ការផ្អាកនេះ គឺជាផ្នែកមួយនៃកិច្ចខិតខំរបស់រដ្ឋាភិបាល ក្នុងការធ្វើកំណែទម្រង់ទេសចរណ៍នៅលើកោះបាលី ដែលជាកន្លែងទាក់ទាញភ្ញៀវទេសចរដ៏សំខាន់មួយរបស់ប្រទេសនេះ ដើម្បីលើកកម្ពស់គុណភាព និងការងារ ខណៈរដ្ឋាភិបាលកំពុងរក្សាវប្បធម៌ជនជាតិដើមភាគតិចរបស់កោះនេះ។
លោកស្រី ហ៊ឺមីន អេស្ទី (Hermin Esti) មន្ត្រីជាន់ខ្ពស់នៃក្រសួងសម្របសម្រួលកិច្ចការសមុទ្រ និងការវិនិយោគបាននិយាយថា រដ្ឋាភិបាលឥណ្ឌូនេស៊ី បានយល់ព្រមផ្អាកការសាងសង់ជាបណ្តោះអាសន្ន បើទោះបីពេលវេលាពិតប្រាកដកំពុងស្ថិតក្នុងការពិភាក្សា។
កាលពីថ្ងៃសៅរ៍សប្ដាហ៍មុន អភិបាលបណ្តោះអាសន្នរបស់កោះបាលីលោក សាង ម៉េដ ម៉ាហិនដ្រា ចាយ៉ា (Sang Made Mahendra Jaya) បាននិយាយថា លោកបានស្នើរដ្ឋាភិបាលសុំឱ្យផ្អាកការអភិវឌ្ឍហួសហេតុសម្រាប់គោលបំណងពាណិជ្ជកម្មដូចជាសណ្ឋាគារ វីឡា និងក្លឹបនៅតំបន់ដ៏មមាញឹកចំនួន៤ នៅលើកោះបាលី ប៉ុន្តែរដ្ឋាភិបាលមិនទាន់ឆ្លើយតបចំពោះសំណើនេះនៅឡើយទេ។
លោក លូហ៊ុត ផានចៃតាន (Luhut Pandjaitan) មន្ត្រីជាន់ខ្ពស់របស់ឥណ្ឌូនេស៊ីថា ការផ្អាកដំណើរការសាងសង់ហេដ្ឋារចនាសម្ពន្ធទាំងនេះអាចអូសបន្លាយពេលរហូតដល់១០ ឆ្នាំឯណោះ។ លោក ធ្លាប់បាននិយាយថា ជនបរទេសប្រហែល២០ម៉ឺននាក់ឥឡូវនេះកំពុងរស់នៅលើកោះបាលី ដែលបានរួមចំណែកបង្កជាបញ្ហាមួយចំនួនដូចជាឧក្រិដ្ឋកម្ម ការអភិវឌ្ឍហួសហេតុ និងការប្រកួតប្រជែងការងារផងដែរ៕
អត្ថបទ៖ សុខ មង្គល
