នេះបើយោងតាមអត្ថបទប្លុកមួយរបស់លោកស្រី Cecilia Malmström ស្នងការអឺរ៉ុបទទួលបន្ទុកពាណិជ្ជកម្ម ដែលចេញផ្សាយនៅថ្ងៃសុក្រ ទី៥ ខែតុលា ឆ្នាំ២០១៨។ អានអត្ថបទប្លុកជាភាសាអង់គ្លេស >>
លោកស្រី Cecilia Malmström សរសេរថា «ថ្ងៃនេះ តំណាងជាន់ខ្ពស់ Federica Mogherini និងរូបខ្ញុំ បានជូនដំណឹងដល់កម្ពុជាថា យើងនឹងចាប់ផ្ដើមដំណើរការសម្រាប់ការដកការអនុគ្រោះពន្ធរបស់ប្រទេសនេះ នៅក្រោមកម្មវិធី EBA»។
លោកស្រីស្នងការអឺរ៉ុបទទួលបន្ទុកពាណិជ្ជកម្ម សរសេរថា «នៅកម្ពុជា យើងកំពុងឃើញនូវការវិវឌ្ឍដែលគួរឲ្យរំខាន ជាមួយនឹងការធ្លាក់ចុះដុនដាបនៃសិទ្ធិមនុស្ស និងសិទ្ធិការងារ ដោយមិនឃើញមានការកែលម្អប្រសើរឡើងវិញដែលអាចជឿជាក់បានសោះ។ បេសកកម្មថ្មីៗរបស់ EU ទៅកាន់ប្រទេសនេះ [កម្ពុជា] បានរកឃើញនូវការរំលោភធ្ងន់ធ្ងរនិងជាលក្ខណៈប្រព័ន្ធនូវសេរីភាពក្នុងការបញ្ចេញមតិ សិទ្ធិការងារ និងសេរីភាពក្នុងការបង្កើតសមាគម ជាដើម»។
អត្ថបទទាក់ទង
ប្រទេសកម្ពុជាទទួលផលប្រយោជន៍ពីកម្មវិធីអនុគ្រោះពន្ធ EBA ដែលធានាការចូលទៅទីផ្សារអឺរ៉ុបដោយឥតបង់ពន្ធសម្រាប់គ្រប់ទំនិញនាំចេញទាំងអស់ លើកលែងតែអាវុធចេញ។ ប៉ុន្តែ ការអនុគ្រោះពន្ធនេះ គឺភ្ជាប់ជាមួយលក្ខខណ្ឌនៃទំនួលខុសត្រូវគោរពនិងការពារគុណតម្លៃដែលមានចែងនៅក្នុងអនុសញ្ញាគោលចំនួន ១៥ របស់អង្គការសហប្រជាជាតិ និងអង្គការពលកម្មអន្តរជាតិ។
តួលេខគណៈកម្មការអឺរ៉ុបបង្ហាញថា ឆ្នាំ២០១៧ សហភាពអឺរ៉ុបជាដៃគូពាណិជ្ជកម្មធំជាងគេបំផុតទីពីររបស់ប្រទេសកម្ពុជា ដោយនាំចូលទំនិញពីកម្ពុជាក្នុងទឹកប្រាក់ជិត ៦ពាន់លានដុល្លារ ភាគច្រើនជាផលិតផលសម្លៀកបំពាក់កាត់ដេរ ស្បែកជើង និងផលិតផលកសិកម្ម។
អ្នកវិភាគនិងអ្នកសេដ្ឋកិច្ចលើកឡើងជារឿយៗ ថា ប្រសិនបើកម្ពុជាបាត់បង់ឋានៈអនុគ្រោះពន្ធ EBA នេះ វិស័យដែលនឹងរងផលប៉ះពាល់ខ្លាំងជាងគេបំផុត គឺវិស័យកាត់ដេរនិងផលិតស្បែកជើង ដែលផ្ដល់ការងារដល់កម្មករជាង ៧សែននាក់។
ទោះយ៉ាងណា វិធានការរបស់សហភាពអឺរ៉ុបជុំវិញការអនុគ្រោះពន្ធ EBA សម្រាប់កម្ពុជានេះ មិនទាន់ជាការបិទផ្លូវទាំងស្រុងនៅឡើយទេ។ លោកស្រីស្នងការពាណិជ្ជកម្មអឺរ៉ុប Cecilia Malmström សរសេរនៅក្នុងអត្ថបទប្លុករបស់លោកស្រីថា «យើងនឹងបើកចំហច្រកសន្ទនាសម្រាប់ប្រទេសទាំងពីរ [កម្ពុជា និង មីយ៉ាន់ម៉ា]។ នឹងមានលំហសម្រាប់ការចរចានិងការសន្ទនាសម្រាប់ប្រទេសទាំងពីរ នៅក្នុងដំណើរការនេះ»។
លោកស្រី Cecilia Malmström បន្តថា «យើងមិនទាន់ទៅដល់មាត់ជ្រោះនៅឡើយទេ ហើយពេលវេលានៅមាននៅឡើយសម្រាប់កម្ពុជា និងមីយ៉ាន់ម៉ា ដើម្បីដកខ្លួនចេញពីមាត់ជ្រោះនេះ។ ប៉ុន្តែ ទោះយ៉ាងណា ផលវិបាកនៃផ្លូវដែលប្រទេសទាំងពីរនេះកំពុងដើរ ឥឡូវនេះ មើលឃើញកាន់តែច្បាស់»។
ជុំវិញការអនុគ្រោះពន្ធក្រោមកម្មវិធី EBA មន្ត្រីជាន់ខ្ពស់រដ្ឋាភិបាលកម្ពុជាធ្លាប់លើកឡើងជារឿយៗ ថា មែនទែនទៅ ប្រព័ន្ធអនុគ្រោះពន្ធ EBA នេះ នឹងមិនស្ថិតនៅជាមួយកម្ពុជា បានរហូតនោះទេ ពោលគឺវានឹងត្រូវបាត់បង់នៅថ្ងៃណាមួយ ព្រោះប្រព័ន្ធអនុគ្រោះពន្ធនេះ គឺមានសម្រាប់តែប្រទេសមានការអភិវឌ្ឍតិចតួចប៉ុណ្ណោះ (LDC) ដូច្នេះ ប្រសិនបើកម្ពុជា ឡើងឋានៈហួសពីនេះ ច្បាស់ណាស់ កម្ពុជានឹងត្រូវរបូត EBA នេះហើយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
