជាក់ពីសារសំខាន់របស់បារាំង ក្នុងរឿងជាច្រើន ក៏ដូចជាតួនាទីសំខាន់របស់អឺរ៉ុប និងបារាំងនៅក្នុងតំបន់ឥណ្ឌូប៉ាស៊ីហ្វិក។ ប្រមុខការទូតអាមេរិកអះអាងថា ភាពជាដៃគូនេះមានតាំងពីយូរមកហើយ និងនៅតែមានបន្តទៀតក្នុងថ្ងៃអនាគត។
បន្ថែមពីលើនេះ ប្រធានាធិបតីអាមេរិកលោក ចូ បៃឌិនកាលពីថ្ងៃអាទិត្យសប្តាហ៍មុនបានស្នើសុំទៅប្រធានាធិបតីបារាំង លោកអេម៉ានុអេល ម៉ាក្រុង ដើម្បីជួបពិភាក្សាគ្នាតាមទូរស័ព្ទនៅប៉ុន្មានថ្ងៃខាងមុខនេះ។ នេះបើតាមអ្នកនាំពាក្យរដ្ឋាភិបាលបារាំងប្រាប់ទីភ្នាក់ងារសារព័ត៌មាន AFP។
បើតាមអ្នកនាំពាក្យដដែល លោកម៉ាក្រុង នឹងទាមទារឲ្យលោកចូ បៃឌិន ពន្យល់ពីមូលហេតុឲ្យបានច្បាស់លាស់ជុំវិញ ការបញ្ចប់កិច្ចសន្យាទិញនាវារបស់បារាំង ក្រោយអូស្ត្រាលីបែរទៅចុះកិច្ចសហប្រតិបត្តិការជាមួយសម្ព័ន្ធមិត្ត AUKUSវិញ។
ទន្ទឹមនឹងការព្យាយាមបន្ថយកម្តៅកាទូតដោយអាមេរិក ភាគីអូស្ត្រាលីឯណោះវិញ មិនបានដើរតួនាទីជួយសម្របសម្រួលនោះទេ តែផ្ទុយទៅវិញ នាយករដ្ឋមន្ត្រីអូស្ត្រាលី លោកស្តុត ម៉ូរីសុន បានចេញមកការពារ ការសម្រេចចិត្តបញ្ចប់កិច្ចសន្យាជាមួយបារាំងថា ជារឿងត្រឹមត្រូវដែលគួរតែធ្វើ។
អត្ថបទគួរអាន
គួរជម្រាបថា កិច្ចសហប្រតិបត្តិការរវាងអាមេរិក អូស្ត្រាលី និងអង់គ្លេស មិនត្រឹមតែជះឥទ្ធិពល និងបង្កភាពតានតឹងដ៏កម្ររវាងសម្ព័ន្ធមិត្តចាក់ទឹកមិនលេចរបស់អាមេរិកនោះទេ ប៉ុន្តែវាថែមទាំងត្រូវបានភាគីចិន និងកូរ៉េខាងជើងប្រតិកម្ម និងបរិហារចំៗទៀតផង។
ក្រុងប៉េកាំង បានហៅកិច្ចសហប្រតិបត្តិការរវាងប្រទេសទាំងបីខាងលើនេះថា កំពុងធ្វើសង្គ្រាមត្រជាក់ ផ្នែកចិត្តសាស្ត្រ ជាមួយប្រទេសដទៃ ហើយបានប្រតិកម្មរិះគន់ទៀតថា គេមិនគួរបង្កើតក្រុមប្រទេសសម្ព័ន្ធភាពមួយ ដើម្បីសំដៅវាយប្រហារផលប្រយោជន៍របស់ប្រទេសទីបីនោះទេ។ ប្រទេសទីបីដែលចិនទំនងជាចង់សំដៅលើខ្លួនឯងផ្ទាល់តែម្តង។
ដោយឡែកកាលពីថ្ងៃច័ន្ទដើមសប្ដាហ៍នេះ សារព័ត៌មានរដ្ឋកូរ៉េខាងជើង KCNA បានចុះផ្សាយដោយបានស្រង់សម្តី រដ្ឋមន្ត្រីការបរទេសកូរ៉េខាងជើងដែលបានប្រតិកម្មថា៖ ទាំងនេះ គឺជាទង្វើដែលគេមិនចង់បាន និងជាទង្វើគ្រោះថ្នាក់បំផុត ដែលវានឹងធ្វើឱ្យរង្គោះរង្គើដល់តុល្យភាពយុទ្ធសាស្ត្រនៅក្នុងតំបន់អាស៊ីប៉ាស៊ីហ្វិក និងអាចបង្កឱ្យមានការប្រកួតប្រជែងអាវុធនុយក្លេអ៊ែរក្នុងតំបន់ថែមទៀតផង៕
None
