អាមេរិកប្រកាសចែករំលែកវ៉ាក់សាំងដូចនេះ ធ្វើឡើងនៅមួយថ្ងៃបន្ទាប់ពីអង្គការយូនីសេហ្វ (UNICEF) បានអំពាវនាវឲ្យប្រទេសអ្នកមាន ដែលបានប្រមូលទុកវ៉ាក់សាំងដ៏ច្រើនលើសលុប មេត្តាចែករំលែកវ៉ាក់សាំងទាំងនោះដល់ប្រទេសក្រីក្រ ដែលកំពុងតែមានតម្រូវការវ៉ាក់សាំងខ្លាំង។
លោក ចូ បៃឌិន ប្រធានាធិបតីអាមេរិកឲ្យដឹងកាលពីថ្ងៃច័ន្ទ ទី១៨ឧសភាថា ក្រុងវ៉ាស៊ីនតោននឹងផ្តើមបញ្ជូនវ៉ាក់សាំងទៅក្រៅប្រទេស ដោយក្នុងនោះ មានវ៉ាក់សាំង ទាំង៣ប្រភេទ ដែលខ្លួនផលិតរួមមាន វ៉ាក់សាំង Pfizer/BioNtech វ៉ាក់សាំង Johnson & Johnson និង Moderna បន្ថែមពីលើវ៉ាក់សាំង AstraZeneca ៦០លានដូសដែលខ្លួនធ្លាប់បានសន្យាថា នឹងចែករំលែកដល់ប្រទេសក្រីក្រដែរនោះ។
អត្ថបទគួរអាន
មែនទែនទៅ អាមេរិកធ្លាប់បានសន្យាកន្លងមកថា នឹងចែករំលែកវ៉ាក់សាំង AstraZeneca ៦០លានដូសឲ្យប្រទេសក្រីក្រ ប៉ុន្តែជាយូរមកហើយ អាមេរិកមិនដែលបានចែករំលែកវ៉ាក់សាំងតាមការសន្យារបស់ខ្លួននោះទេ។ គ្មានប្រទេសក្រីក្រណាមួយបានទទួលវ៉ាក់សាំងពីអាមេរិកនោះទេ សូម្បីតែ១ដូស។ គេសង្កេតឃើញមានតែប្រទេសម៉ិសស៊ិច និង កាណាដា ដែលជាប្រទេសក្បែរខាងប៉ុណ្ណោះ ដែលទទួលបានវ៉ាក់សាំង AstraZeneca ប្រមាណ ២-៣លានដូសពីអាមេរិក។
ការណ៍នេះធ្វើឲ្យសម្ពាធអន្តរជាតិបានធ្លាក់មកជាបន្តបន្ទាប់ ពិសេសពីអង្គការសុខភាពពិភពលោក និងចុងក្រោយ អង្គការយូនីសេហ្វ ដែលជាអង្គការទទួលបន្ទុកការងារចែកចាយវ៉ាក់សាំងរបស់យន្តការកូវ៉ាក់ (COVAX) នេះផ្ទាល់តែម្តង។
មែនទែនទៅ យូនីសេហ្វមិនត្រឹមតែសំដៅដល់ដល់អាមេរិកតែឯងនោះទេ ការអំពាវនាវរបស់យូនីសេហ្វគឺសំដៅដល់ក្រុមប្រទេសអ្នកមាន G7 ដែលប្រទេសទាំងនេះ លើកលែងជប៉ុនមួយចេញ បានប្រមូលទុកវ៉ាក់សាំងកូវីដ-១៩ ច្រើនលើសពីតម្រូវការនឹងមិនព្រមចែករំលែកដល់ COVAX សម្រាប់ប្រទេសក្រីក្រ ដែលកំពុងខ្វះខាត និងត្រូវការវ៉ាក់សាំងនោះទេ។ ប្រទេសទាំងនេះ ប្រមូលទុកច្រើនលើសតម្រូវ ទាំងដែលខ្លួនបានចាក់វ៉ាក់សាំងដល់ពលរដ្ឋក្នុងចំនួនច្រើនរួចហើយ។ ជាក់ស្តែង អង់គ្លេសចាក់វ៉ាក់សាំងបានប្រជាជនជាង ២០លាននាក់ហើយ ស្មើនឹង៤០%នៃចំនួនប្រជាជនពេញវ័យទាំងអស់របស់ខ្លួន ដែលនេះជាភាគរយដ៏ច្រើនបន្ទាប់ពី អ៊ីស្រាអែល និងអាមេរិក។
បន្ថែមពីលើនេះ លោក បូរីស ចនសុន នាយករដ្ឋមន្រី្តអង់គ្លេសក៏ធ្លាប់បានសន្យាថា នឹងចែករំលែកវ៉ាក់សាំងដល់ប្រទេសក្រីក្រដែរ ប៉ុន្ដែការសន្យាហាក់ប្រែជាសន្យាខ្យល់។
ដោយឡែក ការប្រកាសចែកវ៉ាក់សាំងរបស់អាមេរិកលើកនេះ គេកំពុងរង់ចាំមើលថា តើជាការសន្យាខ្យល់ទៀត ឬយ៉ាងណា ដោយហេតុថា អាមេរិកមិនបានបញ្ជាក់ព័ត៌មានលម្អិតទេថា ខ្លួននឹងបែកចែកទៅតាមរយៈណា ឬទៅប្រទេសណា ចំនួនប៉ុន្មាននោះទេ ដឹងត្រឹមថា ខ្លួននឹងចែករំលែកនៅមុនបំណាច់ខែមិថុនានេះ។
សូមបញ្ជាក់ថា សហរដ្ឋអាមេរិកបានសម្រុកចាក់វ៉ាក់សាំងដល់ពលរដ្ឋខ្លួនបានប្រមាណ ២៧០លានដូសហើយ ខណៈដែលវ៉ាក់សាំងដែលខ្លួនបានកុម្ម៉ង់ទុកមានជាង ១.២០០លានដូស ពោលគឺច្រើនជាង ២ដង នៃតម្រូវការចាក់វ៉ាក់សាំង។
គួរជម្រាបថា ប្រធានអង្គការសុខភាពពិភពលោក ធ្លាប់បានព្រមានម្តងហើយម្តងទៀតថា ដរាបណាគ្មានការចែករំលែកវ៉ាក់សាំងឲ្យបានស្មើភាពគ្នាក្នុងពិភពលោកនោះទេ ក្រុមប្រទេសអ្នកមានដែលបានចាក់វ៉ាក់សាំងឲ្យប្រជាជនរបស់ខ្លួនបានច្រើនហើយនោះក៏នៅមិនទាន់អាចគេចផុត ១០០%ពីកូវីដ១៩នោះដែរ ព្រោះថាមេរោគកូវីដដែលបច្ចុប្បន្នមាននៅប្រទេសក្រីក្រ នៅតែសកម្ម ហើយវាអាចបំប្លែងខ្លួនថ្មីរហូត ការឆ្លងក៏កាន់តែកាចសាហាវ សម្លាប់មនុស្សកាន់តែច្រើនជាងមុន ដែលនឹងអាចធ្វើឲ្យវ៉ាក់សាំងសព្វថ្ងៃ លែងមានប្រសិទ្ធិភាព ទប់ទល់ តទៅទៀតក៏អាចថាបាន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
