កិច្ចចរចាព្រមព្រៀងពាណិជ្ជកម្មសេរីនេះ ត្រូវបានបញ្ចប់ជាស្ថាពរក្រោយពី មានកិច្ចប្រជុំរួមគ្នាតាមប្រព័ន្ធវីដេអូអនឡាញ រវាងឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មកម្ពុជា និងលោក Zhong Shan រដ្ឋមន្រ្តីក្រសួងពាណិជ្ជកម្មចិន នាថ្ងៃទី ២០ ខែកក្កដា ឆ្នាំ២០២០នេះ។
ក្រសួងពាណិជ្ជកម្មបញ្ជាក់ថា ការបញ្ចប់ការចរចាលើកិច្ចព្រមព្រៀងពាណិជ្ជកម្មសេរីមួយដោយជោគជ័យ ក្នុងរយៈពេលមួយដ៏ខ្លីនេះ បានបង្ហាញពីឆន្ទៈនៃថ្នាក់ដឹកនាំនៃប្រទេសទាំងពីរ ក្នុងការពង្រឹងទំនាក់ទំនងឱ្យកាន់តែជិតស្និត និងទូលំទូលាយ ដោយកិច្ចព្រមព្រៀងពាណិជ្ជកម្មសេរីនេះ នឹងផ្ដល់ផលប្រយោជន៍សេដ្ឋកិច្ច និងសង្គមជាច្រើន ដល់ប្រជាជននៃប្រទេសទាំងពីរ តាមរយៈការធ្វើសេរីភាវូបនីយកម្មពាណិជ្ជកម្មទំនិញ និងសេវា ការជំរុញការវិនិយោគទូលំទូលាយ ក៏ដូចជាកិច្ចសហប្រតិបត្តិការលើវិស័យមួយចំនួនទៀតផងដែរ។អត្ថបទទាក់ទង!
ជាជំហានបន្ទាប់ ភាគីទាំងពីរនឹងអនុវត្តនីតិវិធីផ្ទៃក្នុងរៀងៗខ្លួន ដើម្បីឈានទៅចុះហត្ថលេខាលើកិច្ចព្រមព្រៀងពាណិជ្ជកម្មសេរីទ្វេភាគី នៅក្នុងឆ្នាំ២០២០ នេះ។
ស្ថានទូតចិនប្រចាំកម្ពុជាបានអះអាងលើទំព័រហ្វេសប៊ុកផ្លូវការរបស់ខ្លួនដែរថា ប្រទេសទាំងពីរ គឺកម្ពុជា និងចិនបានបញ្ចប់កិច្ចចរចាព្រមព្រៀងពាណិជ្ជកម្មសេរី ដែលមានទិសដៅប្រកបដោយអត្ថប្រយោជន៍ ទាំងនេះនឹងជាកម្លាំងជំរុញថ្មីមួយក្នុងការពន្លឿនការកសាងសហគមន៍ជោគវាសនារួមរវាងចិននិងកម្ពុជាប្រកបដោយអត្ថន័យយុទ្ធសាស្ត្រ។ ភាគីទាំងពីរ នឹងអនុវត្តតាមនីតិវិធីក្នុងប្រទេសរៀងៗខ្លួន ខិតខំសម្រេចឲ្យបានការចុះហត្ថលេខាលើកិច្ចព្រមព្រៀងពាណិជ្ជកម្មសេរីនៃទ្វេភាគីឲ្យបានឆាប់រហ័ស។
តាមការបញ្ជាក់របស់ស្ថានទូតចិន កិច្ចចរចាព្រមព្រៀងពាណិជ្ជកម្មសេរីរវាង ចិននិងកម្ពុជាត្រូវបានចាប់ផ្តើមនាចុងឆ្នាំ២០១៩ ដំណើរការតែជាងពាក់កណ្ដាលឆ្នាំក៏ឈានដល់ការឯកភាពគ្នា នេះបានបង្ហាញពីកម្រិតខ្ពស់នៃទំនាក់ទំនងដៃគូកិច្ចសហប្រតិបត្តិការយុទ្ធសាស្រ្តគ្រប់ជ្រុងជ្រោយរវាងប្រទេសទាំងពីរ។
ឯកឧត្តម វង្សី វិស្សុត រដ្ឋលេខាប្រចាំការនៃក្រសួងសេដ្ឋកិច្ច និងហិរញ្ញវត្ថុធ្លាប់បានអះអាងនៅក្នុងសន្និសីទព័ត៌មាននាពេលថ្មីៗនេះថា បើមិនមានអ្វីប្រែប្រួលទេនោះ សម្តេច ហ៊ុន សែន នាយករដ្ឋមន្ត្រីកម្ពុជា នឹងធ្វើដំណើរទៅកាន់រដ្ឋធានីប៉េកាំងប្រទេសចិន នៅមុនថ្ងៃទី ១២ សីហា ឆ្នាំ២០២០ ដើម្បីធ្វើជាអធិបតីភាពនៃការចុះហត្ថលេខាបញ្ចប់កិច្ចព្រមព្រៀងពាណិជ្ជកម្មសេរីរវាងកម្ពុជា-និងចិន។
ការធ្វើដំណើររបស់នាយករដ្ឋមន្ត្រីកម្ពុជា ទៅកាន់រដ្ឋធានីប៉េងកាំងនៅមុនថ្ងៃទី ១២ សីហានេះ ត្រូវបានគេមើលឃើញថា គឺធ្វើឡើងនៅមុនថ្ងៃដែលសហភាពអឺរ៉ុបកំណត់នឹងចាប់ផ្ដើមអនុវត្តការព្យួរប្រព័ន្ធអនុគ្រោះពន្ធEBA ពីកម្ពុជា ដែលសហភាពអឺរ៉ុបបានកំណត់យកថ្ងៃទី ១២ ខែសីហាឆ្នាំ២០២០ គឺជាថ្ងៃចាប់ផ្ដើមអនុវត្ត។
តាមមន្ត្រីជាន់ខ្ពស់របស់រាជរដ្ឋាភិបាលកម្ពុជា ធ្លាប់បានអះអាងថា កិច្ចព្រមព្រៀងពាណិជ្ជកម្មសេរីរវាងកម្ពុជា និងចិននេះ នឹងជួយជំរុញដល់ការនាំចេញរបស់កម្ពុជាបន្ថែមទៀត ពិសេសគឺមុខទំនិញកសិកម្ម៕
None
