លោក ត្រាំ មានមហិច្ឆតាពង្រីកវត្តមានយោធាអាម៉េរិកលើ​កោះ ហ្គ្រីនលែន ខណៈកិច្ចព្រមព្រៀងសន្តិសុខជាមួយដាណឺម៉ាកកំពុងកៀកដល់ការចុះហត្ថលេខា

លោក ដូណាល់ ត្រាំ បានអះអាងថា កិច្ចព្រមព្រៀងសន្តិសុខរវាង​អាម៉េរិក និងដាណឺម៉ាកនឹងផ្តល់​ឱ្យអាម៉េរិកនូវការគ្រប់គ្រងសន្តិសុខជាអចិន្ត្រៃយ៍ និងអនុញ្ញាតឱ្យពង្រីកវត្តមានយោធា​របស់ខ្លួន​នៅ​លើ Greenland។

ទោះជាយ៉ាងណា​ប្រទេសដាណឺម៉ាក និងកោះ Greenland បានបញ្ជាក់ថា កិច្ចព្រមព្រៀងនេះបានទទួលស្គាល់អធិបតេយ្យភាព និងបូរណភាពទឹកដីរបស់ដាណឺម៉ាក ព្រមទាំងសិទ្ធិកំណត់អនាគតរបស់ប្រជាជនកោះ Greenland។ កិច្ចព្រមព្រៀង​នេះ​ត្រូវបានគេរំពឹងថា នឹងចុះហត្ថលេខានៅសប្តាហ៍ក្រោយ អំឡុងមហាសន្និបាតអង្គការសហប្រជាជាតិ ហើយបន្ទាប់ពីនោះត្រូវឆ្លងកាត់នីតិវិធីសភារបស់ភាគីពាក់ព័ន្ធ។

សូមបញ្ជាក់​ថា កោះ Greenland មានសារៈសំខាន់ខ្លាំង​ណាស់សម្រាប់សន្តិសុខនៅតំបន់អាក់ទិក និងអាត្លង់ទិកខាងជើង ហើយដាណឺម៉ាក បានបញ្ជាក់ថា កិច្ចព្រមព្រៀងនេះមានគោលដៅពង្រឹងសន្តិសុខរួមរបស់​កោះ Greenland ដាណឺម៉ាក អាម៉េរិក និង​អង្គការបក្សសម្ព័ន្ធយោធា NATO។
ដូច្នេះសមរភូមិនយោបាយជុំវិញ​កោះ Greenland មិនទាន់បញ្ចប់​នៅឡើយទេ ប៉ុន្តែឥឡូវនេះវាកំពុងផ្លាស់ពីការទាមទារគ្រប់គ្រងទឹកដីទៅកាន់ការប្រកួតប្រជែងផ្នែកសន្តិសុខ និង​ការ​ពង្រីកវត្តមានយោធានៅតំបន់អាក់ទិក៕

ដោយ: តែម សុខុម