ផ្លូវជាតិលេខ៥ ពីព្រែកក្ដាម-ប៉ោយប៉ែត បញ្ចប់ការសាងសង់បានជិត ១០០ភាគរយ

គម្រោងធ្វើឲ្យប្រសើរឡើងនូវកំណាត់ផ្លូវជាតិលេខ៥នេះ គឺជាឆ្អឹងខ្នងសេដ្ឋកិច្ចដ៏សំខាន់ដែលបម្រើឲ្យគ្រប់វិស័យ ដោយមានការតភ្ជាប់ពីព្រំដែនថៃ រហូតដល់ព្រំប្រទល់វៀតណាម និងបានឆ្លងកាត់ខេត្តចំនួន៥ ។ គម្រោងនេះផ្លូវជាតិលេខ៥ មានប្រវែង ៣៦៦គីឡូម៉ែត្រ ចាប់ពីព្រែកក្ដាម-ប៉ោយប៉ែត សម្រេចបានការសាងសង់ជិត ១០០ភាគរយ និងត្រៀមសម្ពោធដាក់ឲ្យប្រើប្រាស់ជាផ្លូវការ នៅចុងខែវិច្ឆិកា ឆ្នាំ២០២៣ ខាងមុខនេះ។

លោក ឈឹម ផល្លា ប្រធាននាយកដ្ឋាន ផ្លូវថ្នល់ និងជានាយកប្រតិបត្តិគម្រោងនេះបានគូសបញ្ជាក់ថា កំណាត់ផ្លូវជាតិលេខ៥ ពីព្រែកក្ដាម-ប៉ោយប៉ែតនេះ ជាផ្លូវអាស៊ានហាយវ៉េ ដែលត្រូវពង្រីកជា ៤គន្លង មានប្រវែង ៣៦៦គីឡូម៉ែត្រ ក្រោមកម្ចីឥណទានសម្បទានពីរាជរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុន ប្រចាំកម្ពុជា(JICA) ខណៈគិតមកដល់ពេលនេះ គម្រោងឲ្យប្រសើរឡើងនូវកំណាត់ផ្លូវជាតិលេខ៥ ស្តង់ដារអន្តរជាតិមួយនេះ បានចំណាយថវិកាអស់ប្រមាណជាង ៦០០លានដុល្លារហើយ។

គម្រោងធ្វើឲ្យប្រសើរឡើងកំណាត់ផ្លូវជាតិលេខ៥នេះ វាជាលំហូរសេដ្ឋកិច្ចដ៏សំខាន់ដែលបម្រើឲ្យស្ទើរគ្រប់វិស័យសម្រាប់ប្រជាជនកម្ពុជា ជាពិសេសវិស័យដឹកជញ្ជូន​តាំងពីប្រទេសថៃ រហូតដល់ប្រទេសវៀតណាម ថែមទាំងប្រទេសចិន ផងដែរ។

លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន លើកឡើងថា តាមរយៈគម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ដែលជាជំនួយរដ្ឋាភិបាលជប៉ុន ក្រោមការអនុវត្តដោយអង្គការ JICA គឺបានជួយកាត់បន្ថយគ្រោះថ្នាក់ចរាចរណ៍លើកំណាត់ផ្លូវជាតិនេះឱ្យថយចុះប្រមាណ៣២%៕