នៅក្នុងរបាយការណ៍របស់ក្រសួងពាណិជ្ជកម្ម បានបង្ហាញថា កម្ពុជាជាប់ចំណាត់ថ្នាក់លេខ១ នៅតំបន់អាស៊ាន ក្នុងការនាំចេញកង់ទៅកាន់ទីផ្សារក្រៅប្រទេស និងជាប់ចំណាត់ថ្នាក់លេខ៥ ក្នុងពិភពលោក បន្ទាប់ពី ប្រទេសចិន,តៃវ៉ាន់,ហូឡង់ និងអាល្លឺម៉ង់ ។ ឯកឧត្តម ស៊ាង ថៃ បានគូសបញ្ជាក់ថា ការនាំចេញកង់របស់កម្ពុជា នារយៈពេល ៤ខែ ឆ្នាំ២០២២ មានទឹកប្រាក់សរុបប្រមាណជាង ៣០០លានដុល្លារ ដែលមានការកើនឡើង ៥៤%។ រីឯ ការនាំចូលកង់ពីខាងក្រៅប្រទេសវិញ គិតជាទឹកប្រាក់ប្រមាណ ៥លានដុល្លារ ដែលមានការថយចុះ ១៤ភាគរយ។ ក្នុងនោះ ទីផ្សារសម្រាប់នាំចេញកង់របស់កម្ពុជា មានដូចជា អាមេរិក,អាល្លឺម៉ង់, បែលហ្ស៊ីក, អង់គ្លេស និងហូឡង់។ ខណៈការនាំចូលកង់របស់កម្ពុជាវិញ មានដូចជា ប្រទេសជប៉ុន,ចិន,វៀតណាម,ថៃ និងសហរដ្ឋអាមេរិក ជាដើម។
អត្ថបទគួរអាន
ដ្បិតថា កម្ពុជា មានលទ្ធភាពក្នុងការនាំចេញកង់ ទៅកាន់ទីផ្សារខាងក្រៅ ដោយខ្លួនឯង តែកម្ពុជា នៅតែពឹងផ្អែកក្នុងការនាំចូលវត្ថុធាតុដើមសម្រាប់ដំឡើងកង់ពីខាងក្រៅ។ តួយ៉ាង ប្រទេសវៀតណាម គឺជាអ្នកផ្គត់ផ្គង់វត្ថុធាតុដើម សម្រាប់ផលិតកង់របស់កម្ពុជា ហើយប្រសិនបើ កម្ពុជាមិនបន្តភ្ជាប់ខ្សែចង្វាក់ឧស្សាហកម្ម ជាមួយវៀតណាម ទេនោះ កម្ពុជា ក៏អាចនឹងជួបប្រឈមហានិភ័យក្នុងការផលិតកង់ផងដែរ។ ជាក់ស្ដែង កាលពីពេលថ្មីៗនេះ កម្ពុជា បាននិងកំពុងជំរុញឲ្យវៀតណាម បន្តផ្គត់ផ្គង់វត្ថុធាតុដើមមួយចំនួន ក្នុងការផលិតកង់នៅកម្ពុជា ដើម្បីនាំចេញទៅទីផ្សារអឺរ៉ុប និងសហរដ្ឋអាមេរិក។
សូមបញ្ជាក់ថា បច្ចុប្បន្ន កម្ពុជា មានរោងចក្រដំឡើងកង់ចំនួន៥ កំពុងតែដំណើរការផលិត ដើម្បីនាំចេញកង់ទៅកាន់ទីផ្សារក្រៅប្រទេស៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
