តើមហាអំណាចនៅអាស៊ីកំពុងកើបប្រមូលផលពីសណ្តាប់ធ្នាប់ពិភពលោកដែលបាក់បែកមែនឬ?
អស់រយៈពេលរាប់ទសវត្សរ៍មកហើយដែលសណ្តាប់ធ្នាប់អន្តរជាតិ ផ្អែកលើច្បាប់ត្រូវបានមើលឃើញថា ជាខែលការពារសន្តិភាព និងការរីកចម្រើន តែនៅពេលនេះខែលមួ…
ក្រុមអ្នកជំនាញព្រមានថា បាតុភូមិធម្មជាតិ អែលនីណូ ដែលបណ្តាលពីការកើនឡើងកម្ដៅទឹកសមុទ្រប៉ាស៊ីហ្វិក អាចធ្វើឱ្យអាកាសធាតុក្តៅខ្លាំងនៅតំបន់ខ្លះ ខណៈតំបន់ផ្សេងៗទៀតជួបបញ្ហាភ្លៀងធ្លាក់ខ្លាំង ឬគ្រោះរាំងស្ងួត។ ពួកគេបានព្យាករថា មានឱកាសរហូតដល់៦៣% ដែលអាចផ្ទុះបាតុភូត អែលនីណូ នៅឆ្នាំ២០២៧ ដែលជាលទ្ធផលនឹងធ្វើឱ្យតម្រូវការថាមពលកើនឡើង ផលិតកម្មកសិកម្មដាំក្បាលចុះ និងសម្ពាធអតិផរណាហក់ឡើង។ កត្តានេះអាចធ្វើឱ្យធនាគារកណ្តាលទូទាំងពិភពលោកពិបាកគ្រប់គ្រងសេដ្ឋកិច្ច ខណៈទីផ្សារភាគហ៊ុនកំពុងស្ថិតជិតកម្រិតខ្ពស់បំផុតជាប្រវត្តិសាស្ត្រ។
ក្រុមអ្នកវិភាគបានគូសបញ្ជាក់ថា ខ្សែច្រវាក់ផ្គត់ផ្គង់សកលនាពេលបច្ចុប្បន្ន មានភាពងាយរងគ្រោះខ្លាំងណាស់ ដោយសារតែសម្ពាធសេដ្ឋកិច្ចដែលនៅសេសសល់។ ឆ្លងតាមការវាយតម្លៃមានវិស័យយុទ្ធសាស្ត្រសំខាន់ៗចំនួន៤ ដែលនឹងត្រូវរងការវាយប្រហារ និងស្ថិតក្នុងរ៉ាដាតាមដានពីសំណាក់ក្រុមវិនិយោគិន។ វិស័យសំខាន់ៗទាំងនោះរួមមានវិស័យកសិកម្ម និងវារីវប្បកម្ម, វិស័យថាមពល, វិស័យរ៉ែ និងឧស្សាហកម្មធុនធ្ងន់ និងវិស័យធានារ៉ាប់រង និងហិរញ្ញវត្ថុ។
អាកាសធាតុក្តៅហួតហែងអាចប៉ះពាល់ដល់ដំណាំជាច្រើនដូចជាដូងប្រេង អង្ករ ស្រូវសាលី និងពោត ជាពិសេសនៅឥណ្ឌូនេស៊ី ដែលជាប្រទេសផលិតដូងប្រេងធំជាងគេ។ ទោះជាយ៉ាងណា ប្រទេសមួយនៅទ្វីបអាម៉េរិកខាងត្បូងអាចទទួលបានភ្លៀងគ្រប់គ្រាន់។ វិនិយោគិនក៏ចាប់អារម្មណ៍លើក្រុមហ៊ុនប្រព័ន្ធស្រោចស្រព និងគ្រប់គ្រងធនធានទឹកផងដែរ។
បាតុភូត អែលនីណូ វានឹងធ្វើឱ្យតំបន់អាស៊ីមានតម្រូវការអគ្គិសនីកើនឡើងដោយសារអាកាសធាតុក្តៅ និងការប្រើម៉ាស៊ីនត្រជាក់។ ផ្ទុយទៅវិញនៅទ្វីបអាម៉េរិកខាងជើង អាកាសធាតុក្តៅជាងមុនអាចបន្ថយតម្រូវការឧស្ម័នធម្មជាតិ ដែលជះផលប៉ះពាល់ដល់ក្រុមហ៊ុនថាមពលមួយចំនួន។ ជាមួយគ្នានេះនៅទ្វីបអាម៉េរិកខាងត្បូងនឹងមានភ្លៀងធ្លាក់ខ្លាំង ដែលអាចរំខានដល់ការដឹកជញ្ជូន និងផលិតកម្មរ៉ែដូចជាទង់ដែង ដែលប៉ះពាល់ដល់ខ្សែច្រវាក់ផ្គត់ផ្គង់ពិភពលោក។ កង្វះថាមពល ក៏អាចប៉ះពាល់ដល់ឧស្សាហកម្មដែលពឹងផ្អែកលើថាមពលខ្ពស់ផងដែរ។
តែយ៉ាងណា បាតុភូត El Niño អាចកាត់បន្ថយហានិភ័យព្យុះសង្ឃរា ដែលជាកត្តាវិជ្ជមានសម្រាប់ក្រុមហ៊ុនធានារ៉ាប់រងមួយចំនួន។ ប៉ុន្តែធនាគារ និងគ្រឹះស្ថានផ្តល់ប្រាក់កម្ចីអាចរងផលប៉ះពាល់ ប្រសិនបើកសិកម្ម និងនេសាទរងគ្រោះធ្ងន់ ដែលធ្វើឱ្យកសិករ និងអ្នកនេសាទធ្លាក់ចុះប្រាក់ចំណូល ពិបាករកលុយសងបំណុលធនាគារ៕
ដោយ: តែម សុខុម
