ប៉ុន្ដែ ថ្មីៗនេះ មន្ត្រីជាន់ខ្ពស់ក្រសួងសេដ្ឋកិច្ច បានគូសបញ្ជាក់ថា ការបញ្ចុះពន្ធលើប្រេងសាំងបន្ថែមទៀត សម្រាប់កម្ពុជានៅពេលនេះ មិនទាន់ជាជម្រើសល្អនោះទេ។ តើមកពីហេតុអ្វី?
ថ្លែងក្នុងវេទិកា ស្តីពីគ្រប់គ្រងម៉ាក្រូសេដ្ឋកិច្ច និងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០២២ ថ្មីៗនេះ ឯកឧត្តម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ ក្រសួងសេដ្ឋកិច្ច និងហិរញ្ញវត្ថុ បានគូសបញ្ជាក់ដូច្នេះ ការឡើងថ្លៃនៃប្រេងឥន្ទនៈ ពិតណាស់បាននិងកំពុងប៉ះពាល់ដល់ជីវភាពប្រជាពលរដ្ឋ ពិសេសអ្នកប្រកបរបរត់ម៉ូតូឌុប រម៉កកង់បី និងតាក់ស៊ីជាដើម ហើយមិនមែនតែកម្ពុជាទេ ដែលកំពុងប៉ះពាល់ដោយសារប្រេងសាំងឡើងថ្លៃនេះ គឺវាប៉ះពាល់នៅទូទាំងពិភពលោកទៅហើយ។ ប៉ុន្ដែ សំណួរសួរថា តើរាជរដ្ឋាភិបាលកម្ពុជា អាចនឹងមានលទ្ធភាពក្នុងការជួយឧបត្ថម្ភធន ឬបន្ថូរបន្ថយពន្ធលើប្រេងសាំង ដើម្បីឲ្យតម្លៃមានការថយចុះទាបជាងមុនដែរឬទេ? ឆ្លើយតបនឹងសំណួរនេះ ឯកឧត្តម វង្សី វិស្សុត បានពន្យល់យ៉ាងដូច្នេះថា កាលណាបញ្ចុះពន្ធ មានន័យថា ប្រាក់ចំណូលរបស់ជាតិនឹងត្រូវធ្លាក់ចុះ ដូច្នេះ រាជរដ្ឋាភិបាលមិនទាន់អាចបញ្ចុះតម្លៃពន្ធលើប្រេងឥន្ធនៈបាននោះទេ ហើយវាមិនមែនជាជម្រើសល្អសម្រាប់កម្ពុជានោះទេ ព្រោះវានឹងធ្វើឱ្យប៉ះពាល់ចំណូល និងថវិកាជាតិ សម្រាប់ទ្រទ្រង់សេដ្ឋកិច្ច ពិសេសគឺជួយទៅដល់ពលរដ្ឋក្រីក្រ ងាយរងគ្រោះដោយសារតែវិបត្តិកូវីដ១៩។
ក៏ប៉ុន្តែ រដ្ឋលេខាធិការប្រចាំការក្រសួងសេដ្ឋកិច្ចរូបនេះបានសង្កត់ធ្ងន់ថា រាជរដ្ឋាភិបាលមិនបានបណ្ដោយឱ្យតម្លៃប្រេងឥន្ធនៈ ឡើងតាមចិត្តនៅលើទីផ្សារនោះដែរ។ កន្លងមក រាជរដ្ឋាភិបាលបានកំណត់ទំហំពន្ធមួយដែលច្បាស់លាស់ ជាមូលដ្ឋាន បើទោះជាតម្លៃប្រេងឡើង ឬចុះខ្លាំង ប៉ុន្ដែ តម្លៃប្រេងលក់រាយលើទីផ្សារមិនឡើងថ្លៃខ្ពស់ខ្លាំងនោះទេ។ បន្ថែមនោះ ក្រសួងពាណិជ្ជកម្ម បានតាមដានការលក់រាយរៀងរាល់ខែ ដើម្បីកំណត់ថ្លៃប្រេងឥន្ធនៈលក់នៅតាមស្ថានីយនីមួយ សម្រាប់ប្រេងសាំងធម្មតា និងម៉ាសូត កុំឱ្យមានកេងបន្លំផ្សេងៗផងដែរ។
បើតាមឯកឧត្តម វង្សី វិស្សុត ក្នុងមួយខែៗរដ្ឋត្រូវចំណាយប្រមាណ ៣០លានដុល្លារ ដើម្បីឧបត្ថម្ភដល់អ្នកក្រីក្រ និងងាយរងគ្រោះ ដោយសារវិបត្តិកូវីដ១៩ ដូច្នេះ ការកាត់បន្ថយពន្ធលើប្រេងសាំងនៅមិនទាន់ជាជម្រើសល្អនៅឡើយ។
អត្ថបទគួរអាន
ជាមួយគ្នា មន្ត្រីតំណាងអគ្គនាយកដ្ឋាគយ និងរដ្ឋាករកម្ពុជា ក៏បានគូសបញ្ជាក់ថា តម្លៃទំនិញនាំចូលត្រូវបានគិតគូរតាមតម្លៃជាក់ស្ដែងលើទីផ្សារ ក៏ប៉ុន្តែសម្រាប់ការនាំចូលប្រេងសាំងរាជរដ្ឋាភិបាលបានគិតគូរ តាមតម្លៃមួយថេរ។ ក្នុងន័យនេះ មន្ត្រីគយបានពន្យល់ថា ទោះបីជាទំនិញនៅលើទីផ្សារអន្តរជាតិឡើងថ្លៃ ប៉ុន្តែរដ្ឋបានគិតគូរមិនដំឡើងទៅតាមតម្លៃទីផ្សារពិភពលោកនោះទេ ពោលគឺគិតពន្ធតាមតម្លៃមួយថេរ ដែលបានកំណត់។
សូមបញ្ជាក់ថា តម្លៃប្រេងលើទីផ្សារពិភពលោកនាពេលបច្ចុប្បន្នក្នុងមួយធុងបារ៉ែលឡើងដល់ជាង ៩០ដុល្លារទៅហើយ ដោយសារតែបញ្ហាភាពតានតឹងភូមិសាស្ត្រនយោបាយ ដែលបង្កជាក្ដីបារម្ភថា អាចនឹងប៉ះពាល់ដល់ខ្សែចង្វាក់ផ្គត់ប្រេងឆៅ។ បើតាមអ្នកជំនាញមួយចំនួនធ្លាប់បានលើកឡើងថា ប្រសិនបើស្ថានការវិវត្តកាន់តែអាក្រក់ទៅៗ នោះតម្លៃប្រេងឥន្ធនៈលើទីផ្សារពិភពលោកអាចបន្ដកើនឡើងថែមទៀត គឺអាចឡើងថ្លៃដល់ទៅជាង១០០ដុល្លារក្នុងមួយធុងបារ៉ែល។ តម្លៃប្រេងពិភពលោកឡើងថ្លៃ ក៏កំពុងបង្កឲ្យកើតមានអតិរផណាកើនឡើងនៅជុំវិញពិភពលោកផងដែរ៕
None
