តាមរយៈយន្តការនេះថ្នាក់ដឹកនាំនិយ័តករបរធនបាលកិច្ចជឿជាក់ថា វានឹងរួមចំណែកជួយទាក់ទាញ និងបង្កើនទំនុកចិត្តដល់វិនិយោគិនជាតិ និងអន្តរជាតិឲ្យបោះទុនវិនិយោគនៅកម្ពុជាកាន់តែច្រើន ក្រោមការធានាហានិភ័យពីយន្តការនេះ។ ការដាក់ឲ្យដំណើរការយន្តការនេះ ក៏ជាការធ្វើពិពិធកម្មមួយដើម្បីឆ្លើយតបនឹងការរីកចម្រើននៃសេដ្ឋកិច្ចកម្ពុជា និងបច្ចេកវិទ្យាក្នុងវិស័យហិរញ្ញវត្ថុផងដែរ។
ឯកឧត្តម សុខ ដារ៉ា អគ្គនាយកនិយ័តករបរធនបាលកិច្ចកម្ពុជាបានគូសបញ្ជាក់ថា វិស័យបរធនបាលកិច្ចគឺមានវិសាលភាពទូលំទូលាយនិងមានតួនាទីយ៉ាងសំខាន់ក្នុងការរួមចំណែកជួយអភិវឌ្ឍន៍សង្គមនិងសេដ្ឋកិច្ចកម្ពុជា។ ព្រោះវិស័យនេះមានវិសាលភាពគ្របដណ្តប់ស្ទើរគ្រប់វិស័យទាំងវិស័យធនាគារ និងមិនមែនធនាគារ ដូចជាវិស័យធានារ៉ាប់រង មូលបត្រ អចលនទ្រព្យ សេដ្ឋកិច្ច និងសង្គមជាច្រើនទៀត។
ឯកឧត្តម បានបន្តថា វិស័យបរធនបាលកិច្ចនឹងដើរតួនាទីជាយន្តការធនា ដែលមានប្រតិបត្តិការស្របតាមផ្លូវច្បាប់ត្រឹមត្រូវក្នុងការគ្រប់គ្រង បែងចែក និងថែរក្សាទ្រព្យសម្បត្តិរបស់អ្នកផ្តល់ ដើម្បីប្រើប្រាស់ជាប្រយោជន៍ដល់អ្នកទទួលផលប្រយោជន៍ពីប្រតិបត្តិការនេះ ឬហៅថាអត្ថគាហកៈ។ បន្ថែមលើនេះ វានឹងដើរតួនាទីជាថ្នាលបង្កើត និងបង្កើនទំនុកចិត្តរវាងភាគីពាក់ព័ន្ធក្នុងវិស័យបរធនបាលកិច្ច។
អ្នកជំនាញរូបនេះ រំពឹងថា តាមរយៈយន្តការនេះវាមិនត្រឹមតែជួយកាត់បន្ថយហានិភ័យប៉ុណ្ណោះទេ តែវានឹងរួមចំណែកក្នុងការជួយកៀរគរទុន និងបង្កើនទំនុកចិត្តវិនិយោគិនបរទេស ឲ្យកាន់តែមានភាពជឿជាក់ក្នុងការបោះទុនវិនិយោគនៅកម្ពុជា។ លើសពីនេះ វាក៏នឹងជួយបង្កើនប្រាក់ចំណូលជូនរដ្ឋផងដែរ។
អត្ថបទគួរអាន
សម្រាប់ឯកឧត្តម សុខ ដារ៉ា វិស័យបរធនបាលកិច្ចមិនត្រឹមតែជួយបង្កើត និងបង្កើនទំនុកចិត្តដល់វិនិយោគិនប៉ុណ្ណោះទេ តែវាជាយន្តការតាមដានមួយដ៏មានប្រសិទ្ធភាពហើយភាគីពាក់ព័ន្ធដែលប្រើប្រាស់យន្តការនេះសុទ្ធតែទទួលបាននូវអត្ថប្រយោជន៍រៀងៗខ្លួន។ ម្យ៉ាងវិញទៀត ការដាក់ឲ្យប្រើប្រាស់យន្តការនេះ គឺជាការធ្វើពិពិធកម្ម ដើម្បីឆ្លើយតបនឹងការរីកចម្រើននៃវិស័យហិរញ្ញវត្ថុ ការរីកចម្រើននៃប្រព័ន្ធបច្ចេកវិទ្យា និងការរីកចម្រើននៃសេដ្ឋកិច្ចកម្ពុជា ក៏ដូចជាឆ្លើយតបនឹងនិន្នាការអភិវឌ្ឍន៍ហិរញ្ញវត្ថុ សេដ្ឋកិច្ច និងសង្គមក្នុងតំបន់ និងលើពិភពលោក។
វិស័យបរធនបាលកិច្ច គឺជាយន្តការផ្តល់មូលធិនិ ឬមូលធនពីអ្នកមានទ្រព្យមកឲ្យអ្នកដែលមានចំណេះជំនាញ ឬហៅថាបរធនបាល ឲ្យគ្រប់គ្រង ចាត់ចែង មើលថែនិងប្រើប្រាស់ ដើម្បីផ្តល់ជាប្រយោជន៍ដល់អ្នកទទួលផលប្រយោជន៍ពីប្រតិបត្តិការនេះ។ បើតាមការបញ្ជាក់របស់ ឯកឧត្តម សុខ ដារ៉ា យន្តការនេះបានដាក់ឲ្យប្រើប្រាស់តាំងពីឆ្នាំ២០០៨ ដោយបានឆ្លងកាត់ដំណាក់កាលដាក់ឲ្យគ្រប់គ្រងបណ្តោះអាសន្ន ដំណាក់កាលពង្រីកវិសាលភាព និងពង្រឹងការគ្រប់គ្រង និងដំណាក់កាលសមាហរណកម្ម និងនិយ័តកម្ម។
អគ្គនាយកនិយ័តករបរធនបាលកិច្ចរូបនេះ អះអាងថា មកទល់ពេលនេះ កម្ពុជា មានបរធនបាលគ្រប់ប្រភេទរួមមានបរធនបាលកិច្ចហិរញ្ញវត្ថុ បរធនបាលកិច្ចសាធារណៈ បរធនបាលកិច្ចពាណិជ្ជកម្ម បរធនបាលកិច្ចបុគ្គល និងបរធរបាលកិច្ចផ្សេងទៀត។ បច្ចុប្បន្ននិយ័តករបរធនបាលកិច្ចទទួលបានបរធនបាលចំនួន១៧បានចុះបញ្ជី ដែលមានទំហំបរធនសរុប២៥៦លានដុល្លារអាមេរិក៕
None
