ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងនាពេលថ្មីៗនេះថា គិតជាផលចាប់ទឹកសាបសរុបនៅក្នុងឆ្នាំនេះ អាចមានកម្រិតទាបជាងឆ្នាំកន្លងទៅ ប្រមាណ ១៣% ដោយសារតែកម្ពស់ទឹកទន្លេមេគង្គស្ថិតក្នុងកម្រិតទាប ហើយបានអូសបន្លាយជាងមួយខែមកហើយ។
ឯកឧត្តមបន្ថែមថា រដ្ឋបាបាលជលផលបានព្យាករផលចាប់សរុបតាមដាយត្រី សម្រាប់ឆ្នាំ២០២០នេះ អាចនឹងទាបជាងឆ្នាំ២០១៩ ប្រហែល៣១% ពីជាង ១ម៉ឺន៤ពាន់តោន មកនៅត្រឹម ៩ពាន់៩រយតោនប៉ុណ្ណោះនៅឆ្នាំនេះ។
ចំពោះផលនេសាទក្នុងដែននេសាទវិញ នៅឆ្នាំ២០២០នេះ នឹងមានប្រមាណតែ ជាង៣២ម៉ឺន៦ពាន់តោន ពោលគឺមានទាបជាងឆ្នាំ២០១៩ ដល់ទៅ៥ម៉ឺន៨ពាន់តោន។
អត្ថបទទាក់ទង!
យ៉ាងណាក៏ដោយចុះ បើមើលទៅលើផលដែលទទួបានពីការធ្វើវារីវប្បកម្មវិញមានការកើនឡើងដល់ទៅ ៣០% បើធៀបនឹងឆ្នាំ២០១៩ មានតែជាង៣០ម៉ឺន៧ពាន់តោន ហើយឆ្នាំ២០២០នេះ មានដល់ទៅជាង៤០ម៉ឺនតោន។
ឯកឧត្តម វេង សាខុន អះអាងថា តួលេខនេះ បានបញ្ជាក់យ៉ាងច្បាស់ថា អនុវិស័យវារីវប្បកម្ម បាននិងកំពុងបំពញតួនាទីយ៉ាងសំខាន់ក្នុងការផ្គត់ផ្គង់ឲ្យទីផ្សារក្នុងស្រុក ជំនួសឲ្យផលនេសាទដាយត្រី និងផលនេសាទក្នុងដែននេសាទ។៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
