ការព្រមព្រៀងលើការទទួលស្គាល់ទៅវិញទៅមកចំពោះលិខិតបញ្ជាក់ពីការចាក់វ៉ាក់សាំងនេះ ត្រូវបានគេមើលឃើញថា នឹងក្លាយជាយន្ដការដ៏សំខាន់ក្នុងការចូលរួមស្ដារវិស័យទេសចរនៅក្នុងតំបន់ឡើងវិញ ខណៈដែលបច្ចុប្បន្នប្រទេសនៅតំបន់អាស៊ានដូចជា កម្ពុជា ថៃ និងសិង្ហបុរីជាដើម បានបន្ថូរបន្ថយលើការធ្វើដំណើរចេញចូលប្រទេសកាន់តែប្រសើរជាងមុន។
កិច្ចព្រមព្រៀង អំពីការទទួលស្គាល់លិខិតបញ្ជាក់ពីការចាក់វ៉ាក់សាំងរបស់រដ្ឋជាសមាជិកអាស៊ាន ត្រូវបានធ្វើឡើងនៅក្នុងកិច្ចប្រជុំរដ្ឋមន្ត្រីសុខាភិបាលអាស៊ានលើកទី១៥ និងកិច្ចប្រជុំពាក់ព័ន្ធ ដែលធ្វើឡើងកាលពីថ្ងៃសៅរ៍ដល់ថ្ងៃអាទិត្យចុងសប្ដាហ៍មុននេះនៅកោះបាលីនៅប្រទេសឥណ្ឌូនេស៊ី។
ក្រសួងសុខាភិបាលសិង្ហបុរិបាននិយាយថា ដោយអាស៊ានកំពុងមានការងើបឡើងពីជំងឺរាតត្បាតកូវីដ១៩ និងបានការបើកព្រំដែនរបស់ពួកគេទៅកាន់ពិភពលោកឡើងវិញផងដែរនោះ វាពិតជាមានសំខាន់ណាស់ក្នុងការបង្កើតការធ្វើដំណើរដោយរលូននៅទូទាំងតំបន់ដូចជាការប្រើប្រាស់បច្ចេកវិទ្យាឌីជីថល ដើម្បីទទួលស្គាល់គ្នាទៅវិញទៅមកអំពីលិខិតបញ្ជាក់ពីការចាក់វ៉ាក់សាំងនៅទូទាំងប្រទេសទាំងអស់នេះ។
អត្ថបទគួរអាន
គណៈរដ្ឋមន្ត្រីសុខាភិបាល និងមន្ត្រីជាន់ខ្ពស់អាស៊ានបានយល់ព្រមធ្វើការឆ្ពោះទៅរកយន្តការផ្ទៀងផ្ទាត់ជាសកលរបស់អាស៊ាន ដើម្បីសម្រួលដល់ការធ្វើដំណើរអន្តរជាតិដោយរលូនខណៈកំពុងការពារទិន្នន័យឯកជនភាព និងសុវត្ថិភាពរបស់រដ្ឋជាសមាជិកអាស៊ាននីមួយៗ។
ក្នុងអំឡុងពេលនៃកិច្ចប្រជុំនោះដែរ រដ្ឋជាសមាជិកបានចែករំលែកព័ត៌មានថ្មីៗ និងផ្លាស់ប្តូរទស្សនៈគ្នាស្តីពីការពង្រឹងភាពអត់ធ្មត់នៃប្រព័ន្ធសុខាភិបាលនិងការពង្រឹងការត្រៀមខ្លួនជាសមូហភាព និងការឆ្លើយតបទៅនឹងជំងឺរាតត្បាតនេះ។
រដ្ឋមន្ត្រីសុខាភិបាលសិង្ហបុរីលោក Ong Ye Kung បានគូសបញ្ជាក់នៅក្នុងកិច្ចប្រជុំថា រដ្ឋជាសមាជិកអាស៊ានអាចទប់ទល់នឹងជំងឺកូវីដ១៩បាន ដោយសារតែកិច្ចសហប្រតិបត្តិការជិតស្និទ្ធរបស់ពួកគេ ប៉ុន្តែអាស៊ានត្រូវតែរឹងមាំ និងប្រុងប្រយ័ត្នជាប់ជានិច្ច។
លោក Ong បាននិយាយថា ក្នុងរយៈពេលប៉ុន្មានខែខាងមុខទៀតនេះ រដ្ឋសមាជិកអាស៊ានទំនងជានឹងឃើញរលកថ្មីនៅពេលភាពស៊ាំក្នុងរាងកាយរបស់មនុស្សដែលបានមកពីវ៉ាក់សាំងត្រូវបានចុះខ្សោយ ឬក៏មានមេរោគបម្លែងថ្មីមួយ ដែលជំរុញឱ្យមានការឆ្លងជំងឺនេះឡើងវិញ ដូច្នេះ គេត្រូវមានវិធានការដើម្បីត្រៀមទប់ទល់លើបញ្ហានេះឲ្យបានទាន់ពេល។
សូមបញ្ជាក់ថា បន្ទាប់ពីកិច្ចពិភាក្សាស្តីពីការបង្កើតប្រព័ន្ធទទួលស្គាល់គ្នារបស់អាស៊ានសម្រាប់លិខិតបញ្ជាក់ពីការវ៉ាក់សាំងនេះហើយ រដ្ឋមន្ត្រីក្រសួងសុខាភិបាលសិង្ហបុរីជឿជាក់ថា គម្រោងនេះអាចនាំឱ្យអាស៊ានឈានទៅអនុវត្តប្រព័ន្ធស្រដៀងគ្នានេះ ជាមួយតំបន់ផ្សេងទៀតរួមមានសហរដ្ឋអាមេរិក ចិន ឥណ្ឌា និងសហភាពអឺរ៉ុបផងដែរ៕
អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
