ជំនួបនេះត្រូវបានគេមើលឃើញថា អាចជាការបើកផ្លូវសម្រាប់ជំនួបទល់មុខផ្ទាល់រវាងលោកចូ បៃដិន និងស៊ី ជិនពីងនៅឯកិច្ចប្រជុំកំពូល APECក្នុងខែវិច្ឆិកាខាងមុខ។ នេះបើតាមការចុះផ្សាយដោយសារព័ត៌មានអន្តរជាតិធំៗ។
យោងតាមសេចក្តីថ្លែងការណ៍ដាច់ដោយឡែកពីគ្នាពីសេតវិមាន និងក្រសួងការបរទេសចិន ជំនួបនោះបានធ្វើឡើងកាលពីថ្ងៃ១៦ និង១៧ អស់រយៈពេលជាង ១២ម៉ោង នៅក្នុងប្រទេសម៉ាលតា។ មន្ត្រីទាំងពីររូបបានពិភាក្សា«ត្រង់ទៅត្រង់មក មានអត្ថន័យ និងប្រកបដោយការស្ថាបនា»។
សហរដ្ឋអាមេរិកបានប្រាប់ចិនឱ្យធ្វើការជាមួយគ្នាលើបញ្ញាសិប្បនិម្មិត បញ្ហាអាកាសធាតុ និងការប្រឆាំងជួញដូរគ្រឿងញៀន។ ក្តីបារម្ភចំពោះការគាំទ្ររបស់ចិនទៅលើសង្គ្រាមរុស្ស៊ី និងការគំរាមកំហែងយាយីពីសំណាក់យោធាចិនលើកោះតៃវ៉ាន់ ក៏ជាអ្វីដែលលោក ស៊ូលីវ៉ាន់ ប្រាប់ទៅកាន់លោកវ៉ាងដែរ។ ដោយឡែក ភាគីចិនវិញបានរំលឹកអាមេរិកឡើងវិញថា «បញ្ហាសំណុំរឿងកោះតៃវ៉ាន់ជាបន្ទាត់ក្រហមនៃទំនាក់ទំនងចិន-អាមេរិក»។ នេះបើតាមសេចក្តីថ្លែងការណ៍របស់ក្រសួងការបរទេសចិន។
អត្ថបទគួរអាន
ទោះជាយ៉ាងណា ក្រោយកិច្ចប្រជុំពីរថ្ងៃនោះ មន្ត្រីអាមេរិកថា «លទ្ធភាពនៃការបើកបណ្តាញទំនាក់ទំនងយោធា និងយោធាឡើងវិញ នៃប្រទេសទាំងពីរ គឺមានតិចតួចណាស់»។ បណ្តាញយោធាប្រទេសមហាអំណាចទាំងពីរនេះ ត្រូវបានបិទ បន្ទាប់ទីក្រុងប៉េកាំងខឹងសម្បារនឹងដំណើរទស្សនកិច្ចរបស់លោកស្រីផេឡូស៊ី ទៅកាន់កោះតៃវ៉ាន់កាលពីឆ្នាំមុន។ យ៉ាងណាក្តី សេតវិមានបានស្នើដោយភ្ជាប់នឹងជំនួបរវាងលោកស៊ូលីវ៉ាន់ និងលោកវ៉ាង នេះថា ប្រទេសទាំងពីរគួរតែមាន កិច្ចប្រជុំកម្រិតខ្ពស់បែបនេះ ឱ្យបានច្រើន ដើម្បីរក្សាបណ្តាញបើកចំហរនឹងគ្នានាពេលខាងមុខទៀត។
គួរជម្រាបថា នៅជំនួបG20ក្នុងប្រទេសឥណ្ឌាកាលពីដើមខែកញ្ញានេះ លោកចូ បៃដិន ប្រធានាធិបតីអាមេរិកបានអះអាងថា «លោកមានការសោកស្តាយយដែលមិនបានជួបលោកស៊ី ជីនពីង»។ ប្រធានាធិបតីចិនស៊ី ជិនពីង ដែលត្រូវរំពឹងថា នឹងមកចូលរួមកិច្ចប្រជុំG20 បែរជាសម្រេចមិនមកវិញ ដែលធ្វើឱ្យការប្រឹងប្រែងសម្រួលការបើកផ្លូវជាច្រើនខែប្រែជាអាសារបង់។ គិតត្រឹមឆ្នាំនេះ មន្ត្រីកំពូលៗអាមេរិកដូចជា រដ្ឋមន្ត្រីការបរទេសប្លីនខេន រដ្ឋមន្ត្រីពាណិជ្ជកម្មលោកស្រីរៃម៉ុនដូ រដ្ឋមន្ត្រីហិរញ្ញវត្ថុលោកស្រីយ៉េលេន និងតំណាងការទូតអាកាសធាតុលោកចន ខើរិ សុទ្ធតែបានទៅបំពេញទស្សនកិច្ចនៅប្រទេសចិន។ ក៏ប៉ុន្តែមិនទាន់មានមន្ត្រីជាន់ខ្ពស់ចិនណាម្នាក់ជាន់ដីសហរដ្ឋអាមេរិកនៅឡើយទេ ក្រោយភាពតានតឹងបាញ់ទម្លាក់បាឡុងចារកម្ម។ លោកបៃដិន និងស៊ី បានជួបគ្នាផ្ទាល់នៅចុងក្រោយបង្អស់ក្នុងជំនួបG20 កោះបាលី ប្រទេសឥណ្ឌូនេស៊ីឆ្នាំមុន។
