លោក ឈ រិទ្ធី នាយកប្រតិបត្តិក្រុមហ៊ុន Khmer Fresh milk ដែលជាក្រុមហ៊ុនគ្រប់គ្រងលើកសិដ្ឋានគិរីសួគ៌ បានប្រាប់ខេមបូណូមីសថា បច្ចុប្បន្ននេះ កំណើននៃតម្រូវការទឹកដោះគោស្រស់ពីសិដ្ឋានគិរីសួគ៌ មានការកើនឡើងយ៉ាងខ្លាំងជារៀងរាល់ថ្ងៃ ពោលកើនឡើងពី២ពាន់លីត្រ កាលពីលក់ដំបូង រហូតដល់៧ពាន់លីត្រ ក្នុងមួយថ្ងៃ។
លោក ឈ រិទ្ធី បានបង្ហាញពីក្តីរីករាយ នៅពេលដែលពលរដ្ឋខ្មែរកាន់តែចាប់ផ្តើមពេញនិយមគាំទ្រផលិតផលក្នុងស្រុក ហើយលោកបញ្ជាក់ថា នៅឆ្នាំក្រោយ ក្រុមហ៊ុនកសិដ្ឋានគិរីសួគ៌ នឹងបង្កើនចំនួនគោផ្តល់ទឹកដោះដល់ ៧០០ក្បាល ដើម្បីជំរុញឱ្យបរិមាណផ្គត់ផ្គង់នៅក្នុងស្រុកឲ្យបានដល់ជាង១ម៉ឺនលីត្រនៅក្នុងមួយថ្ងៃ។
អត្ថបទទាក់ទង!
ចំណែកឯ ក្រុមហ៊ុន រស្មី សេដ្ឋា ដែលគ្រប់គ្រងលើកសិដ្ឋានផលិតទឹកដោះគោតេជោសែនឬស្សីត្រឹមក្នុងខេត្តព្រះវិហារវិញ ក៏បានលើកឡើងពីកំណើនការលក់ទឹកដោះគោស្រស់របស់ខ្លួនដែរ ដោយអ្នកគ្រប់គ្រងទូទៅនៃក្រុមហ៊ុននេះ អះអាងថា បច្ចុប្បន្នការផ្គត់ផ្គង់ទឹកដោះគោស្រស់នៅលើទីផ្សារ គឺមិនគ្រប់គ្រាន់នោះទេ ដោយសារាតែតម្រូវការធំជាងការផ្គត់ផ្គង់ទ្វេដង។
លោក ជួន ធារិទ្ធ នាយក គ្រប់គ្រង ទូទៅ នៃ ក្រុមហ៊ុន រស្មី សេដ្ឋា បានបញ្ជាក់ថា មូលហេតុដែលការផ្គត់ផ្គង់ទឹកដោះគោស្រស់របស់ក្រុមហ៊ុនលោក មានកំណើនខ្លាំងបែបនេះ ដោយសារតែអតិថិជនភាគច្រើនចាប់ផ្តើមឲ្យតម្លៃទៅលើរសជាតិនៃទឹកគោស្រស់ក្នុងស្រុក ជាងទឹកដោះគោដែលនាំចូលពីក្រៅប្រទេស។
បើតាមការឲ្យពីអ្នកគ្រប់គ្រងកសិដ្ឋានធំៗទាំង២នេះ នៅឆ្នាំក្រោយកសិដ្ឋានគ្រោងនឹងពង្រីកការចិញ្ចឹមគោបន្ថែមទៀត ដោយក្នុងនោះ នៅកសិដ្ឋានគិរីសួគ៌ ចំនួនគោផលិតទឹកដោះនឹងកើនដល់ចំនួន៧០០ក្បាលក្នុងចំណោមគោសរុប៧៥០ក្បាល ខណៈបច្ចុប្បន្នគោអាចផលិតទឹកដោះបាន មានត្រឹមពាក់កណ្តាលនៃចំនួនគោសរុបប៉ុណ្ណោះ ។ ដោយឡែក កសិដ្ឋានផលិតទឹកដោះគោតេជោសែនឬស្សីត្រឹបក្នុងខេត្តព្រះវិហារវិញ អះអាងថា នឹងបង្កើនចំនួនគោផលិតទឹកដោះបន្ថែមទៀត តែមិនទាន់អាចបញ្ជាក់ពីចំនួនច្បាស់លាស់នៅឡើយ៕
None
