សារព័ត៌មាន VN Express បានស្រង់សម្ដីរបស់អ្នករកស៊ីលក់បោះដុំបន្លែផ្លែឈើ នៅក្នុងទីផ្សារប្រទេសចិន បានឲ្យដឹងថា តម្រូវការផ្លែឈើដែលមានគុណភាពខ្ពស់នៅក្នុងប្រទេសចិន កំពុងមានការកើនឡើង ប៉ុន្ដែរដ្ឋាភិបាលប្រទេសនេះ ក៏បានបង្កើនរបាំងលើការវេចខ្ចប់ និងប្រភពដើមទំនិញ ទៅលើផលិតផលនាំចូលទាំងនោះ។ ឈ្មួញបន្លែផ្លែឈើដដែលនេះ បានគូសបញ្ជាក់ទៀតថា ទីផ្សារផលិតផលរបស់គាត់បានជួបនូវលក្ខខណ្ឌតម្រូវកាន់តែខ្ពស់ជាងមុន សម្រាប់ទំនិញផ្លែឈើនាំចូលទៅប្រទេសចិន។
លោក យាន យ៉ា ស៊ាំង អគ្គលេខាធិការសមាគមពាណិជ្ជកម្មផ្លែឈើសៀងហៃ បានបញ្ជាក់ថា គុណភាព គឺជាជាបញ្ហាសម្រាប់ការផលិតរបស់វៀតណាម ដោយកន្លងមក មានករណីខ្លះ អ្នកនាំចូលបានរកឃើញថា ផ្លែឈើពីវៀតណាម មានផ្ទុកបាក់តេរីដែលបង្កគ្រោះថ្នាក់ដល់សុខភាព។
អត្ថបទទាក់ទង!
លោកសាំង បានបញ្ជាក់ទៀតថា ក្រៅពីនេះ បើទោះបីជាប្រទេសវៀតណាម មានប្រភេទផ្លែឈើត្រូវនឹងតម្រូវការទីផ្សារ និងមានទីតាំងជិតនឹងប្រទេសចិនក៏ដោយ ប៉ុន្ដែ ផ្លែឈើរបស់ប្រទេសនេះ នៅតែមានភាពប្រកួតប្រជែងតិចជាង ផ្លែឈើដែលមកពីប្រទេសដទៃទៀត ដោយសារតែ តម្លៃពលកម្មខ្ពស់ និងថ្លៃដើមដឹកជញ្ជូនថ្លៃ។
អគ្គលេខាធិការសមាគមពាណិជ្ជកម្មផ្លែឈើសៀងហៃ ដដែលនេះ បានគូសបញ្ជាក់ទៀតថា វៀតណាម ត្រូវការអភិវឌ្ឍការគ្រប់គ្រងគុណភាពឲ្យប្រសើរជាងមុន និងការចំណាយថ្លៃដើមឲ្យបាននៅកម្រិតទាប ដើម្បីអាចមានភាពប្រកួតប្រជែងនៅក្នុងការនាំចេញទៅកាន់ទីផ្សារប្រទេសចិនបាន។
អ្នកនៅក្នុងឧស្សាហកម្មនេះ បានទទួលស្គាល់ថា ការកែលម្អ សំខាន់ៗ គឺជារឿងចាំបាច់ ដើម្បីពង្រីក និងធ្វើឲ្យគុណភាពប្រសើរឡើងនៃការនាំចេញផ្លែឈើរបស់វៀតណាម ប្រកបដោយភាពប្រកួតប្រជែងខ្ពស់។
លោក ដាង ហ្វុក ង្វៀន អគ្គលេខាធិកាសមាគមបន្លែផ្លែឈើ វៀតណាម បានបញ្ជាក់ដែរថា អ្នកនាំចេញត្រូវការយ៉ាងហោចណាស់ផ្ទៃដីចម្ការដាំដំណាំផ្លែឈើ ១០ ហិកតា ដើម្បីអាចឆ្លើយតបទៅនឹងស្ដង់ដារ ការអនុវត្តកសិកម្មល្អវៀតណាម (VietGAP) ដើម្បីអាចនាំចេញទៅប្រទេសចិន ដោយគ្មានការព្រួយបារម្ភពីបញ្ហាគុណភាព។ លោកបន្ថែមថា អាជីវកម្មជាច្រើន គឺមានប្រតិបត្តិការនៅខ្នាតតូច និង និងមានការវិចខ្ចប់មិនបានល្អនៅឡើយ។
វៀតណាម បាននាំចេញផ្លែឈើ៩មុខហើយ ទៅកាន់ទីផ្សារប្រទេសចិនតាមផ្លូវការ រួមមាន ផ្លែស្រការនាគ, ឪឡឹក, គូលែន, មៀន, ចេក និងស្វាយជាដើម។
ប្រទេសចិន ក៏ជាទីផ្សារធំបំផុតមួយសម្រាប់ផលិតផល កសិកម្ម រុក្ខាប្រមាញ់, និងអាហាសមុទ្រ ដោយមានចំណែកទីផ្សារ ដល់ទៅជិត២៨% នៃ ការនាំចេញ និងមានតម្លៃជាទឹកប្រាក់នាំចេញជិត៨ពាន់៥រយលានដុល្លារអាមេរិក កាលពីឆ្នាំមុន។ នេះបើតាមរបាយការណ៍ពីគយវៀតណាម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
