របាយការណ៍ក្រសួងពាណិជ្ជកម្មបង្ហាញថា ទំហំទឹកប្រាក់នៃការនាំចេញនាំចូលសរុបរបស់កម្ពុជានៅឆ្នាំ ២០១៨ មានប្រមាណជិត ២៥ពាន់លានដុល្លារ ធៀបនឹងរយៈពេលដូចគ្នាឆ្នាំ២០១៧ ដែលមានទឹកប្រាក់ប្រមាណជាង ២៣ពាន់លានដុល្លារ កើន ២ពាន់លានដុល្លារអាមេរិក។
ស្របទៅនឹងការកើនឡើងនៃទំហំទឹកប្រាក់នាំចេញនាំចូលនេះដែរ ឯកឧត្តម ប៉ាន សូរស័ក្តិ រដ្ឋមន្រ្តី ក្រសួងពាណិជ្ជកម្មកម្ពុជា បានគូសបញ្ជាក់ថា ឆ្នាំ២០១៨ នេះការនាំចេញរបស់កម្ពុជាបានកើនឡើងគួឲ្យកត់សម្គាល់ជុំវិញ ១០ភាគរយ បានមកពីវិស័យកាត់ដេរ និងការនាំចេញផលិតផលកសិកម្ម និងឧស្សាហកម្មដោយនាំចេញទៅកាន់ទីផ្សារជាង ១៤៧ ប្រទេស នៅទូទាំងពិភពលោក ពោលគឺ ការនាំចេញនេះ មានទំហំប្រមាណជា ៦០ភាគរយ នៃ ផ.ស.ស របស់កម្ពុជា ហើយនៅឆ្នាំខាងមុខនឹងជំរុញផលិតផលជាច្រើនទៀតដើម្បីនាំចេញផងដែរ។
អត្ថបទគួរអាន!
ឯកឧត្តម ប៉ាន សូរស័ក្តិ បានគូសបញ្ជាក់បន្ថែមទៀតថា នៅឆ្នាំ២០១៨ ការអភិវឌ្ឍមានសន្ទុះទៅមុខជាលំដាប់ពិសេស គឺដំណាំកសិផលក៏ដូចគ្នាដែរ ហើយការនាំចេញផលិតផលសម្រេចក៏បង្ហាញឲ្យឃើញថា មានការវិនិយោគចាប់ផ្តើមកើនឡើងច្រើនពីបរទេសពិសេសគឺចិន បានធ្វើការវិនិយោគរោងចក្រកាត់ដេរសំលៀកបំពាក់ ស្បែកជើង កាបូប រោងចក្រម៉ាស៊ីនកិនស្រូវ និងរោងចក្រកែច្នៃដំឡូងមី និងផ្លែមៀនជាដើម។
ជាងនេះទៀត ការស្នើសុំចុះបញ្ជីក្រុមហ៊ុន ថ្មីមាន ១៤.៥៥២ ក្រុមហ៊ុន ធៀបនឹងឆ្នាំ ២០១៧ ជាង ៦ពាន់ក្រុមហ៊ុន កើនឡើងជាង ១៣៨ភាគរយ៕
None
