ថ្លែងក្នុងពិធីមួយនាថ្ងៃទី១៧ ខែមិថុនា ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានគូសបញ្ជាក់ថា ដើម្បីកាត់បន្ថយការចំណាយលើតម្លៃឡូជីស្ទីក និងកាត់បន្ថយរយៈពេលក្នុងការដឹកជញ្ជូននៅកម្ពុជា ក្រសួងសាធារណការ និងដឹងជញ្ជូនបានរៀបចំផែនការមេអភិវឌ្ឍន៍លើវិស័យដឹងជញ្ជូន និងឡូជីស្ទីកនៅកម្ពុជា ដើម្បីរៀបចំធ្វើយ៉ាងណាឲ្យតម្លៃឡូជីស្ទីកមានតម្លៃថោកជាងមុន ប្រើពេលវេលាតិចជាងមុន ដែលកត្តាទាំងនេះធ្វើឲ្យកម្ពុជាអាចប្រកួតប្រជែកជាមួយប្រទេសជិតខាងក្នុងតំបន់ និងទាក់ទាញអ្នកវិនិយោគបន្ថែមទៀត មកបណ្តាក់ទុននៅកម្ពុជា ដែលអាចបង្កើតការងារដល់ប្រជាជនកម្ពុជាផងដែរ។
នៅក្នុងផែនការមេនេះដែរ ក្រសួងបានរៀបចំគម្រោងចំនួន ៣៣០គម្រោង ត្រូវការចំណាយថវិកាប្រមាណ ៥០ពាន់លានដុល្លារ ដែលត្រូវចំណាយពេល ១០ឆ្នាំ ក្នុងការអភិវឌ្ឍន៍ប្រព័ន្ធដឹកជញ្ជូន និងឡូជីស្ទីកនេះ។
អត្ថបទគួរអាន
ជាមួយគ្នានេះ ឯកឧត្តមទេសរដ្ឋមន្ត្រី ស៊ុន ចាន់ថុល បានបញ្ជាក់ផងដែរថា ដើម្បីឲ្យការដឹកទំនិញរបស់កម្ពុជាមានការដំណើរការបានល្អដោយរលូន ទាំងការដឹកទំនិញពីក្រៅប្រទេសចូលមកកម្ពុជា ក៏ដូចជាការដឹកទំនិញពីកម្ពុជាទៅក្រៅប្រទេស គឺត្រូវការប្រព័ន្ធហេដ្ឋារចនាសម្ព័ន្ធ និងប្រព័ន្ធឡូជីស្ទីកដែលដំណើរការល្អ ទើបការដឹកជញ្ជូននេះអាចមានតម្លៃសមរម្យ ដែលអាចប្រកួតប្រជែកនឹងប្រទេសជិតខាងបាន។
ជាក់ស្តែង កំពង់ផែស្វយ័តក្រុងព្រះសីហនុ កំពុងធ្វើការពង្រីកជាបន្តបន្ទាប់ ដូចជាការពង្រីកជំហានទីមួយ កំពង់ផែដែលមានជម្រៅទឹក ១៤,៥ ម៉ែត្រ គ្រោងបញ្ចប់នៅឆ្នាំ២០២៥ ខណៈជំហានទី២ កំពង់ផែដែលមានជម្រៅទឹក ១៦,៥ ម៉ែត្រ គ្រោងបញ្ចប់នៅឆ្នាំ ២០២៨ និង កំពង់ផែដែលមានជម្រៅទឹក ១៧,៥ ម៉ែត្រនឹងបញ្ចប់នៅឆ្នាំ២០២៩។
ថ្នាក់ដឹកនាំ ក្រសួងសាធារណការអះអាងទៀតថា នៅពេលកំពង់ផែទឹកជ្រៅរបស់កម្ពុជាសាងសង់រួចរាល់ ការដឹកជញ្ជូនទំនិញរបស់កម្ពុជានឹងមានភាពងាយស្រួល ដោយអាចដឹកជញ្ជូនទំនិញទៅកាន់ទីផ្សារអឺរ៉ុប អាមេរិកផ្ទាល់តែម្តង ដោយមិនចាំបាច់ឆ្លងកាត់កំពង់ផែនៅក្នុងតំបន់នោះទេ ដែលនេះជាការកាត់បន្ថយទាំងការចំណាយ និងកាត់បន្ថយពេលវេលាផងដែរ៕
None
