ក្រុមហ៊ុនរុករករ៉ែនីគែលមួយចំនួននៅប្រទេសអូស្ត្រាលី បានប្រកាសនៅខែមករា នេះថា ពួកគេនឹងបន្ថយល្បឿន ឬផ្អាកប្រតិបត្តិការនានាដោយសារតែតម្លៃធ្លាក់ចុះ ខណៈដែលទស្សនវិស័យមិនសូវល្អសម្រាប់រ៉ែលីចូម បានធ្វើឱ្យស្ថាប័នផ្ដល់កម្ចីសម្រេចផ្អាកផ្ដល់កម្ចីចំនួន៥០០លានដុល្លារ សម្រាប់គម្រោងរុករករ៉ែមួយដែលបានធ្វើផែនការរួចហើយ។
យោងតាមក្រុមអ្នកវិភាគ ទីផ្សារនេះកំពុងធ្វើការកែតម្រូវ ជាពិសេសទាក់ទិននឹងការផ្លាស់ប្ដូរងាកទៅរកថាមពលកកើតឡើងវិញទាំងប្រញាប់ប្រញាល់ ហើយការព្យាករសម្រាប់ការប្រើប្រាស់រថយន្តអគ្គិសនី ក៏កាន់តែមានការប្រយ័ត្នប្រយែងជាងមុនដែរ។
លោក ចាស្ទីន ស្មឺក (Justin Smirk) អ្នកជំនាញសេដ្ឋកិច្ចជាន់ខ្ពស់នៅធនាគារ វ៉េសភែក (Westpac) និយាយថា តាមការសង្កេតឃើញថា មានការវិនិយោគដ៏ធំលើវិស័យទាំងនេះ ប៉ុន្តែបើងាកមកមើលកំណើនក្នុងវិស័យទាំងនេះវិញ គឺមិនខ្លាំងដូចការរំពឹងទុកឡើយ ទោះបីជាតម្រូវការរថយន្តអគ្គិសនីកើនឡើងគួរឱ្យកត់សម្គាល់ក្ដី។
អត្ថបទគួរអាន
ទន្ទឹមនេះលោកបានកត់សម្គាល់ថា តម្លៃរ៉ែនីគែល និងរ៉ែលីចូមចុះថោក គឺមានផលល្អសម្រាប់ទីផ្សាររថយន្តអគ្គិសនី ព្រោះរថយន្តអគ្គិសនីនឹងមានតម្លៃកាន់តែធូរថ្លៃ ដែលនឹងជួយជំរុញតម្រូវការ ហើយតម្រូវការរថយន្តប្រភេទនេះនឹងកើនឡើងជាថ្មីម្ដងទៀត។
ពាក់ព័ន្ធនឹងការធ្លាក់ថ្លៃរ៉ែនីគែល និងរ៉ែលីចូមនេះ អ្នកវិភាគបានលើកឡើងថា ការរកឃើញរ៉ែលីចូមនៅប្រទេសថៃ ក៏ដូចជាការរីកចម្រើនខ្លាំងនៃឧស្សាហកម្មរ៉ែនីគែល និងរ៉ែលីចូមនៅប្រទេសឥណ្ឌូនេស៊ី ដែលទទួលបានការគាំទ្រខ្លាំងពីរដ្ឋាភិបាល និងការវិនិយោគយ៉ាងសម្បើមពីបណ្ដាក្រុមហ៊ុនចិន ក៏ជាចំណែកដ៏សំខាន់មួយដែលធ្វើឱ្យតម្លៃរ៉ែសំខាន់ៗទាំងនេះនៅអូស្ត្រាលី ធ្លាក់ចុះផងដែរ។
ប្រភពដដែលបានលើកឡើងថា បច្ចុប្បន្ននេះ ប្រទេសឥណ្ឌូនេស៊ី មានចំណែកគ្របដណ្ដប់ដល់ទៅ៥៥%នៃការផ្គត់ផ្គង់ទូទាំងពិភភពលោកសម្រាប់រ៉ែនីគែល និងរ៉ែលីចូមដែលសុទ្ធតែជាលោហៈសំខាន់ៗសម្រាប់ផលិតអាគុយរថយន្តអគ្គិសនី៕
ដោយៈ សរ សុជាតិ
None
