យោងតាមតួលេខពីក្រសួងទេសចរណ៍ បានឲ្យដឹងទៀតថា បើគិតតាំងពីខែមករាមកទល់នឹងខែមិថុនាឆ្នាំ២០២០ ចំនួនភ្ញៀវទេសចរអន្តរជាតិដែលបានធ្វើដំណើរចូលមកកាន់កម្ពុជា គឺបានដាំក្បាលចុះជាលំដាប់ ពិសេសគឺនៅនៅត្រីមាសទី២ មានការធ្លាក់ចុះយ៉ាងគំហុកដល់ទៅ ជាង៩៨% ធៀបនឹងត្រីមាសទី ២កាលពីឆ្នាំ២០១៩។
ការធ្លាក់ចុះខ្លាំងនៅត្រីមាសទី២ ត្រូវបានមន្ត្រីជាន់ខ្ពស់នៃក្រសួងទេសចរណ៍ធ្លាប់បានអះអាងថា គឺដោយសារតែមានគោលការណ៍រឹតបន្ដឹងលើការធ្វើដំណើរពីសំណាក់រាជរដ្ឋាភិបាល និងវិធានការដាក់ចេញជាបន្ដបន្ទាប់ក្នុងការទប់ស្កាត់ការរីរាលដាលនៃមេរោគកូវីដ-១៩។ ក្នុងនោះដែរ ប្រទេសជាច្រើនលើពិភពលោកក៏មានការរឹតត្បិតលើការធ្វើដំណើរដូចគ្នាដែរ។
អត្ថបទទាក់ទង!
តាមទិន្នន័យពីក្រសួងទេសចរណ៍ ភ្ញៀវទេសចរចិន ដែលធ្លាប់តែមានកំណើនខ្ពស់រហូតដល់ជិត១លាន៣សែននាក់កាលពី៦ខែដំបូងនៅឆ្នាំ២០១៩នោះ បានធ្លាក់ចុះមកនៅត្រឹមតែជាង២៧ម៉ឺននាក់ប៉ុណ្ណោះនៅ៦ខែឆ្នាំ២០២០នេះ ខណៈដែលភ្ញៀវទេសចរមកពីប្រទេសផ្សេងទៀតដូចជា វៀតណាម ថៃ អាមេរិក កូរ៉េ ជាដើមក៏ធ្លាក់ចុះដូចគ្នាដែរ។
ស្របពេលដែលចំនួនទេសចរអន្តរជាតិធ្លាក់ចុះដ៏គំហុកនេះ វាក៏បានញ៉ាំងឲ្យវិស័យទេសចរណ៍ទាំងមូលកំពុងប្រឈមនឹងបញ្ហាដូចគ្នាដែរ តួយ៉ាងអាជីវកម្មក្នុងវិស័យទេសចរជាច្រើនបាននិងកំពុងជួបនូវការលំបាកពិសេសទាក់ទងបញ្ហាលំហូរសាច់ប្រាក់ ខណៈដែលថ្មីៗនេះ សមាគមទីភ្នាក់ងារទេសចរណ៍កម្ពុជា បាននិងកំពុងដាក់សំណើទៅកាន់រាជរដ្ឋាភិបាលឲ្យជួយទម្លាក់ប្រាក់កម្ចីអត្រាការប្រាក់ទាប ដើម្បីជួយសង្គ្រោះ ក៏ដូចជាបន្តដង្ហើមរស់របស់អាជីវកម្មក្នុងវិស័យទេសចរណ៍ នៅអំឡុងគ្រាដ៏លំបាកនៃវិបត្តិកូវីដ-១៩។
ទាក់ទងនឹងការផ្ដល់ប្រាក់កម្ចីដល់អាជីវកម្មក្នុងវិស័យទេសចរណ៍ លោកបណ្ឌិត អ៊ិន ចាន់នី នាយកប្រតិបត្តិធនាគារអេស៊ីលីដា ធ្លាប់បានគូសបញ្ជាក់ថា ក្នុងដំណាក់កាលដែលកម្ពុជាយើងកំពុងមានមានរោគឆ្លងរាតត្បាតនេះ ជាការពិតណាស់ ខាងធនាគារឯកជនគឺផ្ដល់កម្ចីសម្រាប់តែអាជីវកម្មណាដែលអាចមានការរីកចម្រើនលូតលាស់បាននៅក្នុងដំណាក់កាលនេះប៉ុណ្ណោះ។
លោកបណ្ឌិតបន្ថែមថា ជាក់ស្ដែង នៅក្នុងវិស័យទេសចរណ៍ គឺកំពុងមានផលប៉ះពាល់ខ្លាំង ដែលអ្នកខ្លះមិនមានលទ្ធភាពសងត្រឡប់ ដូច្នេះ បើខាងធនាគារផ្ដល់ប្រាក់កម្ចីទៅឲ្យពួកគាត់ទៀតនៅក្នុងវិស័យដដែលនេះ គឺពិតជាមិនអាចទេ ក៏ប៉ុន្ដែបើម្ចាស់អាជីវកម្មនោះមានមុខរបរណាផ្សេងទៀត ដែលធានាបាននូវប្រាក់ចំណូលដែលត្រូវនឹងកាលៈទេសៈនាពេលបច្ចុប្បន្ននេះ នោះ ខាងធនាគារនឹងនៅតែបន្តផ្ដល់កម្ចីជូនពួកគាត់។
កន្លងមក រាជរដ្ឋាភិបាលកម្ពុជា ក៏បានដាក់ចេញនូវវិធានការជួយសង្គ្រោះជាបន្ដបន្ទាប់ដែរ ដល់អាជីវកម្មដែលរងផលប៉ះពាល់ព្រោះតែកូវីដ-១៩ ដោយក្នុងនោះវិស័យទេសចរណ៍ក៏ទទួលបានដូចគ្នា ដូចជាការលើកលែងពន្ធនានា និងការជួយឧបត្ថម្ភប្រាក់ប្រចាំខែដល់បុគ្គលិកក្នុងវិស័យទេសចរណ៍ ដែលបានបាត់បង់ការងារ ដែលបណ្ដាលមកពីបញ្ហាកូវីដ-១៩ផងដែរ។
ទោះយ៉ាងណា តាមការអះអាងរបស់អ្នកជំនាញក្នុងវិស័យទេសចរណ៍ មានអាជីវកម្មក្នុងវិស័យទេសចរណ៍ជាច្រើនបាននិងកំពុងជួបផលប៉ះពាល់ធ្ងន់ធ្ងរ រួមមានអាជីវកម្មសណ្ឋាគារ ភោជនីដ្ឋាន និងជាពិសេសគឺក្រុមហ៊ុនទេសចរណ៍បានបិទអាជីវកម្មស្ទើរតែទាំងស្រុង បើទោះបីជាមិនមានតួលេខជាក់លាក់អំពីការស្នើសុំការព្យួរការងារនៅក្រសួងការងារក៏ដោយ ប៉ុន្តែអាជីវកម្មទាំងអស់នោះគឺបានបិទទ្វារដោយខ្លួនឯងអស់ទៅហើយព្រោះគ្មានភ្ញៀវ។
ឯកឧត្តម ថោង ខុន រដ្ឋមន្ត្រីក្រសួងទេសចរណ៍ធ្លាប់បានលើកឡើងកាលពីចុងខែមិថុនាកន្លងទៅនេះថា ដោយសារតែបញ្ហាការរីករាលដាលនៃមេរោគកូវីដ-១៩ យ៉ាងហោចណាស់ បានធ្វើឲ្យអាជីវកម្មទេសចរណ៍បានបិទទ្វារបណ្ដោះអាសន្នប្រមាណជិត ៣ពាន់ទីតាំង និងបានធ្វើឲ្យប៉ះពាល់ដោយផ្ទាល់ដល់ការងារកម្មករនិយោជិតក្នុងវិស័យនេះ ប្រមាណជាង ៤,៥ ម៉ឺននាក់។
ឯកឧត្តម រដ្ឋមន្ត្រីបន្ថែមទៀតថា តាមការវាយតម្លៃពីក្រុមអ្នកជំនាញ បញ្ហារីករាលដាលនៃជំងឺកូវីដ-១៩នេះ នឹងធ្វើទាញឲ្យសេដ្ឋកិច្ចពិភពលោកដើរយឺត ៧ឆ្នាំ ហើយចំពោះកម្ពុជា នឹងដើរយឺត ៥ឆ្នាំដែរ។ មានន័យថា បើនៅឆ្នាំ២០២០នេះ មិនមានបញ្ហាកូវីដ-១៩ទេ គឺកម្ពុជា អាចនឹងទទួលភ្ញៀវទេសចរ៧លាននាក់ តែដោយសារតែបញ្ហាកូវីដ-១៩ កើតឡើង ដូច្នេះចំនួនទេសចរ ៧លាននាក់នេះ អាចនឹងទទួលបាននៅឆ្នាំ ២០២៥ឯណោះ។
សូមបញ្ជាក់ថា តាមរបាយការណ៍ក្រសួងទេសចរណ៍ បានឲ្យដឹងថា កាលពីឆ្នាំ២០១៩ កម្ពុជាទទួលបានភ្ញៀវទេសចរអន្តរជាតិសរុបជាង៦លាន៦សែននាក់ កើនឡើង ៦,៦% ធៀបនឹងឆ្នាំ២០១៨៕
None
