សំណើនេះបានធ្វើឡើងប៉ុន្មានថ្ងៃ បន្ទាប់ពីរដ្ឋាភិបាលបានស្នើសុំប្រាក់កម្ចីពីមូលនិធិរូបិយវត្ថុអន្តរជាតិនៅក្នុងវិធានការមួយ ដែលត្រូវបានគេមើលឃើញថា ជាវិធានការទប់ស្កាត់ជាមុន ចំពេលដែល កំពុងមានការព្រួយបារម្ភថា ទុនបម្រុងរូបិយបណ្ណបរទេសរបស់ប្រទេសនេះ នឹងមានការខ្វះខាតនាពេលខាងមុខ។
ប្រទេសជិតខាងអាស៊ីខាងត្បូងមួយចំនួនរបស់បង់ក្លាដេសដូចជា ប្រទេសស្រីលង្កា និងប៉ាគីស្ថានបាននិងកំពុងពិភាក្សាជាមួយអង្គការ IMF ទៅលើប្រាក់កម្ចីដើម្បីដោះស្រាយវិបត្តិសេដ្ឋកិច្ចរៀងៗខ្លួនផងដែរ ខៈដែលប្រទេសទាំងពីរនេះ កំពុងជួបវិបត្តិដ៏អាក្រក់ ពិសេសប្រទេស្រីលង្កាតែម្ដង។
រដ្ឋមន្ត្រីហិរញ្ញវត្ថុបង់ក្លាដែស លោកម៉ូស្តាហ្វា កាម៉ាល (AHM Mustafa Kamal) បាននិយាយនៅក្នុងសន្និសីទសារព័ត៌មាននៅទីក្រុងដាកា (Dhaka) កាលពីថ្ងៃទី ២៧ ខែកក្កដាថា «មិនមែនត្រឹមតែ IMF ប៉ុណ្ណោះទេ ប៉ុន្តែរដ្ឋាភិបាលបានស្នើទៅកាន់ធនាគារពិភពលោក និង ធនាគារអភិវឌ្ឍន៍អាស៊ី ADB» ផងដែរ ដើម្បីទទួលបានប្រាក់កម្ចីបន្ថែម សម្រាប់ដោះស្រាយបញ្ហាសេដ្ឋកិច្ច។
អត្ថបទគួរអាន
គួរជម្រាបថា បើតាមទីភ្នាក់ងារ Bloomberg បានចុះផ្សាយថា ទុនបម្រុងរូបិយបណ្ណបរទេសរបស់ប្រទេសបង់ក្លាដែសបានធ្លាក់ចុះពីជិត ៤៦ ពាន់លានដុល្លារកាលពីឆ្នាំមុនមកនៅត្រឹមជិត ៤០ ពាន់លានដុល្លារគិតត្រឹមថ្ងៃទី២៧ ខែកក្កដានេះ។ ហើយឱនភាពពាណិជ្ជកម្មរបស់ប្រទេសនេះបានកើនឡើងដល់ជាង ៣៣ ពាន់លានដុល្លារក្នុងឆ្នាំសារពើពន្ធ ដែលបានបញ្ចប់នៅខែមិថុនាកន្លងទៅនេះផងដែរ។
មន្ត្រីបង់ក្លាដែសម្នាក់ដែលសូមមិនបញ្ចេញឈ្មោះបាននិយាយថា រដ្ឋាភិបាលខ្លួន និងធនាគារអភិវឌ្ឍន៍អាស៊ី ADB បានបើកការពិភាក្សាដំបូងលើគម្រោងយ៉ាងហោចណាស់ចំនួន ៤ រួមទាំងប្រាក់កម្ចីចំនួន ២៥០ លានដុល្លារសម្រាប់ការស្តារសេដ្ឋកិច្ចឡើងវិញពីជំងឺរាតត្បាតកូវីដ១៩។
ទោះជាយ៉ាងណា កាលពីថ្ងៃពុធ លោក Kamal រដ្ឋមន្ត្រីហិរញ្ញវត្ថុបង់ក្លាដែស បានប្រាប់សន្និសីទសារព័ត៌មានក្នុងទីក្រុង Dhaka បន្ថែមទៀតថា សម្ពាធលើតម្លៃទំនិញប្រើប្រាស់នឹងធូរស្រាលក្នុងរយៈពេលមួយខែខាងមុខ ហើយរូបិយបណ្ណប៉ង់ក្លាដែសនឹងមានស្ថិរភាពវិញ៕
