គិតត្រឹមថ្ងៃពុធ (ទី១៨ មីនា ២០២០) មានសណ្ឋាគារ និងរមណីយដ្ឋានប្រមាណ ១១៧ បានចុះឈ្មោះយល់ព្រមធ្វើជាតំបន់ដាក់អ្នកជំងឺឲ្យនៅដាច់ដោយឡែក ដោយឥតគិតថ្លៃ ឬដោយគិតថ្លៃ។
សណ្ឋាគារខ្លះបានព្រមព្រៀងផ្ដល់ការបញ្ចុះតម្លៃ ទាំងលើថ្លៃបន្ទប់ និងទាំងសេវា។ នៅទីក្រុងហូជីមិញ សណ្ឋាគារចំនួន ៩ បានយល់ព្រម ក្នុងនោះរាប់ទាំងសណ្ឋាគារផ្កាយ ៥ មួយ និងរមណីយដ្ឋានមួយ ដែលមានបន្ទប់សរុប ៦៤១បន្ទប់។ ទីក្រុងនេះកំពុងដាក់ជនបរទេសឲ្យនៅដាច់ដោយឡែកដោយឥតគិតថ្លៃ ប៉ុន្តែ ជនបរទេសជាច្រើនបានសុំស្នាក់នៅក្នុងសណ្ឋាគារជាជំនួសវិញ និងសុខចិត្តបង់លុយ។
នៅស្រុកសុងត្រា ខេត្តដាណាង មានសណ្ឋាគារដ៏ធំមួយ បានផ្ដល់បន្ទប់ ១២៧បន្ទប់ ក្នុងចំណោមបន្ទប់ទាំងអស់របស់ខ្លួន ឲ្យអាជ្ញាធរក្រុង ប្រើប្រាស់សម្រាប់ការដាក់មនុស្សឲ្យស្នាក់នៅដាច់ដោយឡែកពីគេ ដោយឥតគិតថ្លៃ។
គិតត្រឹមថ្ងៃព្រឹកថ្ងៃព្រហស្បតិ៍ (ទី១៩ មីនា ២០២០) វៀតណាមមានករណីសង្ស័យវីរុស កូវីដ-១៩ ចំនួន ១២២ករណី និងមានចំនួនករណីវិជ្ជមានវីរុសកូវីដ-១៩ ចំនួន ៧៦ករណី ក្នុងនោះ ១៦ករណី បានជាសះស្បើយ៕
