មួយរយៈចុងក្រោយនេះ ផ្សារទំនើបធំៗណាខ្លះ បានបើកដំណើរការ និងពង្រីកសាខា?
មួយរយៈចុងក្រោយនេះ គេសង្កេតឃើញថា ចំនួនផ្សារទំនើបធំៗជាច្រើន បានបើកដំណើរការជាបន្តបន្ទាប់ ខណៈដែលគម្រោងបុកគ្រឹះសាងសង់ផ្សារទំនើបថ្មីៗ ក៏នៅតែបន្តមានផងដែរ។ ជាក់ស្ដែង ផ្សារទំនើបអ៊ីអន ដែលបច្ចុប្បន្នអាចចាត់ទុកថា ជាផ្សារទំនើបខ្នាតយក្សធំជាងគេបង្អស់មួយនៅកម្ពុជា ទើបតែបានបើកសម្ពោធសាខាទី២ របស់ខ្លួនកាលពីប៉ុន្មានខែមុននេះ ក្រោយពីផ្សារទំនើបរបស់ជប៉ុនមួយនេះ បានឈានជើងចូលកម្ពុជាលើកដំបូងនៅឆ្នាំ ២០១៤។ បើគិតទាំងសាខាទី១ និងទី២ ផ្សារទំនើបអ៊ីអននេះ បានបោះទុនជាង ៣០០លានដុល្លារហើយ សម្រាប់វិនិយោគនៅកម្ពុជា ខណៈដែលសាខាទី ៣ ត្រូវបាន គេដឹងថាអាចនឹងចាប់ផ្ដើមសាងសង់ឆាប់ៗនេះ ដែលមានទីតាំងនៅតាមបណ្ដោយផ្លូវ៦០ម៉ែត្រ (ផ្លូវសម្តេចតេជោ ហ៊ុន សែន)។
អត្ថបទទាក់ទង!
បន្ថែមពីនេះ ផ្សារទំនើបលក់ទំនិញបោះដុំពីប្រទេសថៃ ដ៏ធំ គឺផ្សារម៉ាក្រូ ក៏ត្រៀមនឹងសាងសង់សាខាទី២ របស់ខ្លួនផងដែរ នៅខេត្តសៀមរាប ដែលគ្រោងចំណាយទុនប្រមាណ ១៥លានដុល្លារអាមេរិក ក្រោយពីផ្សារទំនើបយីហោពីប្រទេសថៃមួយនេះ បានឈានជើងចូលកម្ពុជានៅចុងឆ្នាំ ២០១៧កន្លងទៅ។ បើតាម ការអះអាងពីនាយកគ្រប់គ្រងផ្សារម៉ាក្រូ ធ្លាប់បានប្រាប់ខេមបូណូមីសថា នឹងបើកសាខាឲ្យបានដល់ ៩កន្លែងនៅទូទាំងប្រទេសកម្ពុជា។
ជាមួយគ្នានេះ នៅចុងឆ្នាំនេះដែរ មានផ្សារទំនើបថ្មីមួយទៀត ឈ្មោះថា Mid Town Mall របស់វិនិយោគិនតៃវ៉ាន់ ក៏នឹងបើកឲ្យដំណើរការផងដែរ។
តាមរបាយការណ៍ពី ក្រុមហ៊ុនអចលនទ្រព្យ CBRE បានបង្ហាញថា គិតមកដល់ពេលនេះ ចំនួនផ្សារទំនើបបែបបស្ចិមប្រទេសនៅកម្ពុជាមានប្រមាណ ១៣ ផ្សារទំនើប ស្មើនឹងជាង ៣៧ម៉ឺនម៉ែត្រការ៉េ។ ចំនួននេះរាប់ទាំងរាជធានីភ្នំពេញ និងនៅបណ្តាខេត្ត ហើយខេត្តដែលទើបរីកចម្រើនខ្លាំងនូវការអភិវឌ្ឍផ្សារទំនើប គឺខេត្តសៀមរាប និងបន្តទៀតនឹងរីកទៅដល់ខេត្តព្រះសីហនុ។
គម្រោងផ្សារទំនើបជិត ១០ ទីតាំង នឹងបើកដំណើរការនៅប្រមាណ ២ ទៅ៣ឆ្នាំក្រោយ
ក្រៅពីផ្សារទំនើបធំៗទាំងពីរខាងលើ ដែលបានបើកដំណើរការ ក៏មានគម្រោងផ្សារទំនើបរបស់ក្រុមហ៊ុនក្នុងស្រុកធំៗចំនួន២ ទៀត ក៏ទើបតែបានប្រកាសបុកគ្រឹះសាងសង់ដែរ ខណៈដែលនៅប្រមាណតែ ២ ទៅ៣ឆ្នាំទៀតប៉ុណ្ណោះ ផ្សារទំនើបថ្មីៗប្រមាណ ជិត១០ សាខា នឹងបើកដំណើរ ក្រោយពីគម្រោងផ្សាររបស់ក្រុមទាំងពីរនេះត្រូវបានបញ្ចប់។
តួយ៉ាង ក្រុមហ៊ុនជីប ម៉ុង នាពេលថ្មីៗនេះ បានប្រកាសចំណាយទុនជាង ២៥០ លានដុល្លារអាមេរិក សាងសង់ផ្សារទំនើបចំនួន ៥សាខា ដែលសាខានីមួយៗ គ្រោងនឹងបញ្ចប់យូរបំផុតត្រឹមឆ្នាំ ២០២០-២០២១ខាងមុខ។ រីឯ ក្រុមហ៊ុន បុរីប៉េង ហួត ក៏មិនឲ្យចាញ់ក្រុមហ៊ុន ជីបម៉ុង ប៉ុន្មានដែរ ដោយកាលពេលកន្លងទៅនេះ បានសម្ពោធបុកគ្រឹះសាងសង់ផ្សារទំនើបគ្រាក់ៗ ចំនួន ២ទីតាំងដែរ ដោយចំណាយទុនប្រមាណ ២៦០ លានដុល្លារអាមេរិក ខណៈដែលពេលវេលាសាងសង់បញ្ចប់គម្រោង គឺដូចគ្នាទៅនឹងគម្រោងផ្សាររបស់ក្រុមហ៊ុនជីបម៉ុងដែរ។
គួររំឭកដែរថា តាមព័ត៌មានដែលខេមបូណូមីសទទួលបាន ក្រុមហ៊ុនវិនិយោគ និងគ្រប់គ្រងផ្សារទំនើបដ៏ធំរបស់ថៃ Central Group ក៏បាននិងកំពុងសិក្សាពីឱកាស និងលទ្ធភាពមួយចំនួន ដើម្បីវិនិយោគនៅកម្ពុជាផងដែរ ខណៈដែលកន្លងទៅថ្មីៗនេះ ក្រុមហ៊ុនយក្សមួយនេះ បានពង្រីកការវិនិយោគរួចទៅហើយនៅប្រទេសវៀតណាម។
ចំនួនផ្សារទំនើបទាំងនេះ នៅមិនទាន់រាប់បញ្ចូលផ្សារទំនើបមួយចំនួន នៅតាមគម្រោងអគារពាណិជ្ជកម្មធំៗមួយចំនួនទៀតផងដូចជា គម្រោងផ្សារទំនើបនៅក្នុងអគារអូឡាំព្យាស៊ីធី និង The Bridge ជាដើម។ល។
ផ្សារទំនើបធំៗចំនួន ២ ដែលជាប់គាំង និងមិនទាន់មានតម្រុយបើកដំណើរការ
ដ្បិតថាផ្សារទំនើបកំពុងរីកដូចផ្សិតក៏ដោយចុះ ប៉ុន្ដែ ក៏មានផ្សារទំនើបធំៗចំនួន២ កំពុងជាប់គាំង មិនបើកដំណើរការ ខណៈដែលការសាងសង់ត្រូវបានអូសបន្លាយអស់រយៈពេលជាច្រើនឆ្នាំមកហើយ គិតមកទល់ពេលនេះ។
ទី១ គឺផ្សារទំនើប Young Commercial ដែលផ្សារនេះ ត្រូវបានដឹងថា វិនិយោគក្នុងទំហំទឹកប្រាក់ ១៥លានដុល្លារ នៅតាមបណ្ដោយផ្លូវជាតិ លេខ៦A។ ផ្សារដែលមានការសាងសង់ជារូបរាងជាកញ្ចក់បិទជុំវិញមួយនេះ ត្រូវបានវិនិយោគដោយវិនិយោគិនខ្មែរ និងធ្លាប់បានបើកដំណើរការនៅឆ្នាំ២០១៣ តែក្រោយមកក៏ផ្អាកដំណើរការវិញមកដល់បច្ចុប្បន្ន។ កាលពីអំឡុងផ្សារមួយនេះ បើកដំបូង វត្តមានរបស់វា ត្រូវបានគេចាត់ទុកថា គឺជាផ្សារទំនើបធំជាងគេមួយនៅរាជធានីភ្នំពេញ ពិសេសនៅតំបន់ជ្រោយចង្វារ។ រហូតមកទល់ពេលនេះ ផ្សារទំនើប Young Commercial នេះ គេនៅមិនទាន់ដឹងថា នឹងបើកដំណើរការឡើងវិញនៅពេលណានៅឡើយទេ ខណៈដែលបច្ចុប្បន្នកំពុងនៅបន្តដាក់ការដ្ឋានជួសជុល។
អត្ថបទគួរឲ្យចាប់អារម្មណ៍!
ទី២ គឺផ្សារទំនើប Parkson ដែលផ្សារទំនើបយីហោពីម៉ាឡេស៊ីមួយនេះ ត្រូវបានគេចាត់ទុកថា ជាដៃគូប្រជែងធំមួយរបស់ផ្សារទំនើប អ៊ីអន ហើយប្រហែលជាមានមនុស្សមិនតិចនោះដែរ ដែលរង់ចាំឡើងដើរកម្សាន្ដនៅផ្សារមួយនេះ។
ត្រូវបានចាប់ផ្ដើមសាងសង់តាំងពីឆ្នាំ ២០១២ និងធ្លាប់ប្រកាសថា បើកដំណើរការនៅឆ្នាំ២០១៥ លុះក្រោយមកទៀតប្រកាសថា នឹងបើកដំណើរការនៅដើមឆ្នាំ ២០១៧ ប៉ុន្ដែ គិតមកទល់ជាងពាក់កណ្ដាលឆ្នាំ២០១៨នេះទៅហើយ ផ្សារទំនើប Parkson នេះ នៅមិនទាន់បានបើកដំណើរការនៅឡើយទេ។ ទោះជាយ៉ាងនេះក្ដី តាមព័ត៌មានដែលបានចុះផ្សាយនាពេលកន្លងមក ផ្សារយីហោរបស់ម៉ាឡេស៊ីមួយនេះ ក៏ធ្លាប់បានបង្ហាញពីមហិច្ឆតារបស់ខ្លួនថា នឹងសាងសង់ជាច្រើនសាខានៅកម្ពុជាផងដែរ។
ស្របពេលដែល ផ្សារទំនើប Parkson នៅកម្ពុជាមិនទាន់បើកដំណើរការ កាលពីដើមឆ្នាំ ២០១៨ ផ្សារទំនើប Parkson នៅប្រទេសវៀតណាម ត្រូវបានបិទទ្វារ ៤សាខារួចហើយ។
គួរជម្រាបដែរថា កំណើនផ្សារទំនើបធំៗថ្មីៗ ដែលបានរីកដុះឡើងនាពេលបច្ចុប្បន្ន ក៏កំពុងធ្វើទុក្ខបុកម្នេញដល់វឌ្ឍនភាពរបស់ផ្សារទំនើបវ័យចំណាស់ក្នុងស្រុកមួយចំនួនផងដែរ ដូចជាផ្សារទំនើប សូរិយ៉ា និងផ្សារទំនើបសុវណ្ណាជាដើម។ យ៉ាងណាក៏ដោយ ផ្សារទំនើបក្នុងស្រុកទាំងនោះ ក៏បានខិតខំដកដង្ហើមណាស់ដែរ ដ្បិតថាទីផ្សារការប្រកួតប្រជែងកាន់តែយ៉ាប់យឺនពីមួយថ្ងៃទៅមួយថ្ងៃ។ តួយ៉ាង ផ្សារទំនើបសូរិយ៉ា កាលពីពេលកន្លងទៅ បានធ្វើការកែប្រែ និងបន្ថែមនូវរចនាបទថ្មីៗនៃអគារខាងក្នុង និងខាងក្រៅ ក៏ដូចជាលក្ខណៈពិសេសផ្សេងៗទៀត ដើម្បីទាក់ទាញអតិថិជនឲ្យត្រឡប់មកវិញ ប៉ុន្ដែ វាមិនស្រួលប៉ុន្មានទេ ពោលគឺ ដូចជាការទប់ទឹកទំនប់ ដែលកំពុងបាក់យ៉ាងដូច្នេះដែរ៕
None
