សារព័ត៌មានបរទេសធំៗបានរាយការណ៍ថា ក្រុមហ៊ុនផលិតប្រេងរដ្ឋរបស់ប្រទេសអារ៉ាប៊ីសាអូឌីត គឺក្រុមហ៊ុន ស៊ូឌី អារ៉ាមកូ (Saudi Aramco) អាចនឹងកំណត់តម្លៃលក់ជាផ្លូវការ សម្រាប់ផលិតផលប្រេងឆៅជាមធ្យមរបស់ខ្លួនឲ្យប្រែប្រួលប្រហែល៤ដុល្លារ ក្នុងមួយធុងបារ៉ែល លើតារាងមធ្យមភាគនៃតម្លៃប្រេងឆៅឌូបៃ-អូម៉ង់។
តម្លៃប្រេងឆៅនៅលើទីផ្សារអន្តរជាតិ បានកើនឡើងបន្តិចបន្ទាប់ពីការវាយប្រហារដ៏គួរឱ្យភ្ញាក់ផ្អើលមួយដោយក្រុមជីវពលប្រដាប់អាវុធហាម៉ាស ប៉ាឡេស្ទីន លើប្រទេសអ៊ីស្រាអែល កាលពីថ្ងៃទី៧ ខែតុលា ដែលបង្កឱ្យមានការភ័យខ្លាចថា ជម្លោះនេះអាចនឹងកើនឡើងនៅមជ្ឈិមបូព៌ា និងអាចរំខានដល់ការផ្គត់ផ្គង់ប្រេងសកល។
ការកើនឡើងតម្លៃប្រេងហាក់បានធូរស្រាល ក្រោយគ្មានការផ្គត់ផ្គង់រូបវ័ន្តចេញពីទីផ្សារ ខណៈដែលទស្សនវិស័យសម្រាប់កំណើននៅក្នុងប្រទេសចិន ដែលជាប្រទេសនាំចូលប្រេងដ៏ធំបំផុតមួយរបស់ពិភពលោកមិនទាន់មានការប្រែប្រួល។
អត្ថបទគួរអាន
អ្នកវិភាគម្នាក់បាននិយាយថា ការព្រួយបារម្ភអំពីភូមិសាស្ត្រនយោបាយនៅតែបន្តអូសបន្លាយ នឹងមានហានិភ័យលើការរឹតបន្តឹងការផ្គត់ផ្គង់ ប៉ុន្តែបញ្ហាបន្ទាន់ជាងនេះទៅទៀតនោះ គឺថា ការចម្រាញ់កំពុងចុះខ្សោយ ហើយតម្រូវការប្រេងកំពុងធ្លាក់ចុះ។
តាមប្រក្រតី ក្រុមហ៊ុន ស៊ូឌី អារ៉ាមកូ តែងតែបូមប្រេងលក់ទៅតាមការកំណត់របស់តម្លៃនៅលើទីផ្សារឌូបៃ ប៉ុន្តែមកដល់ពេលនេះការប្រែប្រួលមិនមានអ្វីធំដុំនៅឡើយទេ។
នៅពេលនេះគេដឹងថា តម្លៃនៃដំណើរការចម្រាញ់ប្រេងឆៅដែលទទួលបានពីទីផ្សារប្រេងឆៅនៅឌូបៃធ្លាក់ចុះជាមធ្យមជិត៣ដុល្លារ នៅក្នុងមួយបារ៉ែល នៅខែតុលានេះ។
ដោយឡែកសកម្មភាពនៅរោងចក្រចម្រាញ់ប្រេងនៅក្នុងប្រទេសចិន ក៏កំពុងកាត់បន្ថយអត្រាដំណើរការមួយផ្នែក ដោយសារតម្រូវការតាមរដូវកាលមានការធ្លាក់ចុះសម្រាប់ផលិតផលប្រេង ដែលចម្រាញ់រួច ដោយសារតែប្រទេសនេះមិនបានចេញកូតាបន្ថែមទៀតសម្រាប់ការនាំចេញផលិតផលប្រេង៕
ដោយៈ សរ សុជាតិ
None
