ក្នុងជំនួបពិភាក្សាការងារជាមួយនឹងឯកឧត្តម ប៉ាន់យ៉ារ៉ាក់ ពលទ័ព ឯកអគ្គរាជទូតថៃថ្មីប្រចាំកម្ពុជា កាលពីដើមសប្ដាហ៍នេះ ឯកឧត្តមថោង ខុន រដ្ឋមន្ត្រីក្រសួងទេសចរណ៍ បានលើកឡើងថា ប្រទេសទាំងពីរ កម្ពុជា និងថៃ បានឯកភាពគ្នា ដើម្បីជំរុញឲ្យមានលំហូរភ្ញៀវទេសចររវាងប្រទេសទាំងពីរ ក៏ដូចជាការសហការគ្នាទាញយកភ្ញៀវទេសចរបរទេសកាន់តែច្រើនផងដែរ។
ឯកឧត្តមរដ្ឋមន្ត្រី ថោង ខុន បានថ្លែងថា ប្រទេសថៃ គឺជាកន្លែងប្រមូលផ្តុំទេសចរបរទេស ខណៈដែលប្រទេសក្បែរខាងកម្ពុជាមួយនេះ ទទួលបានទេសចរបរទេសជាង ៣០លាននាក់ ក្នុងមួយឆ្នាំៗ។ ជាមួយគ្នានេះ ប្រទេសថៃ ក៏សម្បូរជើងហោះហើរត្រង់ពីប្រទេសនានាក្នុងពិភពលោក ដូចជាមកពីអឺរ៉ុប អាមេរិក អូសេអាននី ជប៉ុន កូរ៉េ ចិនផងដែរ ខណៈដែលកម្ពុជាមិនទាន់មានជើងហោះហើរត្រង់ពីប្រទេសឆ្ងាយៗមួយចំនួននៅឡើយទេ។ ដូច្នេះហើយ នេះជាឱកាសដែលកម្ពុជាត្រូវសហការជាមួយប្រទេសថៃ ដើម្បីរួមគ្នាទាក់ទាញទេសចរប្រទេសទីបីឲ្យបានកាន់តែច្រើន។
អត្ថបទគួរអាន!
កាលពីឆ្នាំ ២០១៧ កន្លងទៅ ទេសចរថៃ បានចូលមកកម្សាន្ដនៅកម្ពុជាជិត ៤០ម៉ឺននាក់ ខណៈដែលទេសចរពីកម្ពុជាទៅលេងកម្សាន្ដប្រទេសថៃវិញ មានជាង ៧០ម៉ឺននាក់។ ដោយឡែក នៅឆ្នាំ២០១៨នេះ ប្រទេសទាំងពីរ រំពឹងទុកថា ទេសចរដែលទៅមកប្រទេសរៀងៗខ្លួន នឹងបន្តកើនឡើងថែមទៀត ប៉ុន្តែ ត្រូវតែមានការបើកច្រកទ្វារអន្តរជាតិកម្ពុជា-ថៃ ឲ្យបានច្រើនថែមទៀតដែរ។
មិនត្រឹមតែជាដៃគូក្នុងផ្នែកទេសចរណ៍ ប៉ុណ្ណោះទេ ថៃ និងកម្ពុជា ក៏ជាដៃគូពាណិជ្ជកម្មដ៏សំខាន់ផងដែរ។ តួយ៉ាង កាលពីឆ្នាំ ២០១៧កន្លងទៅ ទំហំពាណិជ្ជកម្ម កម្ពុជា និងថៃមានជាង៦ពាន់លានដុល្លារអាមេរិក កើនឡើង១០% ធៀបនឹងឆ្នាំ២០១៦។ រីឯ នៅឆ្នាំ ២០២០ខាងមុខនេះ ប្រទេសទាំងពីរបានប្តេជ្ញាចិត្តថា នឹងពង្រីកទំហំពាណិជ្ជកម្មទ្វេភាគីឲ្យបានកើនដល់ ១៥ពាន់លានដុល្លារអាមេរិក៕
None
