ធនាគារអេស៊ីលីដា កំពុងត្រៀមខ្លួនរួចជាច្រើនក្នុងការរីកចម្រើន ជាមួយនឹងការស្ទុះងើបឡើងនៃសេដ្ឋកិច្ចកម្ពុជា។ តួយ៉ាង ការព្យាកររបស់ធនាគារពិភពលោកថា សេដ្ឋកិច្ចកម្ពុជានឹងមានកំណើន២,២% នៅឆ្នាំ២០២១។ យ៉ាងណាមិញ បើតាមថ្នាក់ដឹកនាំធនាគារ អេស៊ីលីដាអះអាងថា នៅ៩ខែក្នុងឆ្នាំ២០២១ អេស៊ីលីដា ទទួលបានប្រាក់បញ្ញើពីអតិថិនជនមានកំណើនជាង១៨% ខណៈសមតុល្យឥណទានមានកំណើនជាង១២%។
ក្រោមើលឃើញពីសន្ទុះនៃកំណើនសេដ្ឋកិច្ចកម្ពុជាដែលបានព្យាករដោយស្ថាប័នអន្តរជាតិថ្មីៗនេះ ធនាគារអេស៊ីលីដា ដែលជាធនាគារពាណិជ្ជកម្មដ៏ធំមួយនៅកម្ពុជាបានសម្រេចខ្ចីថវិកាពីធនាគារអន្តរជាតិចំនួន១០០លានដុល្លារបន្ថេមទៀត ដើម្បីពង្រីកកញ្ចប់មូលនិធិដើមទុនសម្រាប់ត្រៀមផ្តល់ឥណទានរយៈពេលវែងជូនសហគ្រាសធនតូច និង មធ្យម ដែលរំពឹងនឹងមានការកើនឡើងខ្ពស់នៅឆ្នាំ២០២២ខាងមុខ។
លោកបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដារ បានបញ្ជាក់ប្រាប់ខេមបូណូមីស ថា ការពង្រីកកញ្ចប់មូលនិធិដើមទុនរយៈពេលវែងនេះ គឺដើម្បីត្រៀមឆ្លើយតបនឹងកំណើនឥណទានរបស់វិស័យសហគ្រាសខ្នាត និង មធ្យម នៅកម្ពុជា ក៏ដូចជាគាំទ្រយុទ្ធសាស្ត្ររីកចម្រើន និងការធ្វើពិពិធកម្មប្រភពទុនឲ្យស្របតាមផែនការរបស់ធនាគារអេស៊ីលីដារ។
សម្រាប់ លោកបណ្ឌិត អ៊ិន ចាន់នី ការទទួលឥណទានពីធនាគារបរទេសបន្ថែមនៅពេលនេះ គឺជាការត្រៀមខ្លួនទុកមុន ដើម្បីត្រៀមឆ្លើយតបឲ្យស្របតាមការរីកចម្រើនរបស់សេដ្ឋកិច្ចកម្ពុជា ដែលធនាគារពិភពលោកព្យាករណ៍ថា នឹងមានកំណើន២,២%នៅឆ្នាំ២០២១ និង មានកំណើនលើសនេះនៅឆ្នាំ២០២២។
អត្ថបទទាក់ទង
បើតាមលោកបណ្ឌិត អ៊ិន ចាន់នី នៅឆ្នាំ២០២១ ធនាគារ អេស៊ីលីដា បានត្រៀមកញ្ចប់ថវិកាជាង ២០០លានដុល្លារអាមេរិក ដើម្បីផ្តល់ឥណទានជូនសហគ្រាសធនតូច និងមធ្យមនៅទូទាំងប្រទេស។ នៅឆ្នាំ២០២២ ធនាគារអេស៊ីលីដារ នឹងបង្កើនកញ្ចប់ឥណទានសម្រាប់វិស័យ SMEs រហូតដល់ទៅជាង៤០០លានដុល្លារអាមេរិក។
ទោះបីការឆ្លងរាតត្បាត នៃជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ បានធ្វើឲ្យប៉ះពាល់ដល់វិស័យជាច្រើននៅកម្ពុជាក៏ដោយ ក៏ប៉ុន្តែសម្រាប់វិស័យធនាគារ និង ហិរញ្ញវត្ថុ ហាក់មិនសូវរងផលប៉ះពាល់នោះទេ ពោលគឺប្រតិបត្តិការក្នុងការផ្តល់ឥណទាន និង ទទួលប្រាក់បញ្ញើពីអតិថិជន នៅតែមានដំណើរការល្អប្រសើរ។ បើតាមលោកបណ្ឌិត អ៊ិន ចាន់នី នៅរយៈពេល ៩ខែក្នុងឆ្នាំ២០២១ ធនាគារអេស៊ីលីដារ ទទួលបានប្រាក់បញ្ញើពីអតិថិជនមានកំណើនជាង១៨% ដែលទំហំទឹកប្រាក់ប្រមាណ ៨១៣ លានដុល្លារអាមេរិក ខណៈសមតុល្យឥណទាន មានកំណើនជាង១២% ដែលគិតជាទឹកប្រាក់មានទំហំជាង៥៣២លានដុល្លារអាមេរិក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
