នៅក្នុងកិច្ចប្រជុំកំពូលអាស៊ានតាមប្រព័ន្ធវីដេអូលោក លី ស៊ាន ឡុង នាយករដ្ឋមន្ត្រីសិង្ហបុរី បានថ្លែងថា សិង្ហបុរីគាំទ្រយ៉ាងពេញទំហឹងដល់កិច្ចខិតខំប្រឹងប្រែងរួមរបស់អាស៊ាន ដើម្បីរៀបចំសម្រាប់ភាពអាសន្នផ្នែកសុខភាពសាធារណៈនាពេលអនាគត ហើយសិង្ហបុរី នឹងវិភាគទានថវិកាជិត៦លានដុល្លារ ទៅឲ្យស្ថាប័នផ្គត់ផ្គង់វេជ្ជសាស្ត្របម្រុងក្នុងតំបន់អាស៊ាន។
ខណៈស្ថិតក្នុងពេលវេលាដ៏លំបាកនេះ លោក លី ស៊ានឡុង ក៏បានកត់សម្គាល់ពីតម្រូវការសកម្មភាពកាន់តែខ្លាំងឡើង លើការធ្វើសមាហរណកម្មសេដ្ឋកិច្ច និងផ្តល់សច្ចាប័នលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP)។
លោកបាននិយាយថា RCEP នឹងជំរុញទំនុកចិត្តលើពាណិជ្ជកម្ម និងការវិនិយោគក្នុងតំបន់ ហើយរួមចំណែកយ៉ាងសំខាន់ឆ្ពោះទៅរកការងើបឡើងវិញនៃសេដ្ឋកិច្ចក្រោយការរាតត្បាតនៃមេរោគនៅក្នុងតំបន់។ ជាក់ស្ដែង សិង្ហបុរីក៏ទន្ទឹងរង់ចាំការផ្តល់សច្ចាប័នយ៉ាងឆាប់រហ័សនៃ កិច្ចព្រមព្រៀង ភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ពីរដ្ឋសមាជិកអាស៊ានទាំងអស់ និងដៃគូ ដើម្បីឲ្យកិច្ចព្រមព្រៀងចូលជាធរមាននៅខែមករា ឆ្នាំ ២០២២ ដូចដែលបានគ្រោងទុក។
អត្ថបទគួរអាន
ទន្ទឹមនេះ លោកបានបន្តទៀតថា ក្រោយមើលឃើញពីសន្ទុះនៃការចាក់វ៉ាក់សាំងក្នុងតំបន់មានការកើនឡើង ដូចនេះបណ្តាប្រទេសអាស៊ានក៏ត្រូវតែបើកដំណើរការសេដ្ឋកិច្ចរបស់ខ្លួនឡើងវិញជាបណ្តើរៗផងដែរ ហើយព្រមទាំងបន្តការធ្វើដំណើរប្រកបដោយសុវត្ថិភាពឡើងវិញ។
យ៉ាងណាមិញ ក្នុងនាមជាសហប្រធាននៃអង្គការកូវ៉ាក់ (COVAX) សិង្ហបុរីបានប្តេជ្ញាយ៉ាងមុតមាំក្នុងការទទួលវ៉ាក់សាំងពហុភាគីនិយម និងការទទួលបានវ៉ាក់សាំងដោយយុត្តិធម៌ និងសមភាពសម្រាប់គ្រប់ប្រទេសទាំងអស់។ ក្នុងនោះ សិង្ហបុរីនឹងរួមចំណែកបែងចែកវ៉ាក់សាំងដល់រដ្ឋសមាជិកអាស៊ានដទៃទៀត និងលេខាធិការដ្ឋានអាស៊ាន ដើម្បីធានាបាននូវការចែកចាយវ៉ាក់សាំងយ៉ាងឆាប់រហ័ស និងសមភាពនៅក្នុងតំបន់៕
អត្ថបទ៖ ស៊ើង និមល់
None
