ប្រព័ន្ធអនុគ្រោះពន្ធអ្វីគ្រប់យ៉ាង លើកលែងតែអាវុធ ឬហៅថា EBA បានផ្ដល់ប្រយោជន៍ជាច្រើនដល់បណ្ដាប្រទេសដែលមានចំណូលទាប ដែលក្នុងនោះ ក៏មានប្រទេសកម្ពុជាផងដែរ។ តែមួយរយៈចុងក្រោយនេះ មានការលើកឡើងផ្សេងៗគ្នា ពីរឿងសហភាពអឺរ៉ុប ដក ឬមិនដកប្រព័ន្ធអនុគ្រោះពន្ធនេះ ពីប្រទេសកម្ពុជា។ អ្នកជំនាញមួយចំនួន បានមើលឃើញថា ការដក ឬមិនដក EBA ពីកម្ពុជា ដោយសហភាពអឺរ៉ុបនេះ គឺគេត្រូវមើលទៅលើកត្តានយោបាយ និងសិទ្ធិមនុស្សនៅកម្ពុជា។
ទោះជាយ៉ាងនេះក្ដី ឯកឧត្តម GEORG EDGAR ឯកអគ្គរដ្ឋទូតសហភាពអឺរ៉ុប ប្រចាំកម្ពុជា បានលើកឡើងថា ការឈានទៅសម្រេចថា តើប្រព័ន្ធ អនុគ្រោះពន្ធ EBA ត្រូវដក ឬមិនដក ពីកម្ពុជានោះ? គេត្រូវការពេលវេលាយូរទៀត ដែលយ៉ាងហោចណាស់ក៏ ១ឆ្នាំដែរ ខណៈដែលបច្ចុប្បន្ន សហភាពអឺរ៉ុបកំពុងតែរៀបចំដំណើរការទៅរកសេចក្ដីសម្រេចនេះហើយ ហើយក៏កំពុងស្ថិតក្នុងការចរចាជាមួយរាជរដ្ឋាភិបាលកម្ពុជាផងដែរ។
អត្ថបទទាក់ទង!
ឯកឧត្តម GEORG EDGAR បន្ថែមថា បើនិយាយថា តើដំណើរការមកទល់ពេលនេះ បានដើរមកដល់ចំណុចណានោះ វាពិតជារឿងមួយស្មុគស្មាញ ពិបាកនឹងពន្យល់ណាស់ ប៉ុន្ដែ ឯកឧត្តមថា គណៈកម្មការអឺរ៉ុប និងរាជរដ្ឋាភិបាលកម្ពុជា តែងជួបប្រជុំជជែកពិភាក្សាគ្នាជាប្រចាំផងដែរ អំពីដំណោះស្រាយបញ្ហា EBAនេះ។
ទន្ទឹមនឹងនេះ ថ្មីនេះៗដែរ រាជរដ្ឋាភិបាលកម្ពុជា ក៏ទើបតែចេញសេចក្ដីថ្លែងការណ៍មួយ ដោយបង្ហាញពីឆន្ទៈ និងបើកឱកាស សម្រាប់ធ្វើឲ្យមានភាពប្រសើរឡើងនូវបរិយាកាសនយោបាយនៅកម្ពុជា។ ជុំវិញរឿងនេះដែរ ឯកឧត្តម ឯកអគ្គរដ្ឋទូតសហភាពអឺរ៉ុប បានបង្ហាញពីការស្វាគមន៍យ៉ាងកក់ក្ដៅចំពោះ សេចក្ដីថ្លែងការណ៍ នាពេលថ្មីៗនេះរបស់រាជរដ្ឋាភិបាលកម្ពុជា ដោយឯកឧត្តម ចាត់ទុកថា ក្នុងនោះ មានចំណុចវិជ្ជមានជាច្រើន ដែលបានឆ្លើយតបទៅនឹងអ្វីដែលជាក្ដីបារម្ភរបស់សហភាពអឺរ៉ុប។
មន្ត្រីជាន់ខ្ពស់រាជរដ្ឋាភិបាល ធ្លាប់បានលើកឡើងថា បើនិយាយក្នុងក្របខណ្ឌសេដ្ឋកិច្ច ប្រព័ន្ធអនុគ្រោះពន្ធ EBA នេះ នឹងមិនស្ថិតនៅ ជាមួយកម្ពុជាយូរអង្វែងនោះទេ ព្រោះរបបអនុគ្រោះពន្ធនេះ មានផ្ដល់ជូនតែសម្រាប់ក្រុមប្រទេស ដែលមានការអភិវឌ្ឍតិចតួច Least Developed Country (LDC) ប៉ុណ្ណោះ ហើយ នៅឆ្នាំ២០២៣ នៅពេលកម្ពុជានឹងឈានហួសដំណាក់កាលនេះ នោះរបបប្រព័ន្ធអនុគ្រោះពន្ធនេះ ច្បាស់ណាស់ គឺនឹងត្រូវរបូតចេញពីកម្ពុជាហើយ។
គិតរហូតមកទល់ពេលនេះ ប្រទេសដែលទទួលបានរបបប្រព័ន្ធអនុគ្រោះពន្ធ EBA នេះ មានចំនួន ជាង ៤០ ប្រទេស។ ក្នុងនោះ សម្រាប់ប្រទេសក្នុងតំបន់អាស៊ាន មាន៣ ប្រទេស គឺកម្ពុជា ឡាវ និងមីយ៉ាន់ម៉ា។ ប៉ុន្ដែ នាពេលថ្មីៗកន្លងទៅនេះ ប្រទេសពីរ គឺកម្ពុជា និងមីយ៉ាន់ម៉ា ត្រូវបានសហភាពអឺរ៉ុប បាននិងកំពុងរៀបចំដំណើរការ ក្នុងការសម្រេចថា ដក ឬមិនដកប្រព័ន្ធអនុគ្រោះពន្ធនេះ ក្នុងពេលខាងមុខ។
សូមជម្រាបថា សហភាពអឺរ៉ុប ត្រូវបានគេចាត់ចំណាត់ថ្នាក់ថា ជាដៃគូពាណិជ្ជកម្មដ៏ធំលំដាប់ទី២ របស់កម្ពុជា។
តួយ៉ាង តាមរបាយការណ៍ពី គេហទំព័រ គណៈកម្មការអឺរ៉ុប បានឲ្យដឹងថា នៅឆ្នាំ ២០១៧ កន្លងទៅ ទំហំពាណិជ្ជកម្មកម្ពុជា អឺរ៉ុប មានជាង ៥.៨០០ លានអឺរ៉ូ ឬស្មើនឹងប្រមាណជាង ៦.៨០០ លានដុល្លារអាមេរិក។ ក្នុងនោះ កម្ពុជានាំចេញទៅអឺរ៉ុបមានតម្លៃប្រមាណ ៥ពាន់ លានអឺរ៉ូ ឬស្មើនឹងប្រមាណ ៥.៨០០ លានដុល្លារអាមេរិក ខណៈដែលអឺរ៉ុបនាំចូលមកកម្ពុជាវិញ មានតម្លៃជិត ១ពាន់លានដុល្លារអាមេរិក។
គេហទំព័រដដែលបានឲ្យដឹងទៀតថា ទំនិញ ដែលកម្ពុជានាំចេញទៅអឺរ៉ុប មានដូចជា ផលិតផលវាយនភ័ណ្ឌ ស្បែកជើង និងផលិតផលកសិកម្មជាដើម។ រីឯទំនិញដែលអឺរ៉ុប នាំចូលមក កម្ពុជាវិញ មានដូចជា គ្រឿងម៉ាស៊ីន ឧបករណ៍សម្រាប់បម្រើដល់វិស័យដឹកជញ្ជូន និងផលិតផលកសិកម្មមួយចំនួនទៀត។
None
