ក្នុងកិច្ចប្រជុំអង្គការពាណិជ្ជកម្មពិភពលោកដែលធ្វើឡើងនៅទីក្រុងសឺណេវថ្មីៗនេះ ប្រទេសចិនត្រូវបានរងការចោទប្រកាន់ថា បានលាងឈ្មោះពីបទឧក្រិដពាណិជ្ជកម្ម និងគំរាមកំហែងផ្នែកសេដ្ឋកិច្ច ខណៈដែលប្រទេសលោកខាងលិចជាច្រើន ដែលជាសមាជិកអង្គការពាណិជ្ជកម្មពិភពលោក ក៏បានចេញនិយាយវាយប្រហារគោលនយោបាយពាណិជ្ជកម្មរបស់ចិនខ្លាំងៗផងដែរ។
ក៏ប៉ុន្ដែ ចិននៅតែបញ្ជាក់ជំហរបស់ខ្លួនថា គោលយោបាយពាណិជ្ជកម្មរបស់ខ្លួន គឺមិនមានអ្វីផ្ទុយនឹងច្បាប់អង្គការពាណិជ្ជកម្មពិភពលោកនោះឡើយ ហើយចុងក្រោយនេះ ទីក្រុងប៉េកាំងតាមរយៈ លោក វ៉ាង ស៊ូវិន (Wang Showen) រដ្ឋលេខាធិការនៃក្រសួងពាណិជ្ជកម្មចិន បានចេញមកប្រតិកម្ម ការរិះគន់និងទាមទាររបស់លោកខាងលិចមកលើចិន អំឡុងកិច្ចប្រជុំត្រួតពិនិត្យគោលនយោបាយពាណិជ្ជកម្មលើកទី៨ ថា ជារឿងមិនសមហេតុផល។ មិនសមហេតុផល ក៏ដោយសារតែបញ្ហាដែលលោកខាងលិចបានរិះគន់ និងទាមទារចិននៅពេលនោះ គឺមិនបានស្ថិតនៅក្រោមវិសាលភាពរបស់ WTO នោះទេ។
ទោះបីជាយ៉ាងណាក៏ដោយ លោកវ៉ាង ស៊ូវិន បាននិយាយថា ទីក្រុងប៉េកាំងនឹងយកចិត្តទុកដាក់ខ្លាំងចំពោះការរិះគន់ទាំងអស់ដែលស្ថិតនៅក្នុងដែនវិសាលភាពរបស់ WTO ដើម្បីបំពេញកាតព្វកិច្ចរបស់ខ្លួនក្នុងនាមជាសមាជិករបស់អង្គការពិភពលោកមួយនេះ។
គួររំឭកថា សហរដ្ឋអាមេរិក សហភាពអឺរ៉ុប ជប៉ុន អង់គ្លេស អូស្ត្រាលី និងកាណាដា សុទ្ធតែបានរិះគន់ខ្លាំងៗលើការធ្វើពាណិជ្ជកម្មរបស់ប្រទេសចិន ក្នុងកិច្ចប្រជុំអង្គការពាណិជ្ជកម្មពិភពលោកកាលថ្មីៗនេះចុងក្រោយនេះ អំពីការត្រួតពិនិត្យគោលនយោបាយពាណិជ្ជកម្មលើកទី៨របស់ក្រុងប៉េកាំង ដោយបាននិយាយថា ចិនអនុវត្តពាណិជ្ជកម្មមិនយុត្តិធម៌ មិនស្មើភាព និងបានអនុវត្តការដាក់សម្ពាធសេដ្ឋកិច្ចផងដែរ៕
