អាជ្ញាធរក្នុងតំបន់ ជាពិសេសនៅទីក្រុង មានការប្រុងប្រយ័ត្នខ្ពស់បំផុត បន្ទាប់ពីករណីឆ្លងជំងឺកូវីដ១៩ ក្នុងតំបន់មួយចំនួននៃប្រទេសចិនចាប់ផ្ដើមមានការកើនឡើងវិញ។ ម្យ៉ាងវិញទៀត ដោយសារប្រទេសចិនមានគោលនយោបាយ គ្មានការអត់ឱន ដ៏តឹងរឹងបំផុតចំពោះវិធានការកូវីដ១៩ និងមិនឱ្យមានចន្លោះប្រហោងក្នុងការគ្រប់គ្រងឡើយ ខណៈដែលចិនថ្មីៗនេះ បានប្រកាសដាក់ចេញនូវគោលនយោបាយគ្មានកូវីដ១៩ ឬ ZERO-COVID។
កាលពីថ្ងៃទី ២ វិច្ឆិកា គណៈកម្មាធិការសុខភាពរបស់ទីក្រុងប៉េកាំងបានប្រកាសថា ពលរដ្ឋដែលបានចាកចេញពីទីក្រុង ដើម្បីធ្វើអាជីវកម្ម ឬដំណើរកម្សាន្តទៅកាន់តំបន់ ដែលមានករណីឆ្លងគួរតែ ពន្យារពេលវិលត្រឡប់ និងស្នាក់នៅកន្លែងដែលពួកគេនៅបន្តទៀត ហើយសម្រាប់អ្នកដល់រស់នៅក្នុងតំបន់នោះ ក៏គួរតែកុំចាកចេញពីទីក្រុង ប្រសិនបើមិនចាំបាច់ ព្រមទាំងពន្យារពេលជួបជុំ ដូចជា កម្មវិធីមង្គលការ និងបុណ្យសពជាដើម។អត្ថបទគួរអាន
ម្យ៉ាងវិញទៀត សម្រាប់អ្នកដែលមកពីតំបន់ដែលមានករណីឆ្លងថ្មី គឺមិនអាចចូលទីក្រុងប៉េកាំងបានទេ ហើយអ្នកដែលមកពីតំបន់គ្មានករណីឆ្លង ត្រូវតែបង្ហាញលទ្ធផលតេស្តកូវីដ ៤៨ ម៉ោងចុងក្រោយ និងតាមដានសុខភាពរយៈពេល ១៤ ថ្ងៃ ទើបអាចចូលទីក្រុងប៉េកាំងបាន។
គួរដឹងថា គោលនយោបាយ "គ្មានការអត់ឱន" របស់ប្រទេសចិនសម្រាប់គ្រប់គ្រងកូវីដនេះ មានន័យថាអ្នកធ្វើដំណើរទាំងអស់ដែលមកពីបរទេស ត្រូវបានតម្រូវឱ្យធ្វើចត្តាឡីស័កចំនួន ២១ ថ្ងៃ ក្នុងសណ្ឋាគារដែលបានកំណត់នៅពេលមកដល់ក្នុងប្រទេសចិន មុនពេលចេញទៅតំបន់ផ្សេងៗទៀតនៅក្នុងប្រទេសចិន។
សូមជម្រាបថា បើទោះបីជា ចំនួនតួលេខឆ្លងប្រចាំថ្ងៃក្នុងប្រទេសចិន តិចជាងប្រទេសផ្សេងទៀត ដូចជា សហរដ្ឋអាមេរិកក៏ដោយ តែប្រទេសនេះនៅមិនទាន់មានការបន្ធូរបន្ថយវិធានការរឹតតឹងនៅឡើយទេ។ ជាក់ស្ដែង គិតត្រឹមថ្ងៃទី ២ វិច្ឆិកា គណៈកម្មការសុខភាពជាតិចិនបានកត់ត្រាករណីឆ្លងថ្មីមានតែ ១០៩ នាក់ប៉ុណ្ណោះ ហើយក្នុងនោះ ករណីឆ្លងសហគមន៍មាន ៩៣នាក់ និងករណីនាំចូលមាន ១៦ នាក់ ដែលធ្វើឲ្យតួលេខអ្នកឆ្លងកូវីដ១៩សរុបនៅក្នុងប្រទេសនេះ មានជាង ៩ម៉ឺន៧ពាន់នាក់ និងស្លាប់មានជាង ៤ពាន់៦រយនាក់៕None
