ទីភ្នាក់ងារព័ត៌មាន រ៉យទ័រ បានរាយការណ៍នៅថ្ងៃទី២៦ ខែតុលា ថា បណ្តាក្រុមហ៊ុនផលិតពេជ្រក្នុងមន្ទីរពិសោធន៍នៅចិន ដែលកំពុងក្តោបក្តាប់ការផ្គត់ផ្គង់ប្រមាណពាក់កណ្តាលនៅលើពិភពលោកកំពុងរំកិលខ្លួនចេញពីការផលិតត្បូងពេជ្រគ្រឿងអលង្ការធម្មតា ដោយសារទីផ្សារមានការប្រកួតប្រជែងកាន់តែខ្លាំង និងសម្ពាធនៃការធ្លាក់ចុះតម្លៃ។ ការផ្លាស់ប្តូរទិសដៅនេះមិនត្រឹមតែជាយុទ្ធសាស្ត្រអាជីវកម្មប៉ុណ្ណោះទេ ប៉ុន្តែថែមទាំងបង្កើនទម្ងន់យុទ្ធសាស្ត្រ នៃឧស្សាហកម្មនេះនៅក្នុងការប្រកួតប្រជែងបច្ចេកវិទ្យារវាងមហាអំណាចអាម៉េរិក និងចិនផងដែរ។ ប្រសិនបើពេជ្រផលិតក្នុងមន្ទីរពិសោធន៍ត្រូវបានយកទៅប្រើប្រាស់កាន់តែទូលំទូលាយក្នុងឧបករណ៍អេឡិចត្រូនិក បន្ទះឈីប និងប្រព័ន្ធបន្ធូរកម្ដៅ នៃហេដ្ឋារចនាសម្ព័ន្ធ AI នោះ ភាពលេចធ្លោលើសមត្ថភាពផលិតកម្មរបស់ចិនអាចនឹងក្លាយជាចំណុចខ្លាំងនៅក្នុងខ្សែច្រវាក់ផ្គត់ផ្គង់ AI។
ក្រុមអ្នកវិភាគ និងបណ្តាក្រុមហ៊ុនផលិតបានលើកឡើងថា ការផ្លាស់ប្តូរតម្រូវការរបស់វិស័យផ្សេងៗដូចជាបន្ទះឈីប ប្រព័ន្ធគ្រប់គ្រងកម្ដៅ និងបច្ចេកវិទ្យាកុំព្យូទ័រ នឹងក្លាយជាក្បាលម៉ាស៊ីនជំរុញកំណើនបន្ទាប់ ដ៏មានឥទ្ធិពលសម្រាប់ឧស្សាហកម្មពេជ្រ។ មូលហេតុ គឺដោយសារពេជ្រផលិតក្នុងមន្ទីរពិសោធន៍មានលក្ខណៈសម្បត្តិពិសេសក្នុងការស្រូប និងបញ្ចេញកម្ដៅជួយបង្កើនប្រសិទ្ធភាពការងារ និងល្បឿនរបស់ឧបករណ៍អេឡិចត្រូនិកកម្រិតខ្ពស់។
សញ្ញានៃការផ្លាស់ប្តូរនេះបានលេចឡើងកាន់តែច្បាស់កាលពីខែមិថុនា កន្លងទៅ បន្ទាប់ពីលោក លីប ប៊ូ តាន់ (Lip-Bu Tan) នាយកប្រតិបត្តិក្រុមហ៊ុន Intel បានទម្លាយថា លោកបានដាក់ទុនវិនិយោគផ្ទាល់ខ្លួននៅក្នុងក្រុមហ៊ុន Diamond Foundry ដែលជាក្រុមហ៊ុនផលិតពេជ្រក្នុងមន្ទីរពិសោធន៍ កំពុងអភិវឌ្ឍបន្ទះឈីបពេជ្រកម្រិតខ្ពស់។
ទន្ទឹមគ្នានេះ ក្រុមហ៊ុនផលិតពេជ្រក្នុងមន្ទីរពិសោធន៍ធំៗនៅក្នុងប្រទេសចិន ក៏បានចាប់ផ្តើមបោះទុនវិនិយោគ ដើម្បីត្រៀមលក្ខណៈឆ្លើយតបនឹងកំណើនតម្រូវការនាពេលអនាគតផងដែរ។ ក្នុងនោះក្រុមហ៊ុន ហ៊ើណាន លីលៀង ដាយម៉ុន (Henan Liliang Diamond) បានរៀបចំផែនការបង្វែរថវិការហូតដល់ ជាង១៤៩លានដុល្លារអាម៉េរិក ដើម្បីពង្រីកខ្សែច្រវាក់ផលិតកម្មពេជ្របម្រើឱ្យវិស័យបច្ចេកវិទ្យាទំនើបវិញ។
ប្រសិនបើបន្ទះឈីបពេជ្រសម្រាប់គ្រប់គ្រងកម្ដៅត្រូវគេយកទៅប្រើប្រាស់កាន់តែទូលំទូលាយនៅក្នុងបន្ទះឈីប AI និងមជ្ឈមណ្ឌលទិន្នន័យនោះ ក្រុមហ៊ុនចិននឹងក្លាយជាគូប្រជែងដ៏ខ្លាំងក្លាជាមួយក្រុមហ៊ុនផលិតសម្ភារបន្ធូរកម្ដៅធំៗនៅលើពិភពលោកជាក់ជាមិនខាន៕
អត្ថបទៈ សួន ឡង់ទី. រូបភាពៈ ឯកសារបរទេស
