សារព័ត៌មានអន្តរជាតិធំៗបានចុះផ្សាយដោយកាលពីថ្ងៃអង្គារថា សមាជិកសភាស្តាំនិយមមកពីបក្សសាធារណរដ្ឋដឹកនាំដោយលោកម៉ាត ហ្កេតតំណាងរាស្រ្តមកពីរដ្ឋហ្ល័រីដា បានរួមគ្នាបោះឆ្នោតដកតំណែងលោកម៉ាកាធីភ្លាមៗ ក្នុងសម្លេងគាំទ២១៦ទល់នឹងសំឡេងជំទាស់២១០សម្លេង។
លោកម៉ាកាធីបានប្រាប់អ្នកកាសែតថា លោកនឹងមិនកាន់តំណែងជាប្រធានសភាទៀតទេ។ មុននឹងឈានមកដល់ដំណាក់នេះ កាលពីថ្ងៃចន្ទតំណាងរាស្ត្រលោកម៉ាត ហ្កេតបានប្រកាសថា លោកនឹងដាក់ពាក្យសុំឱ្យដកតំណែងប្រធានសភាលោកម៉ាកាធី។
ហេតុផលនេះគឺថា លោកម៉ាកាធី បានក្បត់នឹងការសន្យាចំពោះបក្សសាធារណរដ្ឋខ្លួនឯង និងបានគាំទ្រចេញច្បាប់បណ្តោះអាសន្នមួយ ដើម្បីបញ្ចេញមូលនិធិ បញ្ចៀសការបិទរដ្ឋាភិបាលសហព័ន្ធ កាលពីថ្ងៃសៅរិ៍សប្តាហ៍មុន។ ច្បាប់នោះហើយ គឺជាដើមចមនៃការមិនពេញចិត្តរបស់ក្រុមសាធារណរដ្ឋដែលថា វាបានផ្តល់ប្រយោជន៍ដល់ក្រុមប្រជាធិបតេយ្យជាង។
អត្ថបទគួរអាន
តំណាងរាស្ត្រមកពីរដ្ឋហ្ល័ររីដា លោកម៉ាត ហ្កេត (Matt Gaetz) ដែលជាអ្នកផ្តើមគំនិតដកតំណែងលោកម៉ាកាធី បាននិយាយថា «មូលហេតុដែលធ្វើឱ្យម៉ាកាធី ធ្លាក់ដល់ដំណាក់កាលនេះ គឺដោយសារតែគ្មាននរណាជឿគាត់តទៅទៀត ហើយម៉ាកាធី បានធ្វើនូវអ្វីដែលផ្ទុយពីការសន្យាជាច្រើន។ ដោយឡែក ក្រុមប្រជាធិបតេយ្យបាននិយាយថា ម៉ាកាធី មិនគួរឱ្យទុកចិត្តបន្ទាប់ពីលោកធ្វើឱ្យខូចកិច្ចព្រមព្រៀងជាមួយលោកចូ បៃដិន កាលពីខែឧសភា ស្តីពីការចំណាយ។
យ៉ាងណាក៏មានដែរអ្នកគាំទ្រលោកម៉ាកាធីមួយចំនួនដែលថា ក្នុងតំណែងជាប្រធានសភាកន្លងទៅ ម៉ាកាធី បានកំណត់ការចំណាយដោយជោគជ័យ និងជំរុញផ្នែកអាទិភាពផ្សេងទៀត ទោះបីជាគណបក្សប្រជាធិបតេយ្យគ្រប់គ្រងសេតវិមាន និងព្រឹទ្ធសភាក៏ដោយ។
នៅថ្ងៃអង្គារនោះដែរ លោកចូ បៃដិន បានចេញសេចក្តីថ្លែងការណ៍ ដោយជំរុញសភាជ្រើសរើសអ្នកជំនួសតំណែងឱ្យបានឆាប់តាមតែធ្វើទៅបាន។
យ៉ាងណាមកទល់នឹងពេលនេះគេមិនទាន់ដឹងថានរណានឹងចូលមកជំនួសតំណែងកំពូលក្នុងស្ថាប័នសភានេះនៅឡើយទេ ហើយក៏កំពុងជំរុញឱ្យមានភាពចលាចលបន្ថែមទៀត។ ទោះយ៉ាងណា លោកផាទ្រីក ម៉ាហេនរី (Patrick McHenry) ដែលជាតំណាងរាស្ត្រមកពីបក្សសាធារណរដ្ឋ និងជាដៃគូលោកម៉ានកាធី នឹងត្រូវបានតែងតាំងជាប្រធានសភា បណ្តោះអាសន្នសិន។
បច្ចុប្បន្នកៅអីទាំង៤៣៥នៃសភាតំណាងគឺមានតំណាងរាស្ត្រមកពីបក្សសាធារណរដ្ឋចំនួន២២១នាក់ និងបក្សប្រជាធិបតេយ្យ២១២រូប។ ទន្ទឹមគ្នានេះ ការដកលោកម៉ាកាធី ក៏នឹងធ្វើឱ្យកាន់តែមានភាពមិនច្បាស់លាស់ជុំវិញការចំណាយរបស់រដ្ឋាភិបាល រួមទាំងជំនួយរាប់ពាន់លានដុល្លារសម្រាប់អ៊ុយក្រែន និងតម្រូវការអន្តរជាតិផ្សេងទៀតផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
