ប្រទេសប្រេស៊ីល មានគោច្រើនរហូតដល់ទៅរាប់រយលានក្បាលឯណោះ ប៉ុន្តែក្នុងនោះមានគោញីពេញវ័យក្រមុំមួយក្បាលឈ្មោះ ម៉ារ៉ា ម៉ូវ៉េ (Mara Moveis) ពិសេសអស្ចារ្យជាងគេបំផុត ដែលរស់នៅបែបអភិជនពិតៗ ដោយមានកាមេរ៉ាសុវត្ថិភាពគ្រប់ជ្រុងចាំឃ្លាំមើល មានបសុពេទ្យ ឬពេទ្យសត្វផ្ទាល់ខ្លួន និងថែមទាំងមានអង្គរក្សប្រដាប់អាវុធចាំការពារសុវត្ថិភាព២៤ម៉ោងទៀតផង ហើយអ្នកស្រុករួមទាំងអ្នកជំនាញកសិកម្ម និងនិស្សិតពេទ្យសត្វផងបានផ្អើលទៅមើលវាសឹងតែមិនដែលលស់ថ្ងៃ។ នេះបើយោងតាមការចុះផ្សាយរបស់សារព័ត៌មាន AP។
ម៉ារ៉ា ម៉ូវ៉េ (Mara Moveis) ដែលជាពូជគោ វីយ៉ាទីណា-១៩ (Viatina-19) និងដែលមានសម្បុរសក្បុសល្អល្អះដាច់គេនេះ លក់បានថ្លៃខ្ពស់កប់ពពករហូតដល់ទៅ៤លានដុល្លារអាម៉េរិក និងត្រូវបានកំណត់ត្រាឯតទគ្គកម្មហ្គីណេស ទទួលស្គាល់ជាផ្លូវការថា ជាគោដែលមានតម្លៃថ្លៃបំផុតរបស់ពិភពលោក។
សូមបញ្ជាក់ថា គោញីអាយុ៣ឆ្នាំមួយក្បាលនេះលក់បានតម្លៃខ្ពស់ជាង៣ដង បើធៀបនឹងតម្លៃគោដែលគ្រងតំណែងជាម្ចាស់កំណត់ត្រាចាស់ ហើយវាមានទម្ងន់រហូតដល់ទៅជាង១តោនឯណោះ ដែលធ្ងន់ជាងគោពូជពេញវ័យប្រភេទជាមួយវារហូតដល់ទៅ២ដង។
លោក ណី ប៉េរេរ៉ា (Ney Pereira) ដែលជាម្ចាស់របស់គោនេះបាននិយាយថា កសិដ្ឋានចិញ្ចឹមគោរបស់លោកចិញ្ចឹមគោពូជល្អៗទាំងនេះសម្រាប់បង្កាត់ពូជ គឺមិនមែនចិញ្ចឹមយកសាច់នោះទេ។ លោកបានអះអាងថា គោញី ម៉ារ៉ា ម៉ូវ៉េ (Mara Moveis) បានឈ្នះពានជាបន្តបន្ទាប់ដោយក្នុងនោះរួមមានទាំងពានប្រឡងបវរកញ្ញាគោ Miss South America និងពានប្រឡងបវរកញ្ញាគោពិភពលោក Champion of the World ផងដែរ។
កូនស្រីរបស់ម្ចាស់កសិដ្ឋានខាងលើនេះឈ្មោះ ឡូរ៉ានី ម៉ាទីន (Lorrany Martins) បាននិយាយថា ម៉ារ៉ា ម៉ូវ៉េ (Mara Moveis) គឺជាគោពូជដែលមានលក្ខណៈពិសេសរកកន្លែងទាស់គ្មាន មិនថាមាឌ កម្ពស់ សម្បុរ និងរូបឆោមដ៏ទាក់ទាញរបស់វាដែលក្រុមអ្នកបង្កាត់ជញ្ជក់មាត់ចង់បានវាគ្រប់ៗគ្នា៕
ដោយ: តែម សុខុម
