ពលរដ្ឋអង់គ្លេសកំពុងរស់នៅក្នុងបញ្ហា ការចំណាយខ្ពស់ក្នុងជីវភាពប្រចាំថ្ងៃកាន់តែខ្លាំង

សារព័ត៌មានធំៗនៅបស្ចិមប្រទេសបានរាយការណ៍ថា ចក្រភពអង់គ្លេស ដែលជា ប្រទេសមហាអំណាចទាំងយោធា និងសេដ្ឋកិច្ចមួយដ៏ខ្លាំងនៅបស្ចិមលោក កំពុងស្ថិតក្នុងស្ថានភាពយ៉ាប់យ៉ឺនផ្នែកសេដ្ឋកិច្ច។ ស្ថានភាពនេះបានបង្កឲ្យពលរដ្ឋអង់គ្លេសជាច្រើន ដែលមានកម្រិតប្រាក់ចំណូលពីទាបទៅមធ្យមស្ថិតក្នុងស្ថានភាពមួយដ៏លំបាក ហើយតម្រូវឲ្យពួកគេរស់នៅក្នុងស្ថានភាពនៃសម្ពាធ និងការតស៊ូផ្នែកសេដ្ឋកិច្ចកាន់តែអាក្រក់ឡើងថែមទៀត។

យោងតាមរបាយការណ៍ថ្មីមួយបានឱ្យដឹងថា ពលរដ្ឋអង់គ្លេសដែលរកបានប្រាក់ជាមធ្យមពី ៣ម៉ឺន៧ពាន់ដុល្លារ ទៅ៩ម៉ឺន៦ពាន់ដុល្លារ នៅក្នុងមួយឆ្នាំ កំពុងប្រឈមមុខនឹងការលំបាកពាក់ព័ន្ធនឹងការចំណាយថ្លៃជីវភាពកើនឡើងខ្ពស់ ដូចជាការបង់ថ្លៃផ្ទះជូល តម្រូវការហូបចុក សម្ភារប្រើប្រាស់ និងតម្រូវការសម្រាប់បម្រើឱ្យជីវភាពរស់នៅផ្សេងៗទៀតកើនឡើងជាបន្តបន្ទាប់នៅក្នុងរយៈពេលប៉ុន្មានឆ្នាំចុងក្រោយនេះ។

ការសិក្សាមួយដែលចេញផ្សាយដោយ Financial Fairness Trust ដែលជាស្ថាប័នឯករាជ្យមួយ បាននិយាយថា ពលរដ្ឋអង់គ្លេសជិតពាក់កណ្តាល គឺមានប្រាក់ចំណូលជាមធ្យមកម្រិតនេះ ហើយពួកគេកំពុងប្រឈមមុខនឹងសម្ពាធលើហិរញ្ញវត្ថុជាពិសេស គឺប្រាក់ចំណូលរបស់ពួកគេតែម្តង ដោយសារតែការរីករាលដាលនៃវិបត្តិសេដ្ឋកិច្ច ដែលញាំញីអង់គ្លេសជាបន្តបន្ទាប់ រហូតដល់ធ្វើឲ្យជីវភាពពលរដ្ឋប្រឈមហូសនឹងកម្រិតនៃការបន្សាំរបស់ពួកគេ។

បើតាមរបាយការណ៍នេះ ពលរដ្ឋអង់គ្លេសម្នាក់ក្នុងចំណោម៥នាក់ បាននិយាយថា ពួកគេកំពុងតស៊ូនឹងការចំណាយផ្គត់ផ្គង់ថ្លៃអាហារ និងសម្ភារសំខាន់ៗផ្សេងទៀត ខណៈដែលអ្នកផ្សេងទៀតកំពុងតស៊ូនឹងបញ្ហាជំពាក់បំណុល៕

ដោយៈ សរ សុជាតិ