បន្ទាប់ពីសហគមកសិកម្មស្នួលទ្រេត ទទួលបានវិញ្ញាប័នបត្របញ្ជាក់ពីលក្ខខណ្ឌភូតគាមអនាម័យ ពីក្រសួងកសិកម្ម រុក្ខាប្រមាញ់ និងនេសាទ និងបាននាំចេញស្លឹកគ្រៃពូជ«ភ្លុកដំរី» ទៅទីផ្សារប្រទេសថៃ ថ្មីៗសហគមន៍មួយនេះ ក៏កំពុងត្រៀមខ្លួនក្នុងការនាំចេញគល់ស្លឹកគ្រៃភ្លុកដំរី ប្រមាណ ២១តោន ទៅទីផ្សារប្រទេសកាណាដាផងដែរ។
សព្វថ្ងៃ កសិករនៅតាមបណ្ដាខេត្តជាច្រើន កំពុងតែមមាញឹក ដាំដុះដំណាំស្លឹកគ្រៃប្រភេទភ្លុកដំរី ព្រោះស្លឹកគ្រៃប្រភេទនេះ កំពុងមានតម្រូវការខ្ពស់លើទីផ្សារ ទាំងទីផ្សារក្នុងស្រុក និងទីផ្សារនាំចេញ។ ក៏ប៉ុន្តែ បើទោះជាបែបនេះក្ដី នារយៈពេលចុងក្រោយនេះ ដំណើរការនៃការនាំចេញស្លឹកគ្រៃភ្លុកដំរី ទៅទីផ្សារប្រទេសថៃ ហាក់មានផងរំខានដោយសារតែផ្ទុះឡើងនៃជំងឺកូវីដ១៩ បំប្លែងថ្មី អូមីក្រុង ដែលធ្វើឲ្យសហគមន៍មិនអាចនាំចេញស្លឹកគ្រៃបានច្រើនដូចកាលពីមុន។
លោក នាក់ ភា ប្រធានសហគមន៍ស្នួលទ្រេត បានអះអាងថា សហគមន៍មានផលលំបាកបន្តិចបន្តួច ព្រោះភាគីថៃ រឹតត្បិតការនាំចូល ប៉ុន្ដែសហគមន៍ក៏បានបង្វែទិសដៅនាំចេញទៅកាន់ទីផ្សារកាណាដាវិញ។
ប្រធានសហគមន៍រូបនេះ បានគូសបញ្ជាក់ថា សព្វថ្ងៃនេះ សហគមន៍កំពុងមមាញឹកក្នុងការផលិតគល់ស្លឹកគ្រៃ«ភ្លុកដំរី» ដើម្បីនាំចេញទៅប្រទេសកាណាដា បន្ទាប់ពីសហគមន៍ជួបផលលំបាកក្នុងការនាំចេញទៅប្រទេសថៃ ដោយសារនៅប្រទេសថៃ កំពុងផ្ទុះខ្លាំងនូវជំងឺកូវីដ១៩ បំប្លែងថ្មី អូមីក្រុង។ បើតាមការអះអាងរបស់ លោក នាក់ ភា បើទោះជាគល់ស្លឹកគ្រៃ មានទីផ្សារទូលាយ តែសម្រាប់តម្លៃ សម្រាប់នាំចេញទៅកាណាដាវិញ ហាក់មិនខុសគ្នាប៉ុន្មានពីការនាំចេញទៅប្រទេសថៃនោះទេ ដោយលោកបានបន្តថា តម្លៃនេះ ហាក់មិនទាន់អាចឲ្យកសិករ និងលោកដែលជាអ្នកនាំចេញចំណេញនៅឡើយ។ ខណៈតម្លៃគល់ស្លឹកគ្រៃ សម្រាប់នាំចេញទៅទីផ្សារកាណាដា មានតម្លៃ ១ ៨០០រៀល ក្នុងមួយគីឡូក្រាម។ ចំណែក តម្លៃគល់ស្លឹកគ្រៃ ដែលសហគមន៍ទិញពីកសិករ ក្នុងតម្លៃ ១ ២០០រៀល ក្នុងមួយគីឡូក្រាម ដូច្នេះ តម្លៃនេះហាក់មិនទាន់ប្រសើរនៅឡើយ ព្រោះត្រូវចំណាយលើថ្លៃដើមខ្ពស់។
អត្ថបទគួរអាន
ក៏ប៉ុន្តែ បើទោះជាបែបនេះ ក៏ដោយ លោក នាក់ ភា ប្រធានសហគមន៍កសិកម្មស្នួលទ្រេត នៅតែបង្ហាញនូវសុទិដ្ឋិនិយម នៅក្នុងផលិតកម្មដំណាំស្លឹកគ្រៃពូជភ្លុកដំរី ដោយសារតែជាដំណាំនេះ ជាប្រភេទងាយស្រួលដាំដុះ ងាយថែទាំ ព្រមទាំងមានទីផ្សារល្អផងដែរ។ ជាមួយគ្នានោះ លោក នាក់ ភា ក៏បានប្ដេជ្ញាផងដែរថា សហគមន៍នឹងបន្តស្វែងរកទីផ្សារបន្ថែម ដើម្បីអាចឲ្យកសិករទទួលបានតម្លៃកាន់តែប្រសើរ។ បើតាមលោក នាក់ ភា កន្លងមក សហគមន៍ប្រមូលទិញស្លឹកគ្រៃពីកសិករ ដើម្បីនាំចេញទៅប្រទេសថៃ ដោយសម្រាប់ស្លឹកគ្រៃស្ងួត ក្នុងតម្លៃ ១ ៤០០រៀល ក្នុងមួយគីឡូក្រាម។ ចំណែក ស្លឹកគ្រៃសើម ក្នុងតម្លៃ ២៥០រៀល ក្នុងមួយគីឡូក្រាម។ រីឯ ទីផ្សារកាណាដាវិញ គល់ស្លឹកគ្រៃភ្លុកដំរី មានតម្លៃ ១ ៩០០រៀល ក្នុងគីឡូក្រាម។
បច្ចុប្បន្ន មានកសិករសរុបប្រមាណ ១០០គ្រួលារ កំពុងដាំដុះស្លឹកគ្រៃពូជភ្លុកដំរី លើផ្ទៃដីសរុប ប្រមាណ ២០០ហិកតា សម្រាប់ផលិតស្លឹកគ្រៃក្រៀម និងគល់ស្លឹកគ្រៃ នៅក្នុងសហគមន៍កសិកម្មមានជ័យ ស្នួលទ្រេត នៅក្នុងខេត្តបន្ទាយមានជ័យ៕
None
