ទិន្នន័យពីការិយាល័យស្ថិតិទូទៅវៀតណាមដដែលនេះ បានឲ្យដឹងទៀតថា ក្នុងចំណោមអាជីវកម្មទាំងនោះ មាន៤៦.៦០០ អាជីវកម្មបានចុះបញ្ជីដើម្បីព្យួរប្រតិបត្តិការបណ្ដោះអាសន្ន ខណៈដែលមាន៣៧.៧០០ អាជីវកម្មទៀត កំពុងរង់ចាំដើម្បីបញ្ចប់នីតិវិធីព្យួរនេះ។ ទិន្នន័យបានឲ្យដឹងទៀតថា មានសហគ្រាស១៧.៥០០ បានបញ្ចប់នីតិវិធីព្យួរប្រតិបត្តិការនេះរួចហើយនៅឆ្នាំ២០២០។
ការកើនឡើងអាជីវកម្មព្យួរប្រតិបត្តិការដោយសារតែផលប៉ះពាល់អាក្រក់ដែលបង្កឡើងដោយកូវីដ-១៩ បានបំផ្លាញវិស័យសំខាន់ៗ និងប៉ះពាល់យ៉ាងធ្ងន់ធ្ងរដល់សកម្មភាពសេដ្ឋកិច្ចសង្គមទូទាំងពិភពលោក។
ចំនួនសហគ្រាស ដែលទើបបង្កើតថ្មី នៅវៀតណាមក្នុងឆ្នាំនេះ បានធ្លាក់ចុះ ២,៣% ធៀបនឹងឆ្នាំមុន ដោយមានមកនៅចំនួនត្រឹមតែ ១៣៤.៩០០ សហគ្រាស ជាមួយនឹងដើមទុនចុះបញ្ជីសរុបជាង៩៤ពាន់លានដុល្លារ កើនឡើង ២៩%។
អត្ថបទគួរអាន!
ប្រសិនបើបូកបញ្ជូលទាំង ដើមទុនដែលក្រុមហ៊ុនមានស្រាប់ ៣៩.៥០០ ក្រុមហ៊ុន ដែលបានវិនិយោគទុនបន្ថែមទៀត នោះនឹងធ្វើឲ្យដើមទុនចុះបញ្ជីសរុបដែលបានបន្ថែមក្នុងសេដ្ឋកិច្ចវៀតណាមនៅឆ្នាំនេះគឺមានដល់ប្រមាណ ២៣៧ពាន់លានដុល្លារអាមេរិក កើនឡើងជាង៣៩% ធៀបនឹងឆ្នាំមុន។
ការិយាល័យស្ថិតិទូទៅវៀតណាមបានរាយការណ៍ថា ការស្ទង់មតិលើចំណាប់អារម្មណ៍អាជីវកម្មនៅក្នុងវិស័យផលិត និងកែច្នៃ នៅក្នុងត្រីមាសទី ៤ នៅឆ្នាំ២០២០ បានរកឃើញថា មានជាង៤០% នៃសហគ្រាសគឺមានការវិវឌ្ឍខ្លួននៅក្នុងការធ្វើអាជីវកម្មរបស់ពួកគេបើធៀបនឹងត្រីមាសមុន ខណៈដែលមានជិត២៥% ប្រឈមនឹងការលំបាក និងមានជិត៣៥%ទៀត និយាយថាអាជីវកម្មពួកគេនៅតែមានស្ថិរភាព។
ជិត៤៣ភាគរយនៃក្រុមហ៊ុនដែលបានស្រង់មតិនោះ រំពឹងថា អ្វីៗនឹងប្រសើរឡើងនៅត្រីមាសទី១ឆ្នាំ២០២១ ខណៈដែលមាន១៩%រំពឹងថា នឹងមានការលំបាកថែមទៀត ហើយជាង៣៨% និយាយថា ពួកគេជឿជាក់ថាស្ថានភាពនឹងមានស្ថិរភាព។
កំណើនសេដ្ឋកិច្ចវៀតណាមនៅឆ្នាំ២០២០ មានការលូតលាស់យឺត ដោយមានអត្រាកំណើនត្រឹមតែជាង២,៩% ប៉ុណ្ណោះ ដែលវាគឺជាកំណើនទាបបំផុតមិនធ្លាប់មានក្នុង១ទសវត្សរ៍កន្លងមកនេះ ដោយសារតែរងផលប៉ះពាល់អាក្រក់ពីវិបត្តិកូវីដ-១៩ គ្រោះមហន្ដរាយធម្មជាតិ និងការជាប់គាំងនៃសេដ្ឋកិច្ចពិភពលោក។
យ៉ាងណាក៏ដោយចុះ សេដ្ឋកិច្ចវៀតណាមនៅតែស្ថិតក្នុងចំណោមប្រទេសតិចតួចប៉ុណ្ណោះ ដែលមានសេដ្ឋកិច្ចមានកំណើនវិជ្ជមាននៅក្នុងពិភពលោក ខណៈដែលមានប្រទេសជាច្រើនផ្សេងទៀតមានសេដ្ឋកិច្ចដាំក្បាលចុះ៕
None
