សេចក្ដីព្រាងផែនការមេអភិវឌ្ឍថាមពលវៀតណាមលើកទី៨ ដែលទើបតែបានដាក់ជូនទៅកាន់រដ្ឋាភិបាលដោយក្រសួងឧស្សាហកម្ម និង ពាណិជ្ជកម្មវៀតណាមនាពេលថ្មីៗនេះ បានប៉ាន់ប្រមាណថា វៀតណាមនឹងត្រូវការចំណាយប្រហែល១០០ ទៅ ១១៦ពាន់លានដុល្លារអាមេរិក សម្រាប់ការអភិវឌ្ឍផលិត និងចែកចាយថាមពលអគ្គិសនីនៅក្នុងរយៈពេល ១០ឆ្នាំខាងមុខនេះ ពោលគឺគិតជាមធ្យមវៀតណាមត្រូវចំណាយក្នុងមួយឆ្នាំៗ ប្រហែលជាង៨ ទៅជាង១០ពាន់លានអាមេរិកសម្រាប់ការផលិតថាមពលអគ្គិសនី ហើយត្រូវចំណាយបន្ថែមប្រហែលជាង ១ពាន់លានដុល្លារអាមេរិកក្នុងមួយឆ្នាំសម្រាប់ការអភិវឌ្ឍន៍បណ្ដាញថាមពលអគ្គិសនី។
នៅក្នុងផែនការមេអភិវឌ្ឍន៍វិស័យថាមពលនេះដែរ វៀតណាមក៏មានគោលដៅនឹងលើកទឹកចិត្តដល់ការវិនិយោគនៅក្នុងគម្រោងថាមពលកកើតឡើងវិញផងដែរ ដោយគ្រោងនឹងជំរុញឲ្យមានការវិនិយោគលើថាមពលកកើតឡើងវិញនេះ ឲ្យបានប្រមាណជាង១០% នៃទិន្នផលថាមពលអគ្គិសនីសរុបនៅត្រឹមឆ្នាំ២០៣០ ដោយភាគច្រើនជាការវិនិយោគលើថាមពលបន្ទះសូឡា និង ថាមពលខ្យល់ជាដើម ហើយរំពឹងថា ទៅដល់ឆ្នាំ២០៤៥ ការវិនិយោគក្នុងវិស័យថាមពលប្រភេទនេះ នឹងមានដល់ទៅ ជិត៣០% នៃទំហំថាមពលសរុប។
អត្ថបទគួរអាន
ដោយឡែក សម្រាប់ការផលិតថាមពលពីឧស្ម័ន ឬហ្គាសវិញ នឹងត្រូវធ្វើឡើងនៅពេលខាងមុខទៀត។ ជាមួយគ្នានេះដែរ វៀតណាម ក៏នឹងឈប់ការអនុវត្តលើគម្រោងអគ្គិសនីដើរដោយធ្យូងថ្មមួយចំនួន ដែលត្រូវបានអនុម័តនៅក្នុងផែនការអភិវឌ្ឍន៍អគ្គិសនីជាតិរបស់ខ្លួនផងដែរ ប៉ុន្ដែ បញ្ហានេះ មិនមានការគាំទ្រដោយអាជ្ញាធរមូលដ្ឋាននោះទេ ដ្បិតថាមានគម្រោងរោងចក្រថាមពលធ្យូងថ្មខ្លះគ្រោងនឹងបើកដំណើរការសាងសង់ទៅហើយ។ ទោះយ៉ាងណា រដ្ឋាភិបាលនឹងបន្ដប្រើប្រាស់ធ្យូងថ្មក្នុងស្រុក និងនាំចូល ដើម្បីផ្គត់ផ្គង់សម្រាប់តែរោងចក្រថាមពលដែលមានស្រាប់នៅក្នុងប្រទេសតែប៉ុណ្ណោះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
