ទីបំផុតតុលាការសហភាពអឺរ៉ុបសម្រេចឲ្យកម្ពុជាឈ្នះក្តីលើបណ្តឹងតវ៉ារបស់សហព័ន្ធស្រូវអង្ករកម្ពុជាចំពោះសេចក្តីសម្រេចរបស់គណៈកម្មការអឺរ៉ុប ដែលបានដកហូតការអនុគ្រោះពន្ធសម្រាប់ការនាំចូលអង្ករគ្រាប់វែងពីកម្ពុជាទៅកាន់ទីផ្សារអឺរ៉ុប ក្រោយក្រាញននៀលតវ៉ាមកអស់រយៈពេលជាង៣ឆ្នាំកន្លងមក។ សហព័ន្ធស្រូវអង្ករកម្ពុជា ដែលកាលណោះដឹកនាំដោយឯកឧត្តម សុខ ពុទ្ធិពុធ បានដាក់ពាក្យបណ្តឹងទៅតុលាការសហភាពអឺរ៉ុបកាលពីថ្ងៃទី១០ ខែមេសា ឆ្នាំ២០១៩ ដើម្បីស្វែងរកយុត្តិធម៌សម្រាប់ការនាំចូលអង្កររបស់កម្ពុជា ដែលគណៈកម្មការអឺរ៉ុបសម្រេចយកពន្ធដោយអយុត្តិធម៌។
នៅក្នុងសេចក្តីជូនដំណឹងរបស់សហព័ន្ធស្រូវអង្ករកម្ពុជា ដែលចេញផ្សាយនៅថ្ងៃទី១ ខែធ្នូ ឆ្នាំ២០២២ បានលើកឡើងថា តុលាការសហភាពអឺរ៉ុបបានឲ្យកម្ពុជាឈ្នះក្តីលើសំណុំរឿងខាងលើកាលពីថ្ងៃទី៩ វិច្ឆិកា ឆ្នាំ២០២២ និងបានចាត់ទុកការសម្រេចរបស់គណៈកម្មការអឺរ៉ុបក្នុងការយកពន្ធមកលើអង្កររបស់កម្ពុជាពេលនាំចេញទៅទីផ្សារអឺរ៉ុប គឺជាវិធានការខុសច្បាប់ និងមិនមានភស្តុតាងគ្រប់គ្រាន់។
សម្រាប់កម្ពុជាការសម្រេចឲ្យកម្ពុជាឈ្នះក្តីលើគណៈកម្មការអឺរ៉ុបរបស់តុលាការសហភាពអឺរ៉ុប គឺបានឆ្លុះបញ្ចាំងពីភាពត្រឹមត្រូវនៃការអភិវឌ្ឍន៍វិស័យស្រូវអង្ករនៅកម្ពុជាក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។
អត្ថបទគួរអាន
គួរបញ្ជាក់ថា សភាពាណិជ្ជកម្មសហភាពអឺរ៉ុបបានសម្រេចយកពន្ធលើការនាំចេញអង្ករពីកម្ពុជាទៅកាន់ទីផ្សារអឺរ៉ុបក្នុងអត្រាពន្ធជិត២០០ដុល្លារសម្រាប់អង្ករ១តោន កាលពីថ្ងៃទី២០ ខែមករា ឆ្នាំ២០១៩។ បន្ទាប់មកពន្ធនេះ បានធ្លាក់មកនៅត្រឹមជាង១៧០ដុល្លារក្នុង១តោន នៅឆ្នាំ២០២០ និងបន្តធ្លាក់មក១៤១ដុល្លារក្នុង១តោន នៅឆ្នាំ២០២១។ ក្រោយមកនៅថ្ងៃទី២០ ខែមករា ឆ្នាំ២០២២ សភាពាណិជ្ជកម្មសហភាពអឺរ៉ុបបានសម្រេចលើកលែងការពន្ធលើការនាំចូលអង្ករកម្ពុជាទៅកាន់ទីផ្សារអឺរ៉ុបឡើងវិញ ដោយថ្នាក់ដឹកនាំសហព័ន្ធស្រូវអង្ករកម្ពុជារំពឹងថា ទីផ្សារអឺរ៉ុបនឹងអាចស្រូបទាញការនាំចូលអង្ករកម្ពុជាបាន៤០%ឡើងវិញនៅឆ្នាំនេះ បន្ទាប់ពីមានការធ្លាក់ចុះនៅ៣ឆ្នាំជាប់គ្នារួចមក៕
