ឆ្នាំ២០២២ ជាឆ្នាំដែលត្រូវអនុវត្តច្បាប់ស្តីពីការគ្រប់គ្រងល្បែងពាណិជ្ជកម្មដែលតម្រូវឲ្យស្ថាប័នមានសមត្ថកិច្ចត្រូវស្រង់ស្ថិតិចំនួនកាស៊ីណូ ដែលកំពុងប្រតិបត្តិការនៅទូទាំងប្រទេសឡើងវិញ និងតម្រូវឲ្យម្ចាស់អាជីវកម្មក្នុងវិស័យនេះមកដាក់ពាក្យស្នើសុំអាជ្ញាបណ្ណសាជាថ្មី។ មន្ត្រីជាន់ខ្ពស់នៃអគ្គនាយកដ្ឋានឧស្សាហកម្ម នៃក្រសួងសេដ្ឋកិច្ច និងហិរញ្ញវត្ថុបានបញ្ជាក់ថា មកទល់ពេលនេះមានម្ចាស់កាស៊ីណូប្រហែល៨០ ហើយបានមកដាក់ពាក្យស្នើសុំអាជ្ញាបណ្ណ ដើម្បីធ្វើប្រតិបត្តិការដោយស្របច្បាប់។
ឯកឧត្តម រស់ ភិរុណ អគ្គនាយករងនៃអគ្គនាយកដ្ឋានឧស្សាហកម្ម នៃក្រសួងសេដ្ឋកិច្ចនិងហិរញ្ញវត្ថុ បានអះអាងទៀតថា ការប្រមូលចំណូលពីវិស័យកាស៊ីណូនៅ ២ ទៅ៣ឆ្នាំកន្លងមកនេះ ក៏មានការថមថយចុះយ៉ាងគំហុកផងដែរ ដោយសារតែកន្លងមករាជរដ្ឋាភិបាលបានសម្រេចបិទអាជីវកម្មកាស៊ីណូអនឡាញ និងដោយសារបញ្ហាកូវីដ១៩ ធ្វើឲ្យមានការផ្អាសកម្មភាពកាស៊ីណូជាដើម។
ឯកឧត្តម រស់ ភិរុណ បានគូសបញ្ជាក់ថា នៅឆ្នាំ២០២២នេះ រដ្ឋបានដាក់គោលដៅប្រមូលចំណូលពីវិស័យនេះឲ្យបានគ្រប់តាមផែនការ ៣៥លានដុល្លារ បន្ទាប់ពីបានទម្លាក់២៥% នៃផែនការប្រមូលចំណូលក្នុងវិស័យនេះ។
ក្រោយពិភពលោករួមទាំងកម្ពុជា ទទួលរងនូវការឆ្លងរាតត្បាតនៃជំងឺកូវីដ-១៩ អាជីវកម្មក្នុងវិស័យកាស៊ីណូបានរងផលប៉ះពាល់យ៉ាងខ្លាំង ដែលបណ្តាលឲ្យកាស៊ីណូជាច្រើនត្រូវបង្ខំចិត្តបិទទ្វារ ឬផ្អាកដំណើរការបណ្តោះអាសន្នជាបន្តបន្ទាប់។ កត្តានេះ បានធ្វើឲ្យការប្រមូលចំណូលពីវិស័យនេះ មានការធ្លាក់ចុះយ៉ាងគំហុក ពោលគឺនៅឆ្នាំ២០២១ កន្លងទៅ រដ្ឋទទួលបានចំណូលពីវិស័យនេះ តែជាង៩លានដុល្លារប៉ុណ្ណោះ។ នេះបើតាមការបញ្ជាក់របស់ឯកឧត្តម រស់ ភិរុណ ដែលបានបន្ថែមថា បច្ចុប្បន្នមានកាស៊ីណូតិចតួចប៉ុណ្ណោះបានបើកប្រតិបត្តិការឡើងវិញ ខណៈកាស៊ីណូជាច្រើនបន្តបិទទ្វារ។
អត្ថបទគួរអាន
អគ្គនាយករងនៃអគ្គនាយកដ្ឋានឧស្សាហកម្មរូបនេះបានគូសបញ្ជាក់បន្ថែមថា ឆ្នាំ២០២២ ជាឆ្នាំដែលរដ្ឋត្រូវអនុវត្តច្បាប់ស្តីពីការគ្រប់គ្រងការផ្សាយពាណិជ្ជកម្ម បន្ទាប់ពីខកខានក្នុងការអនុវត្តអស់រយៈពេល១ឆ្នាំកន្លងមកនេះ ក្រោយច្បាប់នេះត្រូវបានបង្កើតឡើងនៅឆ្នាំ២០២០។ តាមរយៈការអនុវត្តច្បាប់នេះ រដ្ឋ តម្រូវម្ចាស់កាណូស៊ី ដែលកំពុងដំណើរការទាំងអស់ទូទាំងប្រទេស មកដាក់ពាក្យស្នើសុំអាជ្ញាបណ្ណសាជាថ្មី ដើម្បីធានាភាពស្របច្បាប់ក្នុងវិស័យនេះ ខណៈបច្ចុប្បន្នមានម្ចាស់កាស៊ីណូចំនួន៨០ហើយបានមកដាក់ពាក្យស្នើសុំអាជ្ញាបណ្ណ។ ការតម្រូវឲ្យស្នើសុំអាជ្ញាបណ្ណសាជាថ្មីនេះ គឺដើម្បីបង្កភាពងាយស្រួលក្នុងការគ្រប់គ្រង ក៏ដូចជាបង្កើនប្រសិទ្ធភាពក្នុងការប្រមូលចំណូលក្នុងវិស័យមួយនេះ។
សូមបញ្ជាក់ថា កាលពីឆ្នាំ២០១៩ រាជរដ្ឋាភិបាលកម្ពុជា ក៏បានសម្រេចបញ្ឈប់ផ្ដល់អាជ្ញាបណ្ណល្បែងអនឡាញគ្រប់ប្រភេទនៅកម្ពុជា ហើយបម្រាមនេះ បានធ្វើឲ្យអាជីវកម្មឧស្សាហកម្មល្បែង និងកាស៊ីណូនៅកម្ពុជាមានការធ្លាក់ចុះយ៉ាងគំហុក ពិសេសនៅក្នុងខេត្តព្រះសីហនុ ដែលមានម្ចាស់កាស៊ីណូ និងអ្នកលេងភាគច្រើនជាជនជាតិចិន។ លុះក្រោយមកទៀត នៅក្នុងឆ្នាំ២០២០ អំឡុងខែមេសា រាជរដ្ឋាភិបាលក៏បានផ្អាកដំណើរការអាជីវកម្មកាស៊ីណូ ក្រោយមានមានការរាតត្បាតកូវីដ១៩ ហើយក្រោយមកមានអាជីវកម្មកាស៊ីណូតិចតួចប៉ុណ្ណោះ ដែលបានបើកដំណើរការឡើងវិញ។ កត្តាទាំងនេះ ហើយត្រូវបានអគ្គនាយករងនៃអគ្គនាយកដ្ឋានឧស្សាហកម្មឯកឧត្តម រស់ ភិរុណ អះអាងថា បានធ្វើឲ្យប្រាក់ចំណូលពន្ធពីវិស័យកាស៊ីណូ នៅឆ្នាំ២០២០ និង២០២១ មានការថមថយចុះ ពោលគឺក្នុងមួយឆ្នាំមានប្រហែលជាង៩លានដុល្លារអាមេរិកប៉ុណ្ណោះ៕
None
