មេដឹកនាំរុស្ស៊ីបានអះអាងថា ការយល់ព្រមរបស់អង្គការសុខភាពពិភពលោក ចំពោះការអនុម័តឲ្យប្រើប្រាស់វ៉ាក់សាំង Sputnik V របស់រុស្ស៊ី នឹងធ្វើឲ្យការធ្វើដំណើរជុំវិញពិភពលោក មានភាពសេរីជាងមុន ចំពោះប្រជាជនរុស្ស៊ី និង អ្នកបានចាក់វ៉ាក់សាំង Sputnik V ខណៈបច្ចុប្បន្ននេះ មានមនុស្សប្រហែល ២០០ លាននាក់ហើយ នៅទូទាំងពិភពលោកបានចាក់វ៉ាក់សាំងមួយប្រភេទនេះ។
រុស្សី គឺជាប្រទេសដំបូងគេក្នុងពិភពលោក ដែលអនុញ្ញាតជាផ្លូវការក្នុងការផលិតវ៉ាក់សាំង ក្នុងខែសីហា ឆ្នាំ ២០២០ ហើយការយល់ព្រមភ្លាមៗរបស់រុស្ស៊ីក្នុងការដាក់ឲ្យប្រើប្រាស់វ៉ាក់សាំង Sputnik V នាពេលកន្លងមក ក៏បានរងការរិះគន់ជាច្រើនពីសំណាក់ប្រទេសនានា ដោយនៅពេលនោះ វ៉ាក់សាំងនេះត្រូវបានសាកល្បងលើមនុស្សតែពីរបីនាក់ប៉ុណ្ណោះ។ ទោះយ៉ាងណា ការសិក្សាមួយដែលត្រូវបានចេញផ្សាយនៅក្នុងទស្សនាវដ្តីវេជ្ជសាស្ត្រអង់គ្លេស ក្នុងខែកុម្ភៈ បានបង្ហាញថា Sputnik V មានប្រសិទ្ធភាព ៩១% ដែលអាចការពារកុំឱ្យធ្លាក់ខ្លួនឈឺធ្ងន់ធ្ងរ។ ជាក់ស្ដែង ប្រធានាធីបតីរុស្ស៊ី គឺលោកពូទីន ផ្ទាល់ក៏បានជ្រើសរើសការចាក់វ៉ាក់សាំង Sputnik V នេះដែរ។
អត្ថបទគួរអាន
ទន្ទឹមនេះ រុស្ស៊ីបានផ្សព្វផ្សាយយ៉ាងសកម្មពីវ៉ាក់សាំង Sputnik V ទៅជុំវិញពិភពលោក ហើយក៏មានប្រទេសជាច្រើនបានបញ្ជាទិញវ៉ាក់សាំងនេះផងដែរ ប៉ុន្តែរុស្ស៊ីហាក់មានភាពយឺតយ៉ាវ ដោយប្រឈមនឹងការរាំងស្ទះក្នុងការធ្វើដំណើរ ដ្បិតថា កន្លងមកមានប្រទេសជាច្រើនបើកឲ្យមានការធ្វើដំណើរឡើងវិញ សម្រាប់អ្នកចាក់វ៉ាក់សាំងកូវីដ១៩រួចរាល់ ប៉ុន្ដែ វ៉ាក់សាំងទាំងនោះ ត្រូវតែជាប្រភេទវ៉ាក់សាំងដែលមានការទទួលស្គាល់ដោយអង្គការសុខភាពពិភពលោក។
គិតមកទល់ពេលនេះ អង្គការសុខភាពពិភពលោក បានអនុម័តឲ្យប្រើប្រាស់វ៉ាក់សាំងកូវីដ១៩ក្នុងក្របខណ្ឌបន្ទាន់ចំនួន ៨ប្រភេទហើយ ក្នុងនោះរួមមាន វ៉ាក់សាំងអាស្រ្តាហ្សេនីការបស់អង់គ្លេស និង ឥណ្ឌា, ស៊ីណូវ៉ាក់, ស៊ីណូហ្វាម, Johnson & Jonhson, Moderna, Pfizer និងកូវ៉ាក់ស៊ីនជាដើម។
យ៉ាងណាក៏ដោយចុះ ថ្មីៗនេះអង្គការសុខភាពពិភពលោកបាននិងកំពុងពិនិត្យមើលទិន្នន័យអំពីវ៉ាក់សាំង Sputnik V របស់រុស្ស៊ីហើយ ដែលជាផ្នែកមួយនៃដំណើរការអនុម័ត។ ការអនុម័តនេះ អាចត្រួសត្រាយផ្លូវសម្រាប់ការដាក់បញ្ចូលវ៉ាក់សាំងនេះ ទៅក្នុងកម្មវិធីកូវ៉ាក់ ដែលកម្មវិធីនេះ កំពុងតែចែកចាយវ៉ាក់សាំងកូវីដ១៩ ទៅកាន់ប្រទេសជាច្រើនជុំវិញពិភពលោក៕
អត្ថបទ ស៊ើង និមល់
None
