តើអាជីវកម្មត្រូវបត់បែន និងផ្លាស់ប្តូរយុទ្ធសាស្ត្រអាជីវកម្មបែបណា ដើម្បីធានាការរស់រានក្នុងស្ថានភាពសេដ្ឋកិច្ចមិនប្រាកដប្រជា?

លោកបណ្ឌិត ញិល រដ្ឋា អ្នកជំនាញភូមិសាស្រ្តនយោបាយ និងសេដ្ឋកិច្ចអន្តរជាតិបានគូសបញ្ជាក់ថា នៅពេលជួបវិបត្តិសេដ្ឋកិច្ច ឬបញ្ហាអតិផរកើនឡើង អ្នកដែលរងផលប៉ះពាល់ខ្លាំងជាងគេ គឺអ្នកប្រកបអាជីវកម្មខ្នាតតូច ដោយសារពួកគេខ្វះខាតទុនបម្រុងសម្រាប់ទប់ទល់ពេលជួបវិបត្តិនានា។ បើតាមអ្នកជំនាញរូបនេះ ស្ថិតក្នុងបរិបទដែលសេដ្ឋកិច្ចមានបញ្ហាប្រឈម ហើយអំណាចទិញធ្លាក់ចុះ ម្ចាស់អាជីវកម្មចាំបាច់ត្រូវមានភាពបត់បែនខ្ពស់ ដើម្បីរក្សាលំនឹង និងការប្រកួតប្រជែងរបស់ខ្លួន។ ក្នុងនោះអ្នកប្រកបអាជីវកម្មត្រូវធ្វើពិពិធកម្មទីផ្សារ និងបន្ថែមផលិតផលដែលមានតម្លៃទាបជាងមុន, កាត់បន្ថយថ្លៃដើម និងសន្សំសំចៃប្រភពថាមពល, ពង្រឹងសាច់ប្រាក់បម្រុង និងពង្រឹងជំនាញឌីជីថលក្នុងអាជីវកម្មរបស់ខ្លួនជាដើម។ តែយ៉ាងណា បញ្ហានេះ ក៏ទាមទារឱ្យមានការជួយអន្តរាគមន៍ពីរដ្ឋផងដែរ។

ជាមួយគ្នានេះលោកបណ្ឌិត គី សេរីវឌ្ឍន៍ អ្នកសិក្សាស្រាវជ្រាវសេដ្ឋកិច្ច នៃរាជបណ្ឌិត្យសភាកម្ពុជាបានគូសបញ្ជាក់ថា បច្ចុប្បន្នអាជីវកម្មមួយចំនួននៅកម្ពុជាកំពុងប្រឈមមុខនឹងការបិទទ្វារ ដោយសារការធ្លាក់ចុះអំណាចទិញយ៉ាងគំហុក ក្រោយពលរដ្ឋរឹតត្បិតការចំណាយ។ ​សម្រាប់អ្នកជំនាញរូបនេះ ស្ថិតក្នុងស្ថានភាពដ៏លំបាកនេះ គឺទាមទារឱ្យមានកញ្ចប់អន្តរាគមន៍បន្ទាន់ពីរាជរដ្ឋាភិបាល បើមិនដូច្នេះទេស្ថានភាពសេដ្ឋកិច្ចកម្ពុជានឹងត្រូវប្រឈមមុខនឹងការដុនដាបកាន់តែខ្លាំងទៅៗ។ បើតាមអ្នកជំនាញរូបនេះ រដ្ឋាភិបាលត្រូវពន្លឿនការដាក់ចេញនូវវិធានការអន្តរាគមន៍មួយចំនួន ដូចជាយន្តការកាត់បន្ថយពន្ធលើប្រាក់ចំណូលសម្រាប់អាជីវកម្មដែលជួបបញ្ហាពិតប្រាកដ និងត្រូវការជំនួយបន្ទាន់ ដើម្បីកាត់បន្ថយការចំណាយប្រតិបត្តិការ។ បន្ថែមលើនេះ រដ្ឋាភិបាលក៏ត្រូវពិចារណាលើការកាត់បន្ថយថ្លៃដើមនាំចូល និងការដឹកជញ្ជូនផងដែរ ដើម្បីជួយសម្រាលបន្ទុកថ្លៃដើមទំនិញរបស់អាជីវកម្ម និងធានាឱ្យអ្នកប្រើប្រាស់មានលទ្ធភាពទិញឡើងវិញ។

គួរជម្រាបថា រាជរដ្ឋាភិបាលកម្ពុជាបានព្យាករកំណើនថា សេដ្ឋកិច្ចកម្ពុជានឹងសម្រេចបានកំណើនក្នុងរង្វង់៤%នៅឆ្នាំ២០២៦ និង៤,៨% នៅឆ្នាំ២០២៧។ ការព្យាករនេះ ត្រូវបានគណនាឡើងវិញដោយផ្អែកលើស្ថានភាពជាក់ស្តែង នៃម៉ាក្រូសេដ្ឋកិច្ច និងហិរញ្ញវត្ថុសាធារណៈតាមរយៈទិន្នន័យបច្ចុប្បន្នភាពចុងក្រោយក្នុងរយៈពេល៩ខែឆ្នាំ២០២៦៕