តុលាការចេញដីកាចាប់ខ្លួនអតីតថ្នាក់ដឹកនាំបក្សប្រឆាំង នៅមុនទស្សនកិច្ចរបស់គណៈប្រតិភូសហភាពអឺរ៉ុប

ចៅក្រមសាលាដំបូងរាជធានីភ្នំពេញបានចេញដីកាមួយបង្គាប់ឱ្យសមត្ថកិច្ចតាមចាប់ខ្លួនអតីតមេបក្សប្រឆាំងគឺលោក សម រង្ស៉ី និងអតីតថ្នាក់ដឹកនាំជាន់ខ្ពស់ ៧នាក់ផ្សេងទៀត ពាក់ព័ន្ធនឹងបទល្មើសថ្មី តែប៉ុន្មានថ្ងៃប៉ុណ្ណោះ នៅមុនការមកដល់របស់គណៈប្រតិភូសហភាពអឺរ៉ុប ជាផ្នែកមួយនៃដំណើរការត្រួតពិនិត្យនិងតាមដាន ខណៈដែលអឺរ៉ុបពិចារណាដកពីកម្ពុជានូវកិច្ចព្រមព្រៀងមិនបង់ពន្ធទំនិញនាំចូល (EBA)។

រូបថតលោក សម រង្ស៊ី និងអតីតថ្នាក់ដឹកនាំគណបក្សសង្គ្រោះជាតិ។ រូបភាពឯកសារ ពី ហ្វេសប៊ុករបស់លោក សម រង្ស៊ី។

ដោយ ជ័យ ជំនះ 5 years

អំពី នយោបាយ EBA

បើតាមដីកាតុលាការដែលបានផ្សព្វផ្សាយក្នុងក្រុមតេឡេក្រាមឯកសារសម្រាប់មន្រ្តីសាធារណ: ដីកាបង្គាប់ឲ្យចាប់ខ្លួន មានឈ្មោះថ្នាក់ដឹកនាំសំខាន់ៗនៃអតីតគណបក្សសង្រ្គោះជាតិទាំងនោះ រួមមាន លោក សម រង្ស៉ី លោក អេង ឆៃអ៊ាង លោកស្រី មូរ សុខហួរ លោក អ៊ូ ច័ន្ទឫទ្ធិ លោក ហូ វ៉ាន់ លោក ឡុង រី លោក ម៉ែន សុថាវរិន្ទ្រ និង លោក តុ វ៉ាន់ចាន់ ក្រោមចោទប្រកាន់ពីបទ «រួមគំនិតក្បត់និងញុះញង់ឱ្យប្រព្រឹត្តបទឧក្រិដ្ឋ ជាអាទិ៍»។

ដីកាទាំងអស់នោះ ត្រូវចុះហត្ថលេខាដោយចៅក្រមឈ្មោះ លោក កូយ សៅ នៅថ្ងៃទី១២ ខែមីនា ឆ្នាំ២០១៩។

លោក កែត សុផាន អ្នកនាំពាក្យក្រសួងការបរទេសនិងសហប្រតិបត្តិការអន្តរជាតិ ត្រូវបានគេដកស្រង់ប្រសាសន៍ថា ក្រុមការងារ EBA របស់សហភាពអឺរ៉ុបនឹងមកដល់កម្ពុជា នៅថ្ងៃអង្គារ និងថ្ងៃពុធ សប្ដាហ៍នេះ។

បន្ទាប់ពីលើកការព្រួយបារម្ភពីលទ្ធិប្រជាធិបតេយ្យនិងសិទ្ធិមនុស្សនៅកម្ពុជា សហភាពអឺរ៉ុបបានប្រកាសកាលពីខែកុម្ភៈ ថា ខ្លួនចាប់ផ្តើមដំណើរការនីតិវិធីផ្អាកជាបណ្តោះអាសន្ននូវកម្មវិធីអនុគ្រោះពន្ធ EBA។

EBA គឺជាគំនិតផ្តួចផ្តើមរបស់សហគមន៍អឺរ៉ុបដើម្បីជួយបណ្តាប្រទេសក្រីក្រឲ្យនាំចូលទំនិញទៅទីផ្សារអឺរ៉ុបដោយមិនបាច់បង់ពន្ធ ហើយវាអាចត្រូវបានដកចេញក្នុងករណីមានការរំលោភបំពានសិទ្ធិមនុស្សយ៉ាងធ្ងន់ធ្ងរ។ យោងតាមតួលេខផ្លូវការ ទំនិញដល់ទៅ ៤០ភាគរយនៃទំនិញទាំងអស់ ដែលនាំចេញពីកម្ពុជាទៅទីផ្សារអន្តរជាតិ គឺបានចេញទៅកាន់ទីផ្សារសហគមន៍អឺរ៉ុប។

លោកស្រី មូរ សុខហួរ អតីតអនុប្រធាននៃអតីតគណបក្សសង្រ្គោះជាតិ បាននិយាយតាមអ៊ីម៉េលថា គាត់បានដឹងពីដីកាទាំង៨នេះ ហើយបានបន្តថា ការផ្អាក EBA ដោយ EU និង GSP ដោយសហរដ្ឋអាមេរិក នឹងប៉ះពាល់ដល់ជីវិតមនុស្សរាប់លាននាក់ ជាពិសេស ស្ត្រី និងប្រជាជនដែលងាយរងគ្រោះរួចទៅហើយ។

តាមរយៈអ៊ីម៉េលដដែល លោកស្រី មូរ សុខហួរ បាននិយាយបន្តថា គាត់នឹងបន្តការងាររៀបចំផែនការសម្រាប់ការវិលត្រឡប់របស់លោក សម រង្ស៊ី និងអ្នកដែលកំពុងរស់នៅនិរទេសខ្លួនផ្សេងទៀត ឲ្យចូលប្រទេសវិញ។

អ្នកនាំពាក្យគណបក្សប្រជាជនកម្ពុជា លោក សុខ ឥសាន បាននិយាយប្រាប់អ្នកសារព័ត៌មានតាមសារតេឡេក្រាម ថា អ្នកនយោបាយ ៤នាក់ នៃចំនួនសរុប ១១៨នាក់ ដែលត្រូវបានតុលាការហាមមិនឲ្យធ្វើសកម្មភាពនយោបាយនោះ បានទទួលសិទ្ធិធ្វើនយោបាយឡើងវិញ ហើយថា សិទ្ធិនយោបាយនៅកម្ពុជាបានបើកចំហនិងស្វាគមន៍ជានិច្ចចំពោះគ្រប់អ្នកនយោបាយពាក់ព័ន្ធ។

លោកបន្តថា ប្រជាជនកម្ពុជាបានកត់សម្គាល់ថា លទ្ធិប្រជាធិបតយ្យនៅកម្ពុជានៅតែមាន«ជីវិតរស់រវើកនិងមានសុពលភាព។»

លោក សុខ ឥសាន បាននិយាយដូច្នេះថា «បញ្ហាស្ថិតនៅលើសិទ្ធិសម្រេចចិត្តដោយឯករាជ្យរបស់ម្នាក់ៗ គ្មានអ្នកណាគាបសង្កត់ ឬគំរាមកំហែងខ្លួនឡើយ។ បើខ្លួនឯងចង់បាន គឺបាន តែបើខ្លួនឯងមិនចង់បានទេ ក៏មិនបានដែរ។ ត្រង់នេះសរបញ្ជាក់ថា ជីវិតនយោបាយរបស់ខ្លួន គឺស្ថិតនៅលើខ្លួនឯងម្នាក់ៗទេ មិនរណបលើអ្នកដទៃឡើយ»៕