តើមានកត្តាអ្វីខ្លះជំរុញឱ្យតម្លៃលំនៅឋាននៅវៀតណាម កើនឡើងជិត៦០% នៅ៥ឆ្នាំកន្លងមមកនេះ?

លោក ង្វៀន កុក អាញ់ (Nguyễn Quốc Anh) អគ្គនាយករងនៃសារព័ត៌មានអចលនទ្រព្យរបស់វៀតណាមមួយបានចែករំលែកព័ត៌មានក្នុងកិច្ចប្រជុំកំពូលអចលនទ្រព្យវៀតណាម ឆ្នាំ២០២៤ នៅទីក្រុងហាណូយថ្មីៗនេះថា តម្លៃអចលនទ្រព្យនៅវៀតណាម បានកើនឡើង៥៩% នៅក្នុងរយៈពេល៥ឆ្នាំចុងក្រោយនេះ ដោយកើនខ្ពស់ជាងតួលេខរបស់ប្រទេសអភិវឌ្ឍន៍មួយចំនួន ដូចជា សហរដ្ឋអាម៉េរិក កើនឡើង៥៤% អូស្ត្រាលីកើនឡើង៤៩% ជប៉ុនកើន៤១% និងសិង្ហបុរី មានការកើនឡើង៣៧%។

ការកើនឡើងតម្លៃអចលនទ្រព្យខ្ពស់ នេះ បានទាញទម្លាក់ទិន្នផលជួលអចលនទ្រព្យនៅវៀតណាម ឱ្យធ្លាក់ចុះ៤% នៅក្នុងរយៈពេលដូចគ្នានេះ តែទាបជាងតួលេខរបស់បណ្ដាប្រទេសក្នុងតំបន់មួយចំនួនដូចជាហ្វីលីពីន ម៉ាឡេស៊ី ថៃ និងឥណ្ឌូនេស៊ី ដែលមានចន្លោះពី៥ទៅ៧%។

លោក ង្វៀន កុក អាញ់ បានបញ្ជាក់ថា កំណើនសេដ្ឋកិច្ច អភិបាលកិច្ចល្អ និងតម្រូវការសង្គម គឺជាកត្តាសំខាន់ ដែលជំរុញឱ្យតម្លៃអចលនទ្រព្យមានការកើនឡើង។ ជាមួយគ្នានេះ កំណើនសេដ្ឋកិច្ចដ៏រឹងមាំសម្រាប់មនុស្សម្នាក់ៗ អត្រាការប្រាក់មានភាពអំណោយផល និងកំណើនវិនិយោគក្នុងស្រុក ក៏បានជួយជំរុញតម្រូវការទិញអចលនទ្រព្យឱ្យមានការកើនឡើងផងដែរ។

ការវិនិយោគក្នុងវិស័យអចលនទ្រព្យ ត្រូវបានចាត់ទុកជាការវិនិយោគ ដែលមានដំណើរការល្អបំផុតនៅវៀតណាម នៅមួយទសវត្សរ៍កន្លងមកនេះ ក្នុងនោះការវិនិយោគលើអាផាតម៉ិន កើនឡើងដល់១៩៧% ខណៈប្រាក់ចំណេញបានមកពីការលក់ដីឡូតិ៍ បានកើនឡើង១៣៧% នៅត្រីមាសចុងក្រោយនៃឆ្នាំ២០២៤ បើធៀបនឹងត្រីមាសទី១នៃឆ្នាំ២០១៥។

ទោះជាយ៉ាងណា ទីផ្សារអចលនទ្រព្យនៅវៀតណាម ក៏កំពុងប្រឈមនឹងបញ្ហាជាច្រើនផងដែរចាប់តាំងពីឆ្នាំ២០២២ មក ដោយសារស្ថានភាពម៉ាក្រូដ៏ពិបាក ភាពទន់ខ្សោយក្នុងវិស័យហិរញ្ញវត្ថុ និងការមានបញ្ហាផ្នែកច្បាប់របស់ក្រុមហ៊ុនអាជីវកម្មជាដើម៕

ដោយ: តែម សុខុម