មុខងារថ្មីនេះអនុញ្ញាតឱ្យម្ចាស់ប័ណ្ណ Visa អាចបញ្ចូលប័ណ្ណឥណទាន និងប័ណ្ណឥណពន្ធរបស់ខ្លួនទៅក្នុងទូរស័ព្ទឆ្លាតវៃ និងឧបករណ៍ពាក់តាមខ្លួន ដោយអាចធ្វើការទូទាត់ប្រាក់ភ្លាមៗ និងគ្មានការប៉ះផ្ទាល់ នៅតាមម៉ាស៊ីនទូទាត់ប្រាក់ (POS) របស់ធនាគារខេប៊ីប្រាសាក់នៅទូទាំងប្រទេសកម្ពុជា។
លេខប័ណ្ណពិតប្រាកដមិនត្រូវបានរក្សាទុកនៅលើឧបករណ៍ផ្ទាល់ ឬចែករំលែកជាមួយអាជីវករនោះទេ។ ជំនួសមកវិញ ប្រតិបត្តិការត្រូវបានបញ្ចប់ដោយប្រើប្រាស់លេខគណនីជាក់លាក់របស់ឧបករណ៍ និងកូដសុវត្ថិភាពប្រតិបត្តិការ។
ថ្នាក់ដឹកនាំធនាគារខេប៊ីប្រាសាក់បានមានប្រសាសន៍ថា «ការដាក់ឱ្យដំណើរការសេវាទទួលការទូទាត់ Tap-to-Pay តាមរយៈ Apple Pay និង Google Pay គឺជាសមិទ្ធផលដ៏សំខាន់មួយនៅក្នុងការប្តេជ្ញាចិត្តរបស់យើងខ្ញុំចំពោះការធ្វើបរិវត្តកម្មឌីជីថល។ អ្នកទេសចរបរទេសដែលអញ្ជើញមកពីបណ្តាប្រទេស និងតំបន់ដែលគាំទ្រ Apple Pay និង Google Pay អាចទទួលបានបទពិសោធន៍ទូទាត់ប្រាក់យ៉ាងរហ័ស និងមានសុវត្ថិភាព ព្រមទាំងរីករាយក្នុងដំណើរទស្សនាចរនៅប្រទេសកម្ពុជាផងដែរ»។
