ធនាគារជាតិនៃកម្ពុជា៖ ទុនបម្រុងអន្តរជាតិរបស់កម្ពុជានៅមានកម្រិតខ្ពស់ នឹងអាចធានាការនាំចូលទំនិញបានដល់៧ខែ

តួរយ៉ាង ទុនបម្រុងអន្តរជាតិបានកើនដល់២០ពាន់លានដុល្លារអាមេរិកនៅឆ្នាំ២០២៣ បន្ទាប់ពីបានធ្លាក់ចុះនៅឆ្នាំ២០២២ ពោលគឺទុនបម្រុងអន្តរជាតិកម្ពុជា ក្នុងឆ្នាំ២០២៣ មានកម្រិតខ្ពស់គ្រប់គ្រាន់ដែលស្មើនឹង៧ខែនៃការនាំចូលទំនិញនិងសេវានាគ្រាបន្ទាប់។ ការកើនឡើងទុនបម្រុងអន្តរជាតិ ជាចម្បងនេះ ធនាគារជាតិនៃកម្ពុជា បានឱ្យដឹងថា គឺបណ្តាលមកពីការកើនឡើងនៃប្រាក់បញ្ញើរបស់គ្រឹះស្ថានធនាគារនិងហិរញ្ញវត្ថុ ការកើនឡើងតម្លៃទីផ្សារសម្ពាធ វិនិយោគ ការកើនឡើងប្រាក់បញ្ញើរាជរដ្ឋាភិបាល ការប្រែប្រួលថ្លៃមាសនិងអត្រាប្តូរប្រាក់ និងចំណូលពីការវិនិយោគទុនបម្រុងអន្តរជាតិ។

ជាមួយគ្នានេះ ការវិនិយោគទុនបម្រុងអន្តរជាតិរបស់ធនាគារជាតិនៃកម្ពុជា ត្រូវបានអនុវត្តដោយប្រុងប្រយ័ត្ន និងមានភាពបត់បែនខ្ពស់។ ដ្បិតថាហានិភ័យនៃការវិនិយោគត្រូវបានគ្រប់គ្រងយ៉ាងហ្មត់ចត់ ដោយគោរពតាមសេចក្តីណែនាំការវិនិយោគ និងផ្អែកលើគោលការណ៍គ្រប់គ្រងទុនបម្រុងអន្តរជាតិប្រកបដោយសុវត្ថិភាព សន្ទនីយភាព និងទទួលបានចំណូលសមស្រប។ យ៉ាងណាមិញសេចក្ដីណែនាំការវិនិយោគត្រូវបានធ្វើបច្ចុប្បន្នកម្មចំនួន២លើកនៅឆ្នាំ២០២៣ ដោយបានកែសម្រួលសមាសភាគនៃចំណែកទុនបម្រុងវិនិយោគ និងរូបិយប័ណ្ណ ដើម្បីឆ្លើយតបនឹងកំណើននៃតម្រូវការសន្ទនីយភាព និងលទ្ធភាពខ្ពស់ក្នុងការចាប់យកឱកាសបង្កើនចំណូលពីការប្រែប្រួល នៃអត្រាការប្រាក់នៅលើទីផ្សារហិរញ្ញវត្ថុអន្តរជាតិ៕