តម្លៃប្រេងឆៅអាមេរិក West Texas កើនតម្លៃដល់ទៅ ៧២ដុល្លារ ៨៤សេន ក្នុង១ធុងប៉ារ៉ែល។ ដោយឡែកប្រេងឆៅ របស់អង់គ្លេសវិញ ក៏មានការឡើងថ្លៃ ៧៦ដុល្លារ២២សេន។
តម្លៃប្រេងឆៅឡើងថ្លៃវិញ ក្រោយពេលដែលក្រុមហ៊ុនផលិតវ៉ាក់សាំងអាមេរិកដ៏ធំ Pfizer BioNTech បានប្រកាសថា ការប្រើប្រាស់វ៉ាក់សាំងរបស់ខ្លួនក្នុងដូសទី៣ ឬដូសជំរុញ មានប្រសិទ្ធិភាពទប់ទល់នឹងកូវីដ១៩បំប្លែងខ្លួនថ្មី អូមីក្រុង។
លើសពីនេះ អ្នកជំនាញក្រុមហ៊ុន Pfizer ថែមទាំងបានអះអាងថា អ្នកដែលបានចាក់វ៉ាក់សាំងចំនួន ២ ដូសអាចការពារប្រឆាំងនឹងជំងឺធ្ងន់ធ្ងរពីមេរោគកូវីដ១៩ដើមបាន ប៉ុន្តែសម្រាប់មេរោគ អូមីក្រុង ការចាក់ ២ ដូស អាចការពារបានតែមួយផ្នែកប៉ុណ្ណោះ។ តែយ៉ាងណាមិញ តាមការធ្វើតេស្តចុងក្រោយនេះ បានឱ្យដឹងថា មេរោគ អូមីក្រុង ត្រូវបានបន្សាបយ៉ាងមានប្រសិទ្ធភាព តាមរយៈការចាក់ដូសទី៣ ដោយវានឹងជួយការពារការឆ្លងមេរោគ បំប្លែងថ្មីនេះ។
គួរជម្រាបថា ទោះបីប្រេងឆៅកើនតម្លៃបន្តិចវិញក្តី ប៉ុន្តែវត្តមានមេរោគបំប្លែងថ្មីនេះ បានធ្វើឲ្យតម្លៃប្រេងឆៅធ្លាក់ចុះទាបនៅឡើយ បើធៀបនឹងពេលមិនទាន់មានវត្តមាននៃមេរោគបំប្លែងថ្មី អូមីក្រុងនេះ ហើយក្ដីបារម្ភក៏មានកាន់តែខ្លាំងឡើងផងដែរ ដោយក្នុងនោះ ប្រទេសអ្នកប្រើប្រាស់ប្រេងធំៗ កំពុងបារម្ភពីការផ្គត់ផ្គង់ប្រេងអាចនឹងមានលើសតម្រូវការនៅក្នុងត្រីមាសទី១នៅឆ្នាំក្រោយនេះ។
អត្ថបទគួរអាន
សូមបញ្ជាក់ថា តម្លៃប្រេងឆៅពិភពលោកធ្លាក់ចុះនេះ កើតឡើងនៅក្រោយពេលដែលប្រទេសអ្នកផលិតប្រេងធំៗ បានព្រមព្រៀងគ្នាក្នុងការបញ្ចេញស្ដុកប្រេងឆៅ ដែលខ្លួនបម្រុងទុកទៅលើទីផ្សារផងដែរ។ ក្នុងនោះ អាមេរិកបានប្រកាសនឹងបញ្ចេញស្ដុកប្រេងបម្រុងដល់ទៅ ៥០លានបារែលឯណោះ ដើម្បីធ្វើយ៉ាងណាឲ្យតម្លៃប្រេងនៅលើទីផ្សារមានការធ្លាក់ចុះទាបមកវិញ៕
None
