ក្រសួងសុខាភិបាលនៅថ្ងៃទី១៩ ខែមីនានេះ បានប្រកាសអំពីករណីអ្នកស្លាប់ដោយសារតែកូវីដ-១៩ ចំនួន២នាក់បន្ថែមទៀត ដោយម្នាក់ជាស្ត្រីមានវ័យ៦២ឆ្នាំ ដែលគេស្គាល់ថាជាភរិយារបស់តារាចម្រៀងជើងចាស់ លោក ហួរ ឡាវី និងត្រូវជាម្ដាយរបស់តារាចម្រៀងស្រីវ័យក្មេង ឈ្មោះ វី ឌីណែត។ និងករណីស្លាប់ម្នាក់ទៀត ជាបុរសមានវ័យ៤៦ឆ្នាំ។ អ្នកស្លាប់ទាំងពីរនេះ គឺត្រូវបានរកឃើញវិជ្ជមានកូវីដ-១៩ នៅថ្ងៃទី១០ ខែមីនា ឆ្នាំ២០២១ ដូចគ្នា។
ដោយឡែក ករណីស្លាប់លើកទី១ កាលពីថ្ងៃទី ១១ ខែមីនា គឺជាបុរសវ័យ៥០ឆ្នាំ ដែលជាអ្នកបើកបរឲ្យថៅកែជនជាតិចិននៅខេត្តព្រះសីហនុ។
សូមបញ្ជាក់ថា អ្នកស្លាប់ទាំង៣នាក់ខាងលើនេះ សុទ្ធសឹងតែជាជនជាតិខ្មែរ និងបានឆ្លងកូវីដ-១៩ នៅក្នុងព្រឹត្តិការណ៍សហគមន៍២០កុម្ភៈ។
អត្ថបទទាក់ទង!
គិតត្រឹមថ្ងៃទី ១៩ ខែមីនា ចំនួនអ្នកឆ្លងសរុបក្នុងព្រឹត្តិការណ៍សហគមន៍២០កុម្ភៈនេះ បានកើនដល់១.០៦២នាក់ហើយ។
ក្រោយពីមានករណីស្លាប់ដោយសារកូវីដ-១៩ កើនដល់៣ករណីនៅកម្ពុជា ក្រសួងសុខាភិបាល និងអង្គការសុខភាពពិភពលោក បានចាត់ទុកថា ស្ថានភាពជំងឺកូវីដ-១៩ នៅកម្ពុជាសព្វថ្ងៃមានលក្ខណៈធ្ងន់ធ្ងរ និងត្រូវតែបង្កើនល្បឿននៃកិច្ចខិតខំប្រឹងប្រែងដើម្បីបញ្ឈប់ឲ្យបាននូវការឆ្លងរាលដាល នៅអំឡុងពេលប៉ុន្មានថ្ងៃ ឬសប្ដាហ៍ខាងមុខនេះ។
លោស្រីវេជ្ជបណ្ឌិត លី អៃឡាន តំណាងអង្គការសុខភាពពិភពលោកប្រចាំកម្ពុជា បានមានប្រសាសន៍ថា «សោកនាដកម្មនៃការបាត់បង់ជីវិតជាលើកដំបូងដោយសារជំងឺកូវីដ-១៩ ជាសារក្រើនរំឭកយើងទាំងអស់គ្នាអំពីភាពធ្ងន់ធ្ងរនៃជំងឺនេះ។ ជំងឺនេះ អាចវាយប្រហារយើងគ្រប់គ្នានៅគ្រប់ពេលវេលា»។
លោកជំទាវ ឱ វណ្ណឌីន អ្នកនាំពាក្យក្រសួងសុខាភិបាល បានមានប្រសាសន៍ដែរថា «ពេលនេះជាស្ថានភាពអាសន្នមួយ។ យើងគ្រប់គ្នាត្រូវតែអនុវត្តវិធានការការពារជាចាំបាច់ ដើម្បីកាត់បន្ថយហានិភ័យនៃការឆ្លងជំងឺកូវីដ-១៩ និងដើម្បីកាត់ផ្ដាច់ខ្សែចម្លងជំងឺនេះ ឲ្យបានកាន់តែឆាប់រហ័ស តាមដែលអាចធ្វើទៅបាន»។
លោកជំទាវ ក៏បានអំពាវនាវឲ្យប្រជាពលរដ្ឋទាំងអស់ត្រូវអនុវត្តវិធានការ ៣ការពារ និង៣កុំ ដូចជាត្រូវពាក់ម៉ាស់ឲ្យបានត្រឹមត្រូវ លាងសម្អាតដៃជាប្រចាំជាមួយនឹងសាប៊ូ ឬអាល់កុល ជែល និងរក្សាគម្លាតពីគ្នាឲ្យបានយ៉ាងតិច១ម៉ែត្រកន្លះ និងមិនត្រូវទៅកន្លែងដែលបិទជិត មិនមានខ្យល់ចេញចូលគ្រប់គ្រាន់ កន្លែងមានមនុស្សច្រើនអ៊ូអរ មិនត្រូវប៉ះពាល់គ្នា ចាប់ដៃគ្នា ឬក៏ឱបគ្នាឡើយ៕
None
